ಹೂಳಿನ ಗೋಳು; ಹೊಳೆಗಳೇ ಮಾಯವಾಗುವ ಭೀತಿ!

ಸಮೀಪದ ಮಾದಾಪುರ ಗ್ರಾಮ ಪಂಚಾಯಿತಿಗೆ ಸೇರಿದ ಮಾದಾಪುರ ಹೊಳೆ, ಹಟ್ಟಿಹೊಳೆ ಹಾಗೂ ಹರದೂರು ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಹರದೂರು ಹೊಳೆಯಲ್ಲಿ ಮಣ್ಣು ತುಂಬಿ ನೀರು ಮಾಯವಾಗಿದೆ.

ಹರದೂರು ಹೊಳೆಯು ಹಾರಂಗಿ ಹಿನ್ನೀರಾಗಿದ್ದು, ಇದೀಗ ನೀರು ಸಂಪೂರ್ಣ ಇಳಿಮುಖಗೊಂಡಿದೆ. ಕಳೆದ 2-3 ವರ್ಷಗಳಿಂದ ಸಂಭವಿಸುತ್ತಿರುವ ಭೂಕುಸಿತ ಮತ್ತು ಪ್ರವಾಹದಿಂದ ಹರಿದು ಬಂದ ಮಣ್ಣು ಅಲ್ಲಲ್ಲಿಯೇ ಸಂಗ್ರಹವಾಗಿ ಹೊಳೆಗಳೆ ಮುಚ್ಚಲ್ಪಟ್ಟಿವೆ. ಇದರಿಂದ ಈ ಭಾಗಗಳ ಗ್ರಾಮಸ್ಥರು ಸಂಕಷ್ಟಕ್ಕೆ ಒಳಗಾಗುವ ಸ್ಥಿತಿ ಬಂದಿದೆ.

ಈ ಹಿಂದೆ ಹಟ್ಟಿಹೊಳೆ, ಮುಕ್ಕೋಡ್ಲು ಸೇರಿದಂತೆ ಈ ಭಾಗದ ಕೆಲವು ಕಡೆ ಬೆಟ್ಟ, ಕಾಫಿ ತೋಟದಲ್ಲಿ ಕುಸಿದ ಮಣ್ಣು ಈ ಹೊಳೆಗಳ ಪಾಲಾಗಿವೆ. ಒಂದು ವೇಳೆ ಮಾದಾಪುರ, ಹಟ್ಟಿಹೊಳೆ, ಹರದೂರು ಹೊಳೆಗಳಲ್ಲಿ ಹೂಳು ತೆಗೆಯದಿದ್ದರೆ ಮೇ, ಜೂನ್‌ನಲ್ಲಿ ಪ್ರಾರಂಭವಾಗುವ ಮಳೆಗೆ ಹೊಳೆಗಳು ಉಕ್ಕಿ ಮೇಲೇರಲಿವೆ ಎಂದು ಸ್ಥಳೀಯರು ಆತಂಕ ವ್ಯಕ್ತಪಡಿಸಿದ್ದಾರೆ.

ಈ ಭಾಗದ ಎಲ್ಲ ಹೊಳೆಗಳು ಜನವರಿ, ಫೆಬ್ರುವರಿಯವರೆಗೂ ಹರಿಯುತ್ತಿತ್ತು. ಆದರೆ, ಕಳೆದ 2-3 ವರ್ಷಗಳಿಂದ ನವಂಬರ್‌ನಲ್ಲಿಯೇ ಹೊಳೆಯ ನೀರು ಖಾಲಿಯಾಗುತ್ತಿದ್ದು ಭವಿಷ್ಯದಲ್ಲಿ ಹೊಳೆಯೇ ಮಾಯಾವಾಗಲಿದೆಯೇ ಎಂಬ ಆತಂಕ ಜನರಲ್ಲಿ ಮೂಡಲಾರಂಭಿಸಿದೆ.

ಸುಂಟಿಕೊಪ್ಪ ಹೋಬಳಿ ವ್ಯಾಪ್ತಿಯ ಭಾಗಗಳಲ್ಲಿ ಹೊಳೆ ಮಾತ್ರವಲ್ಲ. ನದಿ, ತೊರೆಗಳಲ್ಲಿ ಸೇರಿಕೊಂಡ ಪ್ರವಾಹದ ಹೂಳುಗಳನ್ನು ತೆಗೆಯುವಲ್ಲಿ ಜನಪ್ರತಿನಿಧಿಗಳು ಮತ್ತು ಆಡಳಿತ ವ್ಯವಸ್ಥೆ ನಿರ್ಲಕ್ಷ್ಯ ತೋರಿರುವುದರಿಂದ ಮತ್ತೊಮ್ಮೆ ಪ್ರವಾಹ ಕಂಡುಬಂದಲ್ಲಿ ಅಪಾಯ ಕಟ್ಟಿಟ್ಟ ಬುತ್ತಿಯಾಗಿದೆ. ಹರದೂರು, ಹಟ್ಟಿಹೊಳೆ ಈ ಭಾಗದಲ್ಲಿ ಹೊಳೆಯ, ತೊರೆಗಳ ಅಕ್ಕಪಕ್ಕದಲ್ಲಿಯೇ ಸೂರು ಕಟ್ಟಿಕೊಂಡು ಬಹುತೇಕ ಜನರು ಬದುಕು ಸಾಗಿಸುತ್ತಿದ್ದಾರೆ. ಮುಂದಿನ ದಿನದಲ್ಲಿ ಏನಾಗಬಹುದು ಎಂಬ ಕಾತರದಲ್ಲಿ ಇದ್ದಾರೆ ಈ ಭಾಗದ ಜನ.

2018ರಲ್ಲಿ ಸಂಭವಿಸಿದ ಭೂಕುಸಿತ, ಜಲಪ್ರಳಯದ ವೇಳೆ ಈ ಭಾಗದಲ್ಲಿ ಹಲವು ಸಾವು– ನೋವುಗಳು ಸಂಭವಿಸಿದಲ್ಲದೇ, ಮನೆ, ತೋಟ ಕಳೆದುಕೊಂಡು ನಿರ್ಗತಿರಾಗಿದ್ದರು. ಮತ್ತೇ ಅಂತಹ ಪ್ರಾಕೃತಿಕ ವೈಫಲ್ಯ ಸಂಭವಿಸಬಾರದು ಎಂದು ದೇವರಲ್ಲಿ ಪ್ರಾರ್ಥಿಸುತ್ತಿದ್ದಾರೆ.

ಈ ಭಾಗದ ಹೊಳೆಗಳಲ್ಲಿ ಅಷ್ಟೊಂದು ಹೂಳು ತುಂಬಿದ್ದರೂ ಸಹ ಅಧಿಕಾರಿಗಳು ಮತ್ತು ಜನಪ್ರತಿನಿಧಿಗಳು ಕೇವಲ ಆಶ್ವಾಸನೆ ನೀಡಿ ತೆರಳುತ್ತಿದ್ದಾರೆ ಎಂದು ಮಾದಾಪುರದ ಮಹಮ್ಮದ್ ಶರೀಫ್ ಅವರು ಬೇಸರ ವ್ಯಕ್ತಪಡಿಸಿದರು.