ಮಲೆನಾಡಿನಲ್ಲಿ ಸಿಗದ ಮೊಬೈಲ್ ನೆಟ್‍ವರ್ಕ್: ಜನರಿಗೆ ಸಂಕಷ್ಟ  

ಎಷ್ಟೇ ದುಬಾರಿ ಮೊಬೈಲ್‌ ತೆಗೆದುಕೊಂಡರೂ ನೆಟ್‍ವರ್ಕ್ ಇಲ್ಲ. ಯಾವುದೇ ಮಾಹಿತಿ ಸಂಗ್ರಹಕ್ಕೆ ಸಾಧ್ಯವಾಗುತ್ತಿಲ್ಲ. ವಿದ್ಯಾಭ್ಯಾಸ ಮುಗಿಸಿದ ನಂತರ ಉದ್ಯೋಗ ಹುಡುಕಾಟ ಸ್ನೇಹಿತರ ಬಳಿ ಮಾತನಾಡಲು ಸಮಾಜದಲ್ಲಿ ಆಗುತ್ತಿರುವ ಆಗುಹೋಗುಗಳ ಬಗ್ಗೆ ಮಾಹಿತಿ ತಿಳಿದುಕೊಳ್ಳಲು ಸಾಧ್ಯವಾಗದೆ ಊರನ್ನೇ ಬಿಟ್ಟು ಬೇರೆ ಊರಿಗೆ ಹೋಗಬೇಕು ಎಂದು ಐದಾರು ಗ್ರಾಮಗಳ ಯುವಕರು ಚಿಂತನೆ ನಡೆಸಿದ್ದಾರೆ. ಈಗಾಗಲೇ ಕೆಲ ಯುವಕರು ಊರನ್ನೇ ಬಿಟ್ಟು ಪಟ್ಟಣದಲ್ಲಿಯೇ ಜೀವನ ಸಾಗಿಸುತ್ತಿದ್ದಾರೆ. ಹೆಗ್ಗದ್ದೆ ಬಳಿ ನಿರ್ಮಿಸಿರುವ ಮೊಬೈಲ್ ಟವರ್‌ನಿಂದ ಈ ಹಳ್ಳಿಗಾಡಿನ ಪ್ರದೇಶಕ್ಕೆ ಕೇವಲ ಒಂದು ಪಾಯಿಂಟ್ ನೆಟ್‍ವರ್ಕ್ ಸಿಗುತ್ತಿದೆ. ಮನೆ ಒಳಗೆ ಹೋದರೆ ಆ ನೆಟ್‍ವರ್ಕ್ ಕೂಡ ಹೊರಟು ಹೋಗುತ್ತದೆ. ಯಾವುದೇ ಸಾಮಾಜಿಕ ಜಾಲತಾಣಗಳನ್ನು ಬಳಸಲು ಆಗುತ್ತಿಲ್ಲ. ಆಗುತ್ತಿರುವ ವಿದ್ಯಮಾನಗಳ ಬಗ್ಗೆ ತಿಳಿದುಕೊಳ್ಳಲೂ ಆಗುತ್ತಿಲ್ಲ. ಮೊಬೈಲ್ ಬಳಕೆ ಹೆಚ್ಚುತ್ತಿದ್ದಂತೆ ಲ್ಯಾಂಡ್ ಫೋನ್‌ಗಳ ಬಳಕೆ ಕಡಿಮೆಯಾಗಿದ್ದು ಅವನ್ನು ತೆಗೆದು ಹಾಕಲಾಯಿತು. ಆದರೆ ಇತ್ತ ಮೊಬೈಲ್ ನೆಟ್‍ವರ್ಕ್ ಕೂಡ ಬಳಕೆಯಾಗುತ್ತಿಲ್ಲ. ಲ್ಯಾಂಡ್ ಲೈನ್ ಕೂಡ ಇಲ್ಲದಂತಾಗಿದೆ ಎಂದು ಜನರು ಹೇಳುತ್ತಿದ್ದಾರೆ.