ಸೋಮವಾರ, ಅಕ್ಟೋಬರ್ 19, 2020
25 °C
ಶಹೀದ್ 114ನೇ ಜನ್ಮದಿನಾಚರಣೆಯಲ್ಲಿ ಸಾಹಿತಿ ಕಾಶಿನಾಥ ಅಂಬಲಗೆ ಆಶಯ

ಭಗತ್ ಕಂಡ ಸಮಾಜವಾದಿ ಕನಸು ನನಸಾಗಲಿ: ಸಾಹಿತಿ ಕಾಶಿನಾಥ ಅಂಬಲಗೆ ಆಶಯ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಕಲಬುರ್ಗಿ: ಶೋಷಣೆ ಇಲ್ಲದ ಸಮಾಜವನ್ನು ಭಗತ್ ಸಿಂಗ್ ಹಂಬಲಿಸಿದ್ದರು. ಅದನ್ನು ನನಸು ಮಾಡುವ ಜವಾಬ್ದಾರಿ ಇಂದಿನ ಯುವಪೀಳಿಗೆಯ ಮೇಲಿದೆ ಎಂದು ಸಾಹಿತಿ ಪ್ರೊ.ಕಾಶಿನಾಥ ಅಂಬಲಗೆ ಅಭಿಪ್ರಾಯಪಟ್ಟರು.

ನಗರದ ದಕ್ಷಿಣ ಭಾರತ ಹಿಂದಿ ಪ್ರಚಾರ ಸಭಾದಲ್ಲಿ ಶುಕ್ರವಾರ ಎಐಡಿಎಸ್‌ಓ, ಎಐಡಿವೈಓ ಹಾಗೂ ಎಐಎಂಎಸ್‌ಎಸ್‌ ಸಂಘಟನೆಗಳು ಜಂಟಿಯಾಗಿ ಆಯೋಜಿಸಿದ್ದ ಶಹೀದ್ ಭಗತ್ ಸಿಂಗ್ ಅವರ ಜನ್ಮದಿನಾಚರಣೆ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

ಭಗತ್‍ ಸಿಂಗ್‍ ಕ್ರಾಂತಿಯ ಕಿಡಿಯಾಗಿದ್ದು, ಅವರ ಕುಟುಂಬವೇ ಒಂದು ಕ್ರಾಂತಿಕಾರಿ ಕುಟುಂಬವಾಗಿತ್ತು. ಎಳೆಯ ವಯಸ್ಸಿನಲ್ಲಿಯೇ ತಂದೆ ಹಾಗೂ ಚಿಕ್ಕಪ್ಪಂದಿರಿದ್ದ ಸ್ಪೂರ್ತಿ ಪಡೆದ ಭಗತ್‍ಸಿಂಗ್‍ರಿಗೆ ಸ್ವತಂತ್ರ ಭಾರತದ ಕನಸು ಚಿಗುರೊಡೆಯಿತು. ಜಲಿಯನ್ ವಾಲಾಬಾಗ್ ಘಟನೆ ಎಳೆಯ ಭಗತ್‍ ಮನಸ್ಸಿನ ಮೇಲೆ ತೀವ್ರ ಪರಿಣಾಮವನ್ನು ಬೀರಿತು. ಜ್ಞಾನದ ಹಸಿವು ಅಪಾರವಾಗಿತ್ತು. ಆದ್ದರಿಂದಲೇ ಅವರು ಭಾರತದ ಪರಿಸ್ಥಿತಿಯನ್ನು ಸರಿಯಾಗಿ ಅರ್ಥೈಸಿಕೊಂಡು ಪರಕೀಯರು ಹೋದ ಮೇಲೆ ನಮ್ಮವರೇ ನಮ್ಮವರನ್ನು ತುಳಿಯುವ ದಿನಗಳು ಬರಬಾರದೆಂದು ಸಮಾಜವಾದಿ ಭಾರತದ ಕನಸನ್ನು ಕಂಡು, ಹೋರಾಟಗಳನ್ನು ಕೊನೆಯ ಉಸಿರಿರುವರೆಗೂ ಮಾಡಿದರು ಎಂದು ಹೇಳಿದರು. 

ಎಚ್‌ಕೆಇ ಸೊಸೈಟಿ ಆಡಳಿತ ಮಂಡಳಿ ಸದಸ್ಯ ಪ್ರೊ. ಸಂಜಯ ಮಾಕಲ್‍ ಮಾತನಾಡಿ, ಸಮಾಜದಲ್ಲಿ ಜನರು ಹಿಂದೆಂದಿಗಿಂತಲೂ ಅತ್ಯಂತ ಶೋಚನೀಯ ಪರಿಸ್ಥಿತಿಯಲ್ಲಿದ್ದಾರೆ. ಅಸಮಾನತೆ, ನಿರುದ್ಯೋಗ, ಬಡತನ, ಜಾತಿ–ಧರ್ಮಗಳ ತಿಕ್ಕಾಟಗಳು ಮಹಿಳೆಯರ ಮೇಲಿನ ದೌರ್ಜನ್ಯದಂತಹ ಹಲವಾರು ಪಿಡುಗುಗಳಿಂದ ತೀವ್ರವಾದ ಸಂಕಷ್ಟದಲ್ಲಿದ್ದಾರೆ. ಈ ಎಲ್ಲಾ ಪ್ರಶ್ನೆಗಳಿಗೆ ಭಗತ್‍ಸಿಂಗ್ ಉತ್ತರವಾದ ಸಮಾನತೆಯ ಸಮಾಜಕ್ಕಾಗಿ ನಾವೆಲ್ಲರೂ ದುಡಿದಾಗ ಮಾತ್ರ ಭಗತ್‍ಸಿಂಗ್‍ರಿಗೆ ನಿಜವಾಗಿ ಗೌರವ ಅರ್ಪಿಸಿದಂತಾಗುತ್ತದೆ.

ಕಾರ್ಮಿಕ ಮುಖಂಡ ಎಸ್.ಎಂ. ಶರ್ಮಾ ಮಾತನಾಡಿ, ಭಗತ್‍ ಸಿಂಗ್‍ರಿಗೆ ಸ್ವಾತಂತ್ರ್ಯ ಸಂಗ್ರಾಮದ ಹೋರಾಟದಲ್ಲಿ ಸ್ಪಷ್ಟವಾಗಿ ವೈಚಾರಿಕವಾದ ನಿಲುವಿತ್ತು. ಅಂದಿನ ಕ್ರಾಂತಿಕಾರಿಗಳ ಮೇಲೆ ರಷ್ಯನ್ ಸಮಾಜವಾದಿ ಮಹಾನ್ ಕ್ರಾಂತಿಯ ಪ್ರಭಾವವಿತ್ತು. ಆದ್ದರಿಂದಲೇ ಅವರು ‘ಸ್ವಾತಂತ್ರ್ಯ ಪಡೆಯುವುದು ನಮ್ಮ ಮೊದಲ ಹೆಜ್ಜೆ; ನಮ್ಮ ಅಂತಿಮ ಗುರಿಯಿರುವುದು ದುಡಿಯುವ ಜನತೆಯ ಅಧಿಕಾರವಿರುವ ಸಮಾಜದ ನಿರ್ಮಾಣ’ ಎಂದು ಹೇಳುತ್ತಿದ್ದರು. ಸಮಾಜವನ್ನು ಒಡೆದಾಳುತ್ತಿರುವ ಇಂದಿನ ಪ್ರಭುತ್ವದ ವಿರುದ್ಧ ಸಂಘಟಿತವಾಗಿ ಹೋರಾಡುವುದು ಅತ್ಯವಶ್ಯಕ ಎಂದು ಹೇಳಿದರು.

ಎಐಡಿವೈಓ ಯುವಜನ ಸಂಘಟನೆಯ ಜಿಲ್ಲಾ ಕಾರ್ಯದರ್ಶಿ ಜಗನ್ನಾಥ ಎಸ್.ಎಚ್, ಎಐಎಂಎಸ್‍ಎಸ್ ಮಹಿಳಾ ಸಂಘಟನೆಯ ಜಿಲ್ಲಾ ಘಟಕದ ಅಧ್ಯಕ್ಷೆ ಗುಂಡಮ್ಮ ಮಡಿವಾಳ, ಎಐಡಿಎಸ್‍ಓ ವಿದ್ಯಾರ್ಥಿ ಸಂಘಟನೆಯ ಜಿಲ್ಲಾ ಕಾರ್ಯದರ್ಶಿ ಈರಣ್ಣ ಇಸಬಾ, ವಿ.ಜಿ. ದೇಸಾಯಿ, ಮಹೇಶ ಎಸ್.ಬಿ, ಸಂತೋಷ ಹಿರವೆ, ಹಣಮಂತ ಎಸ್.ಎಚ್, ಅಶ್ವಿನಿ, ವಿಶ್ವನಾಥ ಭೀಮಳ್ಳಿ, ಗೌರಮ್ಮ, ಮಲ್ಲಿನಾಥ ಸಿಂಘೆ, ಸ್ನೇಹಾ ಕಟ್ಟಿಮನಿ, ಮಲ್ಲಿನಾಥ ಹುಂಡೇಕಲ್ ಇದ್ದರು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.