ದೊಡ್ಡಹೊಳೆ ಸೇತುವೆ ಬದಿ ಮಣ್ಣು ಕುಸಿತ

ಮಲ್ಲಿಗನೂರು ಸಮೀಪ ಹರಿಯುತ್ತಿರುವ ದೊಡ್ಡಹೊಳೆಗೆ ಕಳೆದ ಒಂದೂವರೆ ವರ್ಷದ ಹಿಂದೆ ಸುಮಾರು ₹ 70 ಲಕ್ಷ ವೆಚ್ಚದಲ್ಲಿ ನಿರ್ಮಾಣಗೊಂಡ ಸೇತುವೆಯ ಎರಡೂ ಬದಿಯಲ್ಲಿ ಮಣ್ಣು ತಂದು ಸುರಿಯಲಾಗಿತ್ತು. ಆದರೆ, ಮಳೆಯ ಕಾರಣ ಇದೀಗ ಮಣ್ಣು ಕುಸಿಯತೊಡಗಿದೆ. ಮಲೆನಾಡ ಭಾಗವಾಗಿರುವುದರಿಂದ ಮಳೆ ಹೆಚ್ಚು ಬರುವುದರಿಂದ ಮಣ್ಣು ಕುಸಿಯುವ ಪ್ರಮಾಣ ದಿನೇ ದಿನೇ ಹೆಚ್ಚಾಗಿದ್ದು ಪೂರ್ಣಪ್ರಮಾಣದಲ್ಲಿ ಕುಸಿದರೆ ಹೊಸಹಳ್ಳಿ, ಬೆಳ್ಳಾವರ ಹಾಗೂ ಅರೇಹಳ್ಳಿ ಈ ಮೂರು ಗ್ರಾಮಗಳಿಗೆ ಸಂಪರ್ಕ ಕಡಿತಗೊಳ್ಳಲಿದೆ.

ಸೇತುವೆ ಭದ್ರವಾಗಿದ್ದರೂ ಸೇತುವೆಯ ತುದಿಯಲ್ಲಿ ಹಾಕಿರುವ ಮಣ್ಣು ಭದ್ರವಾಗಿ ಇರುವಂತೆ ತಡೆಗೋಡೆ ನಿರ್ಮಿಸುವ ಅಗತ್ಯವಿದೆ. ಇಲ್ಲದಿದ್ದರೆ ಹೊಳೆಯಲ್ಲಿ ನೀರು ಹೆಚ್ಚು ಹರಿದಾಕ್ಷಣ ಮಣ್ಣು ಕುಸಿಯುವ ಪ್ರಮಾಣ ಇನ್ನಷ್ಟು ಹೆಚ್ಚಾಗಲಿದೆ. ಇದರೊಂದಿಗೆ ರಸ್ತೆ ಮೇಲಿನ ನೀರು ಹರಿಯುವುದರಿಂದ ಮಣ್ಣು ಹೆಚ್ಚಾಗಿ ಕುಸಿಯಲಿದೆ. ಇದಕ್ಕೆ ಕಲ್ಲಿನ ತಡೆಗೋಡೆ ನಿರ್ಮಾಣವೇ ಸೂಕ್ತ ಎನ್ನುವ ಅಭಿಪ್ರಾಯಗಳು ಜನರಿಂದ ಕೇಳಿಬರುತ್ತಿವೆ.

‘ಸೇತುವೆ ಗುಣಮಟ್ಟದಿಂದ ಕೂಡಿದ್ದರೂ ಸೇತುವೆಯ ಎರಡೂ ಬದಿಯಲ್ಲಿ ಹಾಕಿರುವ ಮಣ್ಣು ಕುಸಿಯದಂತೆ ತಡೆಗೋಡೆ ನಿರ್ಮಿಸಬೇಕಿದೆ. ತಡೆಗೋಡೆ ನಿರ್ಮಿಸದೆ ಇದ್ದರೆ ಮಣ್ಣು ಕುಸಿದು ಸೇತುವೆಗೆ ಹಾನಿಯಾಗುವ ಸಾಧ್ಯತೆಯಿದೆ ಹಾಗೂ ಮೂರು ಗ್ರಾಮಗಳಿಗೆ ಸಂಪರ್ಕ ಕಡಿತವಾಗಲಿದೆ’ ಎಂದು ಮಲ್ಲಿಗನೂರು ಗ್ರಾಮದ ಲೋಕೇಶ್ ಪತ್ರಿಕೆಗೆ ತಿಳಿಸಿದರು.