ಅಫಜಲಪುರ: ದ್ವಿಚಕ್ರ ವಾಹನ-ಬಸ್ ಡಿಕ್ಕಿ; ಇಬ್ಬರ ಸಾವು

ಅಫಜಲಪುರ: ಪಟ್ಟಣದ ಹೊರವಲಯದ ಕಲಬುರಗಿ–ಅಫಜಲಪುರ ರಾಜ್ಯ ಹೆದ್ದಾರಿಯಲ್ಲಿ ಬುಧವಾರ ಮಧ್ಯಾಹ್ನ ದ್ವಿಚಕ್ರ ವಾಹನ ಮತ್ತು ಬಸ್ ನಡುವೆ ಮುಖಾಮುಖಿ ಡಿಕ್ಕಿಯಾಗಿ ತಾಲ್ಲೂಕಿನ ರೇವೂರ (ಕೆ) ಗ್ರಾಮದ ಇಬ್ಬರು ದ್ವಿಚಕ್ರ ವಾಹನ ಸವಾರರು ಮೃತಪಟ್ಟಿದ್ದಾರೆ.

ಕೂಲಿಕಾರ್ಮಿಕರಾದ ಗೋವಿಂದ ಮ್ಯಾಕೇರಿ (32) ಮತ್ತು ಆನಂದ ಪೊಲೀಸ್‌ ಪಾಟೀಲ (30) ಮೃತಪಟ್ಟವರು. ದೀಪಾವಳಿ ಹಬ್ಬದ ಪ್ರಯುಕ್ತ ಅಫಜಲಪುರದಲ್ಲಿ ಬಟ್ಟೆ ಖರೀದಿಸಿ, ಗ್ರಾಮಕ್ಕೆ ಮರಳುತ್ತಿದ್ದ ವೇಳೆ ಈ ದುರ್ಘಟನೆ ಸಂಭವಿಸಿದೆ.

ಸ್ಥಳಕ್ಕೆ ಪಿಎಸ್ಐ ವಿಶ್ವನಾಥ ಮುದರೆಡ್ಡಿ ಭೇಟಿ ನೀಡಿ, ಪರಿಶಿಲಿಸಿದರು. ಈ ಸಂಬಂಧ ಅಫಜಲಪುರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.