ಮಡಿಕೇರಿ: ಕೃಷ್ಣ ಜನ್ಮಾಷ್ಟಮಿ ಪ್ರಯುಕ್ತ ನಗರದ ಗೌಳಿಬೀದಿಯ ಕಂಚಿ ಕಾಮಾಕ್ಷಿ ದೇವಾಲಯದಲ್ಲಿ ಮಕ್ಕಳಿಗೆ ಛದ್ಮವೇಷ ಹಾಗೂ ಮೊಸರು ಕುಡಿಕೆ ಒಡೆಯುವ ಸ್ಪರ್ಧೆಗಳು ನಡೆದವು.
ಹಲವು ವರ್ಷಗಳಿಂದ ಮೊಸರು ಕುಡಿಕೆ ಒಡೆಯುವ ಸ್ಪರ್ಧೆಯನ್ನು ಆಚರಿಸಿಕೊಂಡು ಬರುತ್ತಿರುವ ದೇವಾಲಯ ಸಮಿತಿ ಈ ಬಾರಿಯೂ ಆಯೋಜಿಸಿತ್ತು. 50 ಅಡಿ ಎತ್ತರದ ಕಮಾನಿನಲ್ಲಿ ಮೊಸರು ಕುಡಿಕೆಯನ್ನು ತೂಗಿಸಿ ಒಡೆಯುವ ಸಂಪ್ರದಾಯ ನಡೆಸಲಾಗುತ್ತಿದೆ.
ಇಬ್ಬರು ಮಾತ್ರ ಮೊಸರು ಕುಡಿಕೆ ಒಡೆಯುವಲ್ಲಿ ಪಾಲ್ಗೊಳ್ಳುತ್ತಾರೆ. ಒಡೆಯುವ ಸಂದರ್ಭ ನೀರೆರಚಲಾಗುತ್ತದೆ. ಅದಕ್ಕಾಗಿ ಅವರು ಒಂದು ವಾರ ವಿಶೇಷ ವ್ರತದಲ್ಲಿರುತ್ತಾರೆ.
ಆಕರ್ಷಿಸಿದ ಕೃಷ್ಣ ವೇಷ: ಕಾರ್ಯಕ್ರಮದ ಅಂಗವಾಗಿ ಮಕ್ಕಳಿಗೆ ಆಯೋಜಿಸಿದ್ದ ಕೃಷ್ಣ ಸ್ಪರ್ಧೆಯಲ್ಲಿ ಹಲವು ಪುಟಾಣಿಗಳು ಪಾಲ್ಗೊಂಡು, ಎಲ್ಲರ ಮೆಚ್ಚುಗೆಗೆ ಪಾತ್ರರಾದರು. ವಿಜೇತ ಮಕ್ಕಳಿಗೆ ದೇವಾಲಯ ಸಮಿತಿಯಿಂದ ಬಹುಮಾನ ವಿತರಿಸಲಾಯಿತು.
