‘ಸ್ಮಾರ್ಟ್‌ ಸಿಟಿಜನ್‌’ ಗಳ ಸದ್ದಿಲ್ಲದ ಸೇವೆ

ಸ್ಮಾರ್ಟ್‌ ಸಿಟಿ ಕ್ಲಬ್‌’ 2020ರಲ್ಲಿ ನೋಂದಣಿಯಾಗಿದೆ. ಇದೇ ಹೆಸರಿನಲ್ಲಿ ಒಂದು ವಾಟ್ಸ್‌ಆ್ಯಪ್‌ ಬಳಗ ಮಾಡಿಕೊಂಡಿದ್ದು ನಗರದ ಜನಸಾಮಾನ್ಯರೂ ಸೇರಿದಂತೆ ಕ್ಲಬ್‌ನ ಸದಸ್ಯರಿದ್ದಾರೆ.

ನಗರದ ವಿವಿಧ ಬಡಾವಣೆಗಳ ಜನರು ತಮ್ಮ ಪ್ರದೇಶ ಸೇರಿದಂತೆ ನಗರದಲ್ಲಿ ಮೂಲಸೌಲಭ್ಯಗಳ ಸಮಸ್ಯೆ ಇದ್ದರೆ ಅದರ ಫೋಟೋವನ್ನು ಚಿಕ್ಕ ಮಾಹಿತಿ, ಸ್ಥಳದ ಗುರುತಿನ ಸಮೇತ (ಗೂಗಲ್ ಮ್ಯಾಪ್) ಬಳಗದಲ್ಲಿ ಹಾಕುತ್ತಾರೆ. ಹೀಗೆ ಬಂದ ಮಾಹಿತಿ ಮತ್ತು ಫೋಟೋವನ್ನು ಬಳಗದಲ್ಲಿರುವ ಅಧಿಕಾರಿಗಳು ತಮ್ಮ ಸಿಬ್ಬಂದಿಗೆ ಕಳಿಸಿ ಸಮಸ್ಯೆ ಪರಿಹಾರಕ್ಕೆ ಮುಂದಾಗುತ್ತಾರೆ.

‘ನಾವು 2018ರಿಂದಲೇ ಸೇವಾಕಾರ್ಯದಲ್ಲಿ ನಿರತರಾಗಿದ್ದೇವು. ಕ್ಲಬ್‌ಗೆ ಪಿ.ಎಸ್‌.ಮಹಾಗಾಂವಕರ್‌ ಅಧ್ಯಕ್ಷರಾಗಿದ್ದು ಸದ್ಯ 40 ಸ್ವಯಂ ಸೇವಕರಿದ್ದೇವೆ. ನೋಂದಾಯಿತ ಎನ್‌ಜಿಒ ಸೇರಿಕೊಳ್ಳಲು ₹ 500 ಸದಸ್ಯತ್ವ ಶುಲ್ಕ ನಿಗದಿ ಮಾಡಿದ್ದೇವೆ. ಎಲ್ಲರೂ ಚುರುಕಿನಿಂದ ಸೇವಾ ಕಾರ್ಯದಲ್ಲಿ ತೊಡಗಿಸಿಕೊಳ್ಳುತ್ತಾರೆ. ಕ್ಲಬ್‌ಗಾಗಿ ಸಮಯ ಕೊಡುವವರನ್ನೇ ಸದಸ್ಯರನ್ನಾಗಿ ಮಾಡಿಕೊಳ್ಳುತ್ತಿದ್ದೇವೆ. ವ್ಯಾಟ್ಸ್‌ಆ್ಯಪ್‌ ಬಳಗದಲ್ಲಿ ಭರ್ತಿಯಾಗಿದ್ದು ‘ನನ್ನನ್ನು ಬಳಕ್ಕೆ ಸೇರಿಸಿಕೊಳ್ಳಿ’ ಎನ್ನುವ ಸಂದೇಶಗಳು ದಿನವೂ ನನಗೆ ಬರುತ್ತವೆ. ಯಾರು ಸಕ್ರಿಯವಾಗಿಲ್ಲವೋ ಅಂಥವರನ್ನು ತೆಗೆದು ಬೇರೆಯವರನ್ನು ಸೇರಿಸುತ್ತೇವೆ. ಇಲ್ಲದಿದ್ದರೆ ಮತ್ತೊಬ್ಬರಿಗೆ ಅವಕಾಶ ಮಾಡಿಕೊಡಿ ಎಂದು ಮನವಿ ಮಾಡುತ್ತೇವೆ’ ಎನ್ನುತ್ತಾರೆ ಕ್ಲಬ್ ಸಂಚಾಲಕಿ ನಳಿನಿ ಮಹಾಗಾಂವಕರ್‌.

ಬಳಗಲ್ಲಿದ್ದಾರೆ ಆಯುಕ್ತರು ಅಧಿಕಾರಿಗಳು ‘ಸ್ಮಾರ್ಟ್‌ ಸಿಟಿ ಕ್ಲಬ್‌’ ವ್ಯಾಟ್ಸ್‌ಅಪ್‌ ಬಳಗದಲ್ಲಿ ಅದರ ಸ್ವಯಂಸೇವರಷ್ಟೇ ಅಲ್ಲದೆ ನಗರಸಭೆ ಆಯುಕ್ತ ಭುವನೇಶ ಪಾಟೀಲ ಇದ್ದಾರೆ. ಜೆಸ್ಕಾಂ ಜಲಮಂಡಳಿ ಲೋಕೋಪಯೋಗಿ ಸೇರಿದಂತೆ ವಿವಿಧ ಇಲಾಖೆ ಅಧಿಕಾರಿಗಳು ಇದ್ದಾರೆ. ‘ನಮ್ಮ ವ್ಯಾಟ್ಸ್‌ಅಪ್‌ ಬಳಗ ಸೇರುವಂತೆ ಆಯುಕ್ತರಿಗೆ ಮನವಿ ಮಾಡಿದಾಗ ಖುಷಿಯಿಂದಲೇ ಒಪ್ಪಿಕೊಂಡರು. ಅಧಿಕಾರಿಗಳು ಸಹ ತ್ವರಿತವಾಗಿ ಸ್ಪಂದಿಸುತ್ತಾರೆ. ದೊಡ್ಡ ಕೆಲಸಗಿಳಿದ್ದರೆ ಆಡಳಿತ ಮತ್ತು ಹಣಕಾಸಿನ ಒಪ್ಪಿಗೆ ಸೇರಿ ಇತರ ತೊಡಕುಗಳಿರುವುದರಿಂದ ಅವು ಸಾಧ್ಯವಾಗುವುದಿಲ್ಲ. ಆದರೆ ತ್ಯಾಜ್ಯ ವಿಲೇವಾರಿ ರಸ್ತೆಯಲ್ಲಿನ ತಗ್ಗು ಮುಚ್ಚಿಸುವುದು ಬೀದಿ ದೀಪ ನೀರು ಸಮಸ್ಯೆ ಸೇರಿ ಸಣ್ಣ ಕೆಲಸಗಳನ್ನು ಮಾಡಿ ಅನುಕೂಲ ಮಾಡಿಕೊಡಲು ಅಧಿಕಾರಿಗಳು ನೆರವಾಗುತ್ತಿದ್ದಾರೆ’ ಎಂದು ತಮ್ಮ ಬಳಗ ಕಾರ್ಯದ ಬಗ್ಗೆ ಸಂತಸ ವ್ಯಕ್ತಪಡಿಸುತ್ತಾರೆ ನಳಿನಿ.