ಹಾವೇರಿ | ಎಲ್ಲೆಡೆ ಶೌಚಾಲಯ ಕೊರತೆ: ಜನರ ಪರದಾಟ

ಸುಮಾರು 60 ಸಾವಿರ ಜನಸಂಖ್ಯೆ ಹೊಂದಿರುವ ಪಟ್ಟಣದಲ್ಲಿ ಕಾಣಸಿಗುವುದು ಕೇವಲ ಒಂದು ಮೂತ್ರಾಲಯ ಮತ್ತು ಎರಡು ಶೌಚಾಲಯಗಳು ಮಾತ್ರ. ಸಮುದಾಯ ಶೌಚಾಲಯವಿದ್ದರೂ ನಿರ್ವಹಣೆಯಿಲ್ಲದೇ ದುರ್ಗಂಧ ಬೀರುತ್ತಿದೆ. ಮೂತ್ರ ವಿಸರ್ಜನೆಗೆ ಸಾರ್ವಜನಿಕರು ಇಲ್ಲಿಗೆ ಬಂದರೆ ತಲೆ ಸುತ್ತಿ ಬೀಳುವಷ್ಟು ಅನೈರ್ಮಲ್ಯ ವಾತಾವರಣವಿದೆ ಎನ್ನುತ್ತಾರೆ ಮಂತ್ರೋಡಿ ಗ್ರಾಮದ ನಿವಾಸಿ ರಮೇಶ ಅರಗೋಳ.

ಸಾರ್ವಜನಿಕರ ಆರೋಗ್ಯದ ಹಿತಾಸಕ್ತಿ ಮತ್ತು ಪಟ್ಟಣದ ಅಭಿವೃದ್ಧಿಗಾಗಿ ಇರುವ ಪುರಸಭೆ ತನ್ನ ಎಲ್ಲ ಧ್ಯೇಯೋದ್ದೇಶಗಳನ್ನು ಮರೆತು ನಿದ್ರೆಗೆ ಜಾರಿದೆ ಎಂಬುದಕ್ಕೆ ಪುರಸಭೆಯಿಂದ ನಿರ್ಲಕ್ಷ್ಯಗೊಳಗಾಗಿ ದುರ್ಗಂಧ ಬೀರುತ್ತಿರುವ ಮೂತ್ರಾಲಯಗಳೇ ಸಾಕ್ಷಿ.

ಸಾಂಕ್ರಾಮಿಕ ರೋಗಗಳ ಉಗಮ ಸ್ಥಾನ:

‘ಮದ್ಯ ಸೇವಿಸಿದ ಖಾಲಿ ಬಾಟಲಿಗಳು, ಗುಟ್ಕಾ ಪಾಕೆಟ್‌, ಕಸವನ್ನು ಎಸೆಯುವ ತಿಪ್ಪೆ ಗುಂಡಿಗಳಾಗಿವೆ ಈ ಶೌಚಾಲಯಗಳು. ಸಾಂಕ್ರಾಮಿಕ ರೋಗಗಳ ಉಗಮ ಸ್ಥಾನಗಳಾಗಿವೆ. ಈ ಬಗ್ಗೆ ಸಾರ್ವಜನಿಕರಿಂದ ವ್ಯಾಪಕ ದೂರುಗಳು ಬಂದರೂ ಇಲ್ಲಿಯವರೆಗೂ ಆಡಳಿತ ನಡೆಸಿದ ಯಾವುದೇ ಪಕ್ಷದ ಸ್ಥಳೀಯ ಆಡಳಿತ ಮಂಡಳಿಯೂ ಕೂಡಾ ಈ ಬಗ್ಗೆ ಕನಿಷ್ಠ ಸಾರ್ವಜನಿಕ ಹಿತಾಸಕ್ತಿಯನ್ನು ತೋರದಿರುವುದು ವಿಪರ್ಯಾಸವೇ ಸರಿ’ ಎನ್ನುತ್ತಾರೆ ಸ್ಥಳೀಯ ನಿವಾಸಿ ಅರುಣ ತಳ್ಳಿಹಳ್ಳಿ.

ಇನ್ನೂ ಬಡಾವಣೆಗಳ ಪರಿಸ್ಥಿತಿ ಇದಕ್ಕೆ ಹೊರತಾಗಿಲ್ಲ. ಪುರಸಭೆ 2020-21ರಲ್ಲಿ 15ನೇ ಹಣಕಾಸು ಯೋಜನೆಯಲ್ಲಿ ಕಂದಾಯ ಇಲಾಖೆ ಕಾಂಪೌಂಡಿನಲ್ಲಿ, ಇಂದಿರಾ ಸರ್ಕಲ್ ಸಮೀಪ ಮತ್ತು ಮೋತಿ ತಲಾಬ ಕೆರೆ ದಡ ಈ 3 ಸ್ಥಳಗಳಲ್ಲಿ ಸಾರ್ವಜನಿಕ ಶೌಚಾಲಯಗಳು ಇದ್ದರೂ ಬಳಕೆಗೆ ಬರದಿರುವುದು ಮಾತ್ರ ವಿಪರ್ಯಾಸ ಸಂಗತಿ ಎಂದು ಈರಯ್ಯ ಹಿರೇಮಠ ಬೇಸರ ವ್ಯಕ್ತಪಡಿಸಿದರು.

ವಿವಿಧ ಕೆಲಸ ಕಾರ್ಯಗಳಿಗಾಗಿ ಪಟ್ಟಣಕ್ಕೆ ಬರುವ ಸಾರ್ವಜನಿಕರಿಗೆ ಸಾರ್ವಜನಿಕ ಶೌಚಾಲಯ ಇಲ್ಲದಿರುವುದರಿಂದ ಖಾಲಿ ಜಾಗ ಮತ್ತು ವಾಹನಗಳ ಮರೆಯಲ್ಲಿ ಮೂತ್ರ ವಿಸರ್ಜನೆ ಮಾಡುವ ಅನಿವಾರ್ಯತೆ ಎದುರಾಗಿದೆ. ಮಹಿಳೆಯರ ಸ್ಥಿತಿ ಇನ್ನೂ ಕಷ್ಟಕರವಾಗಿದೆ. ಉಪವಿಭಾಗಾಧಿಕಾರಿಗಳ ಕಚೇರಿ ಮತ್ತು ಕಂದಾಯ ಇಲಾಖೆ, ಹಳೇ ಕೋರ್ಟ್‌ ರಸ್ತೆ ಹತ್ತಿರ ಹೆಚ್ಚು ಜನ ಸೇರುತ್ತಾರೆ. ಆದರೆ, ಇಂತಹ ಸ್ಥಳಗಳಲ್ಲಿ ಮೂತ್ರ ವಿಸರ್ಜನೆಗೆ ಯಾವುದೇ ವ್ಯವಸ್ಥೆ ಇಲ್ಲದಿರುವುದರಿಂದ ತೀವ್ರ ಸಮಸ್ಯೆ ಎದುರಾಗಿದೆ.

‌ಮಹಿಳೆಯರು, ವಿದ್ಯಾರ್ಥಿನಿಯರ ಆರೋಗ್ಯ ಮತ್ತು ಸುರಕ್ಷತಾ ದೃಷ್ಟಿಯಿಂದ ಸಮರ್ಪಕ ಸಾವರ್ಜನಿಕ ಶೌಚಾಲಯಗಳು ಅತ್ಯಗತ್ಯ. ಆದರೆ, ಸವಣೂರು ಪಟ್ಟಣಕ್ಕೆ ಬರುವ ಇವರ ಪರಿಸ್ಥಿತಿ ಹೇಳತೀರದಾಗಿದೆ. ಬಯಲು ಶೌಚಾಲಯ ಮುಕ್ತ ಎಂಬ ಸರ್ಕಾರದ ಘೋಷಣೆಗಳು ಕೇವಲ ಕಡತಗಳಿಗೆ ಮಾತ್ರ ಸೀಮಿತವಾಗಿವೆ. ಅನುಷ್ಠಾನಕ್ಕೆ ತರಲು ನಗರ ಸ್ಥಳೀಯ ಸಂಸ್ಥೆಗಳ ನಿರಾಸಕ್ತಿ ತೋರುತ್ತಿವೆ. ಗೌರವ ಮತ್ತು ಘನತೆಯ ಸಂಕೇತವಾಗಿರುವ ಶೌಚಾಲಯಗಳ ನಿರ್ಮಾಣ ಮತ್ತು ಸಮರ್ಪಕ ನಿರ್ವಹಣೆಗೆ ಪುರಸಭೆ ಮುಂದಾಗಬೇಕು ಎಂದು ನಾಗರಿಕರಾದ ಮಂಜುನಾಥ ಉಪ್ಪಾರ ಹಾಗೂ ಬಸವರಾಜ ಗುಮ್ಮನಾಳ ಒತ್ತಾಯಿಸಿದ್ದಾರೆ.

ಏನಂತಾರೆ...?