ಹಾಸನದಲ್ಲಿ ಶೂನ್ಯ ನೆರಳಿನ ಕೌತುಕ

ಶೂನ್ಯ ನೆರಳಿನ ದಿನದಂದು ಸೂರ್ಯ ನೆತ್ತಿಯ ಮೇಲಿನ ನಿಖರ ಬಿಂದು ತಲುಪಿದಾಗ ನೆರಳು ಗೋಚರಿಸುವುದಿಲ್ಲ. ಈ ವಿಸ್ಮಯವನ್ನು ಶೂನ್ಯ ನೆರಳು ಎನ್ನಲಾಗುತ್ತದೆ. ನಗರದಲ್ಲಿ ಶನಿವಾರ 12.24ಕ್ಕೆ ಸಂಭವಿಸಿದ ಶೂನ್ಯ ನೆರಳು ನೋಡುಗರನ್ನು ಅಚ್ಚರಿಗೊಳಿಸಿತು. ಅಲ್ಲದೇ ಖಗೋಳಶಾಸ್ತ್ರದ ಬಗೆಗಿನ ಆಸಕ್ತಿಯನ್ನು ಹೆಚ್ಚಿಸುವಂತೆ ಮಾಡಿತು.

ವರ್ಷದಲ್ಲಿ ಎರಡು ಬಾರಿ ಕರ್ಕಾಟಕ ವೃತ್ತ ಮತ್ತು ಮಕರ ವೃತ್ತ ನಡುವಿನ ಭೂಭಾಗದಲ್ಲಿ ಸಂಭವಿಸುತ್ತದೆ. ಈ ಕೌತುಕ ಬೇರೆ ಬೇರೆ ದಿನಗಳಂದು ಬೇರೆ ಬೇರೆ ಭೂಪ್ರದೇಶಗಳಲ್ಲಿ ಸಂಭವಿಸುತ್ತದೆ.

‘ಶೂನ್ಯ ನೆರಳಿನ ದಿನದ ಹೆಚ್ಚಿನ ಅಧ್ಯಯನದ ಅನುಕೂಲಕ್ಕೆ ಸಹಾಯವಾಗಲೆಂದು ಅಲೋಕ್ ಮಾಂಡವಗಣೆ ಸಂಸ್ಥೆಯು ‘ಜಿರೋ ಶ್ಯಾಡೋ ಡೇ’ ಎಂಬ ಆ್ಯಪ್ ಅಭಿವೃದ್ಧಿಪಡಿಸಿದ್ದು, ತಮ್ಮ ಮೊಬೈಲ್ ಫೋನ್‍ಗಳಲ್ಲಿ ಇನ್‍ಸ್ಟಾಲ್ ಮಾಡಿಕೊಂಡು ಸಚಿತ್ರ ಅನಿಮೇಶನ್ ಸಹಿತ ಹೆಚ್ಚಿನ ಮಾಹಿತಿ ಪಡೆದುಕೊಳ್ಳಬಹುದು’ ಎಂದು ಭಾರತ ಜ್ಞಾನ ವಿಜ್ಞಾನ ಸಮಿತಿ ಜಿಲ್ಲಾ ಕೋಶಾಧ್ಯಕ್ಷ ಬಿ.ಜಿ.ಗೋಪಾಲಕೃಷ್ಣ ತಿಳಿಸಿದರು.