ಕಲಬುರಗಿ: ‘ಹೈದರಾಬಾದ್ ಕರ್ನಾಟಕದಿಂದ ನಿಜಾಮರು ಹೊರಟು ಹೋದ ಬಳಿಕ ಕುಟುಂಬ ರಾಜಕಾರಣ ಮಾಡುವ ಮೂಲಕ ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ಹೊಸ ನಿಜಾಮರು ಆಡಳಿತ ನಡೆಸುತ್ತಿದ್ದಾರೆ’ ಎಂದು ಬಿಜೆಪಿ ರಾಜ್ಯ ಘಟಕದ ಉಪಾಧ್ಯಕ್ಷ ಎನ್‌.ಮಹೇಶ್ ಅವರು ಪರೋಕ್ಷವಾಗಿ ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಕುಟುಂಬವನ್ನು ಟೀಕಿಸಿದರು.
ನಗರದಲ್ಲಿ ಬುಧವಾರ ನಡೆದ ‘ಬಲವರ್ಧನೆಗಾಗಿ ಭೀಮ ಸಮಾವೇಶ’ದಲ್ಲಿ ಅವರು ಮಾತನಾಡಿದರು.
‘ನಾನಾದ ಮೇಲೆ ನನ್ನ ಮಗ, ನನ್ನ ಮಗನ ಬಳಿಕ ಮೊಮ್ಮಕ್ಕಳು, ಒಂದು ವೇಳೆ ಮೊಮ್ಮಕ್ಕಳು ಬರಲಾಗದಿದ್ದರೆ ಅಳಿಯ ರಾಜಕೀಯಕ್ಕೆ ಬರಬೇಕು ಎಂಬ ಕುಟುಂಬ ರಾಜಕೀಯದ ಪ್ರಾಬಲ್ಯವನ್ನು ಕಿತ್ತೆಸೆಯಬೇಕು. ಜಿಲ್ಲೆಯಲ್ಲಿ ದೂರದೃಷ್ಟಿಯುಳ್ಳ ನಾಯಕರನ್ನು ಹುಟ್ಟು ಹಾಕಬೇಕು’ ಎಂದು ಪ್ರತಿಪಾದಿಸಿದರು.
‘ಅಪ್ಪನ ಬಳಿಕ ಮಗ, ಮಗನ ನಂತರ ಮೊಮ್ಮಗ ಗೆದ್ದು ಬರಲು ಕಲಬುರಗಿ ಏನು ನಿಮ್ಮ ಕುಟುಂಬದ ಆಸ್ತಿಯಾ? ರಾಜೀನಾಮೆ ಕೊಟ್ಟು ಹೊರ ಬಂದು ಬೇರೆಯವರಿಗೆ ಅವಕಾಶ ಮಾಡಿಕೊಡಿ. ಜಿಲ್ಲೆಯಲ್ಲಿ ಬೇರೆಯವರಿಗೆ ಸಾಮರ್ಥ್ಯ ಇಲ್ಲವೇ’ ಎಂದು ಪ್ರಶ್ನಿಸಿದರು.
