ಹಾಂಗ್‌ಝೌ: ಪದಕದ ಭರವಸೆಯಾಗಿದ್ದ ಗ್ರ್ಯಾಂಡ್‌ಮಾಸ್ಟರ್‌ ವಿದಿತ್ ಗುಜರಾತಿ ಅಂತಿಮ ಸುತ್ತಿನಲ್ಲಿ ಉಜ್ಬೇಕಿಸ್ತಾನದ ಜಾವೊಕಿರ್ ಸಿಂದರೋವ್ ಜಾವೊಕಿರ್ ಅವರಿಗೆ ಸೋತರು. ಆ ಮೂಲಕ ಬುಧವಾರ ಮುಕ್ತಾಯಗೊಂಡ ಏಷ್ಯನ್ ಗೇಮ್ಸ್‌ ಪುರುಷರ ಮತ್ತು ಮಹಿಳೆಯರ ಚೆಸ್‌ ವೈಯಕ್ತಿಕ ವಿಭಾಗದಲ್ಲಿ ಭಾರತಕ್ಕೆ ಯಾವುದೇ ಪದಕ ಸಿಗಲಿಲ್ಲ.
ವಿದಿತ್ (2694) ಎಂಟನೇ ಸುತ್ತಿನಲ್ಲಿ ತಮಗಿಂತ ಕೆಳಕ್ರಮಾಂಕದ ಮಂಗೊಲಿಯಾ ಆಟಗಾರ ಬಿಲ್ಗುನ್ ಸುಮಿಯ (2460) ಜೊತೆ ಡ್ರಾ ಮಾಡಿಕೊಂಡಿದ್ದು ದುಬಾರಿಯಾಯಿತು. ಅಂತಿಮ ಸುತ್ತಿನಲ್ಲೂ ಸೋತಿದ್ದರಿಂದ ಪದಕದಾಸೆ ಭಗ್ನಗೊಂಡಿತು.
ಮೂರನೇ ಶ್ರೇಯಾಂಕದ ವಿದಿತ್ (5.5 ಅಂಕ) ಐದನೇ ಸ್ಥಾನ ಪಡೆದರೆ, ಕಣದಲ್ಲಿದ್ದ ಭಾರತದ ಮತ್ತೊಬ್ಬ ಆಟಗಾರ ಅರ್ಜುನ್ ಇರಿಗೇಶಿ (5.5) ಆರನೇ ಸ್ಥಾನ (ಟೈಬ್ರೇಕ್‌ ಆಧಾರದಲ್ಲಿ) ಪಡೆದರು. ವಿದಿತ್ ಏಳನೇ ಸುತ್ತಿನ ನಂತರ ಜಂಟಿ ಎರಡನೇ ಸ್ಥಾನದಲ್ಲಿದ್ದರು.
ಅಗ್ರ ಶ್ರೇಯಾಂಕದ ವೀ ಯಿ (ಚೀನಾ) ಅವರು 9 ಸುತ್ತುಗಳಲ್ಲಿ 7.5 ಅಂಕ ಸಂಗ್ರಹಿಸಿ ಚಿನ್ನದ ಪದಕ ಪಡೆದರು. ಎರಡನೇ ಶ್ರೇಯಾಂಕದ ನಾಡಿರ್ಬೆಕ್ ಅಬ್ದುಸತ್ತಾರೋವ್ (ಉಜ್ಬೇಕಿಸ್ತಾನ) ಏಳು ಅಂಕ ಪಡೆದು ಬೆಳ್ಳಿ ಮತ್ತು ಜಾವೊಕಿರ್ 6.5 ಅಂಕ ಸಂಗ್ರಹಿಸಿಅಬ್‌್‌್‌ ಕಂಚಿನ ಪದಕ ಪಡೆದರು.
20 ವರ್ಷದ ಅರ್ಜುನ್ ಎಂಟನೇ ಸುತ್ತಿನಲ್ಲಿ ಅಬ್ದುಸತ್ತಾರೊವ್ ಎದುರು ಸೋಲನುಭವಿಸಿದರು. ಅರ್ಜುನ್ ಅಂತಿಮ ಸುತ್ತಿನಲ್ಲಿ ಬಾಂಗ್ಲಾ ಆಟಗಾರ ಇನಾಮುಲ್ ಹುಸೇನ್ ಅವರನ್ನು ಸೋಲಿಸಿದರು.
ಮಹಿಳೆಯರ ವಿಭಾಗದಲ್ಲಿ ದ್ರೋಣವಲ್ಲಿ ಹಾರಿಕಾ (6 ಅಂಕ) ನಾಲ್ಕನೇ ಸ್ಥಾನ ಪಡೆದರೆ, 2006 ದೋಹಾ ಕ್ರೀಡೆಗಳಲ್ಲಿ ಚಿನ್ನ ಗೆದ್ದಿದ್ದ ಕೋನೇರು ಹಂಪಿ (5.5) ಇಲ್ಲಿ ಏಳನೇ ಸ್ಥಾನ ಪಡೆದರು. ಇವರಿಬ್ಬರು ಎಂಟನೇ ಸುತ್ತಿನಲ್ಲಿ ಪರಸ್ಪರ ಎದುರಾಳಿಗಳಾಗಿದ್ದು, ಈ ಪಂದ್ಯ ‘ಡ್ರಾ’ ಆಗಿತ್ತು.
