ಬುಧವಾರ, ಮೇ 27, 2020
27 °C
ಕಾಳಗಿ ಸಿ.ಎಚ್.ಸಿ: ಕರ್ತವ್ಯ ಒಂದು ಕಡೆಗೆ, ಸಂಬಳ ಇನ್ನೊಂದು ಕಡೆಗೆ!

ಕಾಳಗಿ: ವೆಂಟಿಲೇಟರ್ ಇಲ್ಲದ ಐಸೋಲೇಷನ್ ವಾರ್ಡ್

ಗುಂಡಪ್ಪ ಕರೆಮನೋರ Updated:

ಅಕ್ಷರ ಗಾತ್ರ : | |

Prajavani

ಕಾಳಗಿ: ಕಲಬುರ್ಗಿಯಲ್ಲಿ ಕೊರೊನಾ ಸೋಂಕು ಕಾಣಿಸಿದ ಹಿನ್ನೆಲೆಯಲ್ಲಿ ಪಟ್ಟಣದ ಸಮುದಾಯ ಆರೋಗ್ಯ ಕೇಂದ್ರದಲ್ಲಿ ಮುಂಜಾಗ್ರತಾ ಕ್ರಮವಾಗಿ ಎರಡು ಹಾಸಿಗೆಯುಳ್ಳ ಐಸೋಲೇಷನ್ ವಾರ್ಡ್ ಸ್ಥಾಪಿಸಲಾಗಿದೆ. ಆದರೆ ಈ ವಾರ್ಡ್ ವೆಂಟಿಲೇಟರ್ ಇಲ್ಲದೆ ಕೇವಲ ಆಕ್ಸಿಜನ್ ಸಿಲಿಂಡರ್‌ಗೆ ಸೀಮಿತವಾಗಿದೆ.

ಕಾಳಗಿ ತಾಲ್ಲೂಕಿನಲ್ಲೇ ಅತ್ಯಂತ ದೊಡ್ಡ ಆಸ್ಪತ್ರೆ ಎನ್ನಲಾಗುವ ಇಲ್ಲಿ ಸುಸಜ್ಜಿತ ಕಟ್ಟಡದೊಂದಿಗೆ 30 ಹಾಸಿಗೆಗಳಿವೆ. 4 ಕಾಯಂ ಮತ್ತು 1 ಆಯುಷ್ (ನಿಯೋಜನೆ) ವೈದ್ಯರು ಮತ್ತು ಇತರ ವೈದ್ಯಕೀಯ ಸಿಬ್ಬಂದಿ ಇದ್ದಾರೆ.

ಕೊರೊನಾ ಹಾವಳಿ ಮುನ್ನ ಪ್ರತಿದಿನ ಕನಿಷ್ಠ 200 ಹೊರರೋಗಿಗಳು ಆರೋಗ್ಯ ತಪಾಸಣೆ ಮಾಡಿಸಿಕೊಳ್ಳುತ್ತಿದ್ದರು. ಲಾಕ್ ಡೌನ್ ಪರಿಣಾಮ ಈಗ ಆ ಸಂಖ್ಯೆ ಕಡಿಮೆಯಾಗಿದೆ. ಇನ್ನು ತಾಲ್ಲೂಕಿಗೆ ಹಿಂದಿರುಗಿದ 900ಕ್ಕೂ ಹೆಚ್ಚು ವಲಸೆಗಾರರ ಆರೋಗ್ಯ ಸ್ಥಿರವಾಗಿದ್ದರಿಂದ ಅವರು ಸಹ ಈ ಕಡೆ ಸುಳಿಯುತ್ತಿಲ್ಲ. ಹೀಗಾಗಿ ಏನಿದ್ದರೂ ಹೆರಿಗೆ ಮತ್ತು ವಾಂತಿಭೇದಿ ಪ್ರಕರಣಗಳಷ್ಟೇ ಆಸ್ಪತ್ರೆಗೆ ಬರುತ್ತಿದ್ದು, ಅವೂ ವಿರಳವಾಗಿವೆ. ಹಾಗಾಗಿ ಈ ಆರೋಗ್ಯ ಕೇಂದ್ರ ಕೆಲ ದಿನಗಳಿಂದ ರೋಗಿಗಳಿಲ್ಲದೆ ಭಣಗುಟ್ಟುತ್ತಿದೆ.

ಸೌಲಭ್ಯ ಏನೇನಿದೆ: ಆಸ್ಪತ್ರೆಯಲ್ಲಿ ಹೆರಿಗೆ, ಕುಟುಂಬ ಕಲ್ಯಾಣ ಶಸ್ತ್ರಚಿಕಿತ್ಸೆ, ನವಜಾತ ಶಿಶು ಆರೈಕೆ, ಎಕ್ಸ್-ರೇ, ಜನರೇಟರ್, ಶುದ್ಧ ಕುಡಿಯುವ ನೀರು, ವೈದ್ಯಕೀಯ ಸಾಮಗ್ರಿ, 108 ಆಂಬುಲೆನ್ಸ್ ಸೇವೆ, ನೇತ್ರ ತಪಾಸಣೆ, ಒಳ ಮತ್ತು ಹೊರ ರೋಗಿಗಳ ಚಿಕಿತ್ಸಾ ವಿಭಾಗ ಇವೆ.

ಹೇಳೋರು ಕೇಳೋರು ಇಲ್ಲವೇ: ಕ್ಷೇತ್ರ ಆರೋಗ್ಯ ಶಿಕ್ಷಣಾಧಿಕಾರಿ ಹುದ್ದೆ ಕೇವಲ ಒಂದು ಇದೆ. ಔಷಧ ತಜ್ಞರ 2 ಹುದ್ದೆಗಳಲ್ಲಿ ಒಂದು ಖಾಲಿ ಇದೆ. ಹೀಗಿರುವಾಗ  ಕ್ಷೇತ್ರ ಆರೋಗ್ಯ ಶಿಕ್ಷಣಾಧಿಕಾರಿ ಮತ್ತು ಔಷಧ ತಜ್ಞರು ಬೇರೆಡೆಗೆ ನಿಯೋಜನೆ ಆಗಿದ್ದು, ಇಲ್ಲಿ ಯಾರೂ ಇಲ್ಲದಂತಾಗಿದೆ.

2007ರ ಮುಂಚೆ ಈ ಪ್ರದೇಶದಲ್ಲಿ ಇದೊಂದೇ ಆಸ್ಪತ್ರೆ ಇತ್ತು. ಇಲ್ಲಿ ಸಾಕಷ್ಟು ವೈದ್ಯಕೀಯ ಸಿಬ್ಬಂದಿ ಇದ್ದರು. ಬಳಿಕ ಸುತ್ತಲಿನ ಹಲವೆಡೆ ಪ್ರಾಥಮಿಕ ಆರೋಗ್ಯ ಕೇಂದ್ರಗಳು ಸ್ಥಾಪನೆಯಾಗಿವೆ. ಆಗ ಇಲ್ಲಿರುವ ಕಿರಿಯ ಆರೋಗ್ಯ ಸಹಾಯಕ ಮತ್ತು ಸಹಾಯಕಿಯರನ್ನು ಆ ಎಲ್ಲ ಆರೋಗ್ಯ ಕೇಂದ್ರಗಳಿಗೆ ವರ್ಗಾವಣೆ ಮಾಡಲಾಗಿದೆ. ಆದರೆ ಸಂಬಳ ಬಟವಾಡೆಗೆ ಸರ್ಕಾರ ಇದುವರೆಗೂ ಕ್ರಮ ಕೈಗೊಳ್ಳದ ಕಾರಣ ಅವರೆಲ್ಲ ಎಲ್ಲೇ ಕರ್ತವ್ಯ ನಿರ್ವಹಿಸಿದರೂ ಸಂಬಳ ಪಡೆಯಲು ಇಲ್ಲಿಗೆ ಬರುತ್ತಾರೆ.

ಇನ್ನು ಏನಾಗಬೇಕು: ವಾಹನಗಳಿಗೆ ಪಾರ್ಕಿಂಗ್, ಹಂದಿ ಓಡಾಟಕ್ಕೆ ನಿಯಂತ್ರಣ, ಕಿರು ನೀರು ಸರಬರಾಜು, ಇಸಿಜಿ ವ್ಯವಸ್ಥೆ ಆಗಬೇಕು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು