ಕಲಬುರ್ಗಿ: ಹಣ್ಣುಗಳ ದರದಲ್ಲಿ ಭಾರಿ ಇಳಿಕೆ

ಎರಡು–ಮೂರು ವಾರಗಳಿಂದ ₹80ರಿಂದ ₹100ರ ಅಸುಪಾಸಿನಲ್ಲೇ ಇದ್ದ ತರಕಾರಿಗಳ ದರದಲ್ಲಿ ಈ ವಾರವೂ ಕೊಂಚ ಇಳಿಕೆ ಕಂಡಿದೆ.

ಟೊಮೆಟೊ, ಈರುಳ್ಳಿ, ನುಗ್ಗೆಕಾಯಿ, ಸವತೆಕಾಯಿ ತರಕಾರಿಗಳ ದರ ಕೆ.ಜಿಗೆ ₹10ರಿಂದ ₹20 ಕಡಿಮೆ ಆಗಿದೆ. ಹಬ್ಬದ ದಿನಗಳಲ್ಲಿ ಇವುಗಳ ದರದಲ್ಲಿ ಭಾರಿ ಏರಿಕೆಯಾಗಿದ್ದರಿಂದ ಕಂಗಾಲಾಗಿದ್ದ ಗ್ರಾಹಕರು ಇದೀಗ ಕೊಂಚ ನಿರಾಳ ಆಗಿದ್ದಾರೆ.

ನುಗ್ಗೆಕಾಯಿ, ಬೆಂಡೆಕಾಯಿ ತರಕಾರಿಗಳು ಈ ವಾರ ₹20 ದರ ಏರಿಸಿಕೊಂಡು ಕ್ರಮವಾಗಿ ಕೆ.ಜಿಗೆ ₹120, ₹60 ರಂತೆ ಮಾರಾಟ ಆಗುತ್ತಿವೆ.

ಬೆಳ್ಳುಳ್ಳಿ ಕೆ.ಜಿಗೆ ₹160 ಇದೆ. ₹20ಕ್ಕೆ ಒಂದು ಕುಂಬಳಕಾಯಿ ಮಾರಾಟ ಆಗುತ್ತಿವೆ. ಹುಣಸೆಹಣ್ಣು ಕೆ.ಜಿ ದರ ₹200 ಇದೆ. ನಿಂಬೆಹಣ್ಣುಗಳ ಬೆಲೆ ಭಾರಿ ಇಳಿಕೆ ಕಂಡಿದೆ. ₹10ಕ್ಕೆ 3ರಿಂದ 4 ಮಾರಲಾಗುತ್ತಿದ್ದ ನಿಂಬೆಹಣ್ಣುಗಳನ್ನು ಇದೀಗ 10–12 ಮಾರಲಾಗುತ್ತಿದೆ.

₹60ಕ್ಕೆ 100 ಅಂಬಾಳಿ ಎಲೆಗಳು ಮಾರಾಟ ಆಗುತ್ತಿವೆ. ಶುಂಠಿ ಕೆ.ಜಿ ದರ ₹80 ಇದೆ. ಬೆಳ್ಳುಳ್ಳಿ ಕೆ.ಜಿ ದರ 160 ಇದೆ.

ಹೂವುಗಳ ದರ:

ಕಳೆದ ವಾರ ಒಂದು ಮೊಳಕ್ಕೆ ₹10 ಇದ್ದ ಮಲ್ಲಿಗೆ ಹೂವಿನ ದರ ಈ ವಾರ ₹20 ಆಗಿದೆ. ಸಂಪಿಗೆ ಹಾಗೂ ಗುಲಾಬಿ ಹೂವುಗಳು 50 ಗ್ರಾಂಗೆ ₹20 ರಂತೆ ಮಾರಾಟ ಆಗುತ್ತಿವೆ. ಚಂಡು ಹೂವು ಈ ವಾರ ₹20 ದರ ಏರಿಸಿಕೊಂಡಿದ್ದು, ಕೆ.ಜಿ ದರ ₹80 ಇದೆ. ಸೇವಂತಿಗೆ ಹೂವಿನ ದರ ಕೆ.ಜಿಗೆ ₹380 ಇದೆ.

ಮಾರುಕಟ್ಟೆಯಲ್ಲಿ ಕಾಲಿಡಲಾಗದ ಸ್ಥಿತಿ:

ಶುಕ್ರವಾರ ರಾತ್ರಿ ಸುರಿದ ತುಂತುರು ಮಳೆಗೆ ನಗರದ ಸೂಪರ್ ಮಾರುಕಟ್ಟೆಯಲ್ಲಿ ಕೆಸರುಮಯ ವಾತಾವರಣ ಸೃಷ್ಟಿಯಾಗಿದೆ. ಎಲ್ಲೆಂದರಲ್ಲಿ ಕೆಸರು ತುಂಬಿಕೊಂಡಿದ್ದು ಗ್ರಾಹಕರು ತರಕಾರಿ, ಹೂವು, ಹಣ್ಣು ಖರೀದಿಗೆ ಪರದಾಡುವಂತಾಗಿದೆ. ನಿಲ್ಲಲು ಎಲ್ಲಿಯೂ ಸರಿಯಾದ ಜಾಗ ಇರಲಿಲ್ಲ. ಜನದಟ್ಟಣೆ ಹಾಗೂ ಚಪ್ಪಲಿಗಂಟಿದ ಕೆಸರಿನ ನಡುವೆಯೇ ಗ್ರಾಹಕರು ತರಕಾರಿ ಖರೀದಿಸುತ್ತಿದ್ದರು.

ಸೊಪ್ಪುಗಳ ದರ ₹5:

ಕಳೆದ ವಾರ ಸೊಪ್ಪುಗಳ ದರದಲ್ಲಿ ವ್ಯತ್ಯಾಸ ಇತ್ತು. ಕೆಲವು ಸೊಪ್ಪುಗಳ ದರ ದುಬಾರಿ ಆಗಿದ್ದರೆ, ಇನ್ನೂ ಕೆಲವು ಸೊಪ್ಪುಗಳ ದರ ಕಡಿಮೆ ಇತ್ತು. ಆದರೆ, ಈ ವಾರ ಮಾರುಕಟ್ಟೆಯಲ್ಲಿ ಬಹುತೇಕ ಎಲ್ಲಾ ಸೊಪ್ಪುಗಳ ದರವೂ ಸಮವಾಗಿದೆ. ಕೊತ್ತಂಬರಿ, ಪಾಲಕ್, ಪುಂಡಿಪಲ್ಯ, ಸಬ್ಬಸಗಿ, ಹುಣಸಿನಕಾಯಿ ಪಲ್ಯ, ಪುದೀನಾ, ರಾಜಗಿರಿ ಸೊಪ್ಪುಗಳ ದರ ಸಿವುಡಿಗೆ ₹5 ಇದೆ.