ಬಾಲಕಿ ಮೇಲೆ ಐವರು ಬಾಲಕರಿಂದ ಸಾಮೂಹಿಕ ಅತ್ಯಾಚಾರ

ಕಲಬುರಗಿ: ನಗರದ ಕಾಲೊನಿಯೊಂದರಲ್ಲಿ 13 ವರ್ಷದ ಬಾಲಕಿಯ ಮೇಲೆ ಐವರು ಬಾಲಕರು ಸಾಮೂಹಿಕ ಅತ್ಯಾಚಾರ ಎಸಗಿದ್ದಾರೆ. ಘಟನೆ ಜನವರಿ 5ರಂದು ನಡೆದಿದ್ದು, ಬಾಲಕಿಯ ಪಾಲಕರು ಸೋಮವಾರ ದೂರು ದಾಖಲಿಸಿದ್ದಾರೆ.

ಬಾಲಕಿ ಬುದ್ಧಿಮಾಂದ್ಯಳಾಗಿದ್ದರಿಂದ ವಿಷಯ ತಡವಾಗಿ ಗೊತ್ತಾಗಿದೆ. ಆಕೆಯನ್ನು ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಲಾಗಿದೆ. ತಮ್ಮ ಮನೆಯ ಹತ್ತಿರದಲ್ಲೇ ಇರುವ 15 ರಿಂದ 16 ವರ್ಷದ ಹುಡುಗರು ಕೃತ್ಯ ಎಸಗಿದ್ದಾರೆ ಎಂದು ಸಂತ್ರಸ್ತೆಯ ಪಾಲಕರು ಗುಲಬರ್ಗಾ ವಿಶ್ವವಿದ್ಯಾಲಯ ಠಾಣೆಗೆ ನೀಡಿದ ದೂರಿನಲ್ಲಿ ತಿಳಿಸಿದ್ದಾರೆ.

‘ಕೃತ್ಯ ಎಸಗಿದ ಬಾಲಕರೆಲ್ಲರೂ ಬಾಲಕಿಯ ಪಾಲಕರಿಗೆ ಪರಿಚಯಸ್ಥರು. ಹೀಗಾಗಿ, ಅವರನ್ನು ಸುಲಭವಾಗಿ ಪತ್ತೆ ಮಾಡಲಾಗಿದ್ದು, ಮಂಗಳವಾರ (ಜ. 11) ವಶಕ್ಕೆ ಪಡೆಯಲಾಗುವುದು’ ಎಂದು ಸಿಪಿಐ ಶಿವಾನಂದ ಗಾಣಿಗೇರ ತಿಳಿಸಿದ್ದಾರೆ.