‘ಗ್ರಾಮವಸ್ತು ಸಂಗ್ರಹಾಲಯ’ ಅನಾವರಣಕ್ಕೆ ಸಿದ್ಧತೆ: 10 ಸಾವಿರ ಜಾನಪದ ಪರಿಕರ ಸಂಗ್ರಹ

ಈವರೆಗೆ 10 ಸಾವಿರ ಗ್ರಾಮ ವಸ್ತುಗಳನ್ನು ಸಂಗ್ರಹಿಸಿರುವ ವಿಶ್ವವಿದ್ಯಾಲಯವು ಕೃಷಿ ಮತ್ತು ನಿತ್ಯದ ಬಳಕೆ ಸಾಮಗ್ರಿಗಳನ್ನು ಅಚ್ಚುಕಟ್ಟಾಗಿ ಜೋಡಿಸಿ, ಪ್ರಾದೇಶಿಕತೆ ಪ್ರತಿಬಿಂಬಿಸುವ ‍ಪ್ರಯತ್ನ ನಡೆಸಿದೆ.

‘ದೇವರ ಆರಾಧನೆ, ಆಲಂಕಾರಿಕ ವಸ್ತುಗಳು, ಗ್ರಾಮೀಣ ಆಟಿಕೆಗಳು, ಕಲೆ, ಮಾಪನ, ವೈದ್ಯಕೀಯ ಹಾಗೂ ಇತರ ಕಸುಬುಗಳಿಗೆ ಬಳಸುವ ವಸ್ತುಗಳನ್ನು ಒಪ್ಪವಾಗಿ ಜೋಡಿಸಿ, ಸಾರ್ವಜನಿಕರ ವೀಕ್ಷಣೆಗೆ ವ್ಯವಸ್ಥೆ ಕಲ್ಪಿಸಲಾಗುವುದು. ಗ್ರಾಮವಸ್ತು ಸಂಗ್ರಹಾಲಯ ಶೀಘ್ರವೇ ಅನಾವರಣವಾಗಲಿದೆ’ ಎಂದು ಜಾನಪದ ವಿಶ್ವವಿದ್ಯಾಲಯದ ಕುಲಪತಿ ಪ್ರೊ.ಟಿ.ಎಂ. ಭಾಸ್ಕರ್‌ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ವಿಧಾನ ಪರಿಷತ್ ಸಭಾಪತಿ ಬಸವರಾಜ ಹೊರಟ್ಟಿ ಅವರ ತಾಯಿ ಬಳಸುತ್ತಿದ್ದ 40 ವರ್ಷಗಳ ಹಿಂದಿನ ವರ್ಣರಂಜಿತ ಕೌದಿ ನೀಡಿದ್ದಾರೆ. ಅದು 10X15 ಅಡಿ ಅಳತೆ ಹೊಂದಿದೆ. ಅಂದವಾದ ಕೈ ಹೊಲಿಗೆ ಕುಸರಿಯಿಂದ ತಯಾರಿಸಲಾಗಿದೆ’ ಎಂದರು.

ಗ್ರಾಮಗಳಲ್ಲಿ ಓಡಾಡಿ ಕೃಷಿಗೆ ಸಂಬಂಧಿಸಿದ ಅಂಗಡ, ಹಗ್ಗ ತಯಾರಿಸುವ ಅಟ್ಟಮ್ಯಾಟಿ, ಬೆಲ್ಲ ತಯಾರಿಸುವ ಆಲೆಮನೆ ಕತ್ತಿ, ಬಿತ್ತನೆಗೆ ಬಳಸುವ ಎಡೆಕುಂಟೆ, ನೆಲಬಾವಿ ನೀರು ಎತ್ತುವ ಏತರಾಟೆ, ಕಪ್ಲಿರಾಟೆ, ಕಂದ್ಲಿ, ದನಗಳ ಮೈ ಸ್ವಚ್ಛತೆಗೆ ಬಳಕೆ ಮಾಡುವ ಕತ್ತಿ, ದನಗಳ ಮೈ ಉಜ್ಜುವ ಕಲ್ಲಿ, ಕುಡಗೋಲು, ಕೂರಿಗೆ ತಾಳ, ನೀರೆತ್ತುವ ಬುಟ್ಟಿ, ಚಕ್ಕಡಿ ಗಾಲಿ, ಚಕ್ಕಡಿ ಗುಂಭ, ಜಂತಿಕುಂಟೆ ಸೇರಿ ಎಲ್ಲವನ್ನೂ ಸಂಗ್ರಹಿಸಿಡಲಾಗಿದೆ.