ಕೋಲಾರ: ಊರ ಮಧ್ಯೆ ಕೆ.ಸಿ.ವ್ಯಾಲಿ ಕೊಳಚೆನೀರು!

ಕಾಲುವೆಯ ಸುತ್ತ ಬೆಳೆದು ನಿಂತಿರುವ ಆಳುದ್ದದ ಕಳೆ, ಕೆರೆ ಸುತ್ತಲೂ ಒಣಗಿರುವ ತೆಂಗಿನ ಮರ. ಸದಾ ಶೀತ, ಜ್ವರ ಸೇರಿದಂತೆ ಒಂದಿಲ್ಲ ಒಂದು ಆರೋಗ್ಯ ಸಮಸ್ಯೆಯಿಂದ ಬಳಲುತ್ತಿರುವ ಮಕ್ಕಳ ಹಿಂಡು...

ಕೆ.ಸಿ.ವ್ಯಾಲಿ ದುಷ್ಪರಿಣಾಮ ಕುರಿತು ಸಾಕ್ಷಾತ್ ವರದಿಗಾಗಿ ‘ಪ್ರಜಾವಾಣಿ’ ಪ್ರತಿನಿಧಿ ಲಕ್ಷ್ಮಿಸಾಗರ ಗ್ರಾಮಕ್ಕೆ ಭೇಟಿ ನೀಡಿದಾಗ ಕಂಡುಬಂದ ದೃಶ್ಯಗಳಿವು. 

ಮೊದಲ ಸಂತ್ರಸ್ತ ಗ್ರಾಮ: ಬೆಂಗಳೂರಿನಿಂದ ಕೆ.ಸಿ.ವ್ಯಾಲಿ ಕೊಳಚೆನೀರು ಮೊದಲು ಬಂದು ಸೇರುವುದೇ ಲಕ್ಷ್ಮಿಸಾಗರ ಕೆರೆಗೆ. ನಂತರ ಊರಿನೊಳಗೆ ಕಾಲುವೆ  ಮೂಲಕ ಹರಿದು ಉದ್ದಪ್ಪನಹಳ್ಳಿ ಕೆರೆಗೆ ಸೇರುತ್ತದೆ. ಅಲ್ಲಿಂದಲೇ ಸಮಸ್ಯೆ ಆರಂಭ. ಕಾಲುವೆ ಎರಡು ಬದಿಯಲ್ಲಿ ಮನೆಗಳಿವೆ. 

‘ಸೊಳ್ಳೆಗಳ ಕಾಟದಿಂದ ಹಗಲು ಹೊತ್ತಿನಲ್ಲೂ ಮನೆಗಳ ಕಿಟಕಿ, ಬಾಗಿಲು ತೆರೆಯಲು ಆಗದ ಪರಿಸ್ಥಿತಿ ಇದೆ. ಬಾಗಿಲಿಗೂ ಸೊಳ್ಳೆ ಪರದೆ ಕಟ್ಟಿದ್ದೇವೆ. ಸಂಜೆ 4 ಗಂಟೆ ಕಳೆದರೆ ಹೊರಗಡೆ ತಿರುಗಾಡಲು ಸಾಧ್ಯವಿಲ್ಲ. ಸೊಳ್ಳೆಗಳ ಹಿಂಡು ಮುತ್ತಿಕೊಳ್ಳುತ್ತವೆ. ನೀರು ಹರಿಯುವಾಗ ಮೂಗಿಗೆ ರಾಚುವ ದುರ್ವಾಸನೆಗೆ ತಲೆಸುತ್ತು, ಉಬ್ಬಳಿಕೆ ಮತ್ತು ವಾಂತಿ ಬರುತ್ತದೆ’ ಎನ್ನುತ್ತಾರೆ ಗ್ರಾಮಸ್ಥರು. 

ಈ ಸಮಸ್ಯೆ ಬಗೆಹರಿಸಲು ಯೋಜನೆಯ ಅಧಿಕಾರಿಗಳು, ಜನಪ್ರತಿನಿಧಿಗಳು ಸೇರಿದಂತೆ ಎಲ್ಲರಿಗೂ ಮನವಿ ಮಾಡಿಕೊಂಡಿದ್ದೇವೆ.  ಈವರೆಗೂ ಮುಕ್ತಿ ಸಿಕ್ಕಿಲ್ಲ. ಕಾಲುವೆಗೆ ಸ್ವಲ್ಪ ದೂರ ಸಿಮೆಂಟ್‌ ಕಟ್ಟೆ ಕಟ್ಟಿ ಕೈತೊಳೆದುಕೊಂಡಿದ್ದಾರೆ ಎನ್ನುವುದು ಗ್ರಾಮಸ್ಥರ ದೂರು.

‘ಜೋರು ಮಳೆಯಾದಾಗ ಕಾಲುವೆಯ ನೀರು ಮನೆಗಳಿಗೆ ನುಗ್ಗುತ್ತದೆ. ಮಕ್ಕಳು ಈ ನೀರಿನಲ್ಲೇ ಇಳಿದು ಆಟವಾಡುತ್ತಿರುತ್ತಾರೆ. ಶೀತ, ಕೆಮ್ಮು, ಜ್ವರ, ನವೆ, ಇನ್ನಿತರ ಸಮಸ್ಯೆ ಕಾಣಿಸಿಕೊಳ್ಳುತ್ತಿವೆ. ಒಮ್ಮೆ ಆಸ್ಪತ್ರೆಗೆ ಹೋದರೆ ಕನಿಷ್ಠ ಒಂದು ಸಾವಿರ ಖರ್ಚಾಗುತ್ತದೆ’ ಎನ್ನುತ್ತಾರೆ ಗ್ರಾಮ ಪಂಚಾಯಿತಿ ಸದಸ್ಯ ಶಂಕರ್‌.

ಹತ್ತಾರು ವರ್ಷಗಳಿಂದ ಗ್ರಾಮದಲ್ಲಿ ಜನ ನೆಲೆಸಿದ್ದಾರೆ. 2018ರಲ್ಲಿ ಜಿಲ್ಲೆಗೆ ಕೆ.ಸಿ.ವ್ಯಾಲಿ ನೀರು ಬಂತು. ಸಮಸ್ಯೆಯಿಂದ ಬೇಸತ್ತು ಹಲವರು ಮನೆ ತೊರೆದಿದ್ದಾರೆ. ಜನರಿಲ್ಲದೆ ಗ್ರಾಮದ ಕೆಲವು ಮನೆಗಳು ಈಗಲೂ ಪಾಳು ಬಿದ್ದಿವೆ.

‘ಇಂಥ ಪರಿಸ್ಥಿತಿ ಬರುತ್ತದೆ ಎಂಬುದು ಗೊತ್ತಿದ್ದರೆ ಖಂಡಿತ ಇಲ್ಲಿ ಮನೆ ನಿರ್ಮಿಸಿಕೊಳ್ಳುತ್ತಿರಲಿಲ್ಲ. ಕಾಲುವೆಗೆ ತಡೆಗೋಡೆ ಇಲ್ಲ. ಆಡುವ ಮಕ್ಕಳು ಬಿದ್ದರೇನು ಗತಿ? ಸೊಳ್ಳೆ, ನೊಣ, ಹಾವುಗಳ ಕಾಟದಿಂದ ಸಾಕಾಗಿದೆ’ ಎನ್ನುತ್ತಾರೆ ಗ್ರಾಮದ ಮಹಿಳೆಯರು.