ಕೋಲಾರ ನಗರದ ಹಲವೆಡೆ ಕೋಮು ಭಾವನೆ ಪ್ರಚೋದಿಸುವ ಭಿತ್ತಿಪತ್ರ: ತನಿಖೆ ಆರಂಭ

ಮಂಗಳೂರಿನಲ್ಲಿ ಇತ್ತೀಚೆಗೆ ಭಯೋತ್ಪಾದಕರ ಪರವಾದ ಗೋಡೆ ಬರಹ ಬರೆದು ವಿವಾದ ಸೃಷ್ಟಿಸಲಾಗಿತ್ತು. ಇದರ ಬೆನ್ನಲ್ಲೇ ನಗರದ ಹಲವೆಡೆ ಬಾಬರಿ ಮಸೀದಿ ವಿವಾದ ಕುರಿತ ಪ್ರಚೋದನಕಾರಿ ಸಂದೇಶವುಳ್ಳ ಭಿತ್ತಿಪತ್ರ ಅಂಟಿಸಲಾಗಿದೆ.

ಅಲ್ಪಸಂಖ್ಯಾತ ಸಮುದಾಯದವರು ಹೆಚ್ಚಿನ ಸಂಖ್ಯೆಯಲ್ಲಿರುವ ಕ್ಲಾಕ್‌ಟವರ್‌, ಬಂಬೂ ಜಜಾರ್, ಶಹಿನ್‌ಷಾ ನಗರ, ಅಮ್ಮವಾರಿಪೇಟೆ ವೃತ್ತ ಸೇರಿದಂತೆ ಪ್ರಮುಖ ಸ್ಥಳಗಳಲ್ಲಿ ಈ ಭಿತ್ತಿಪತ್ರಗಳು ರಾರಾಜಿಸುತ್ತಿವೆ. ಭಿತ್ತಿಪತ್ರಗಳಲ್ಲಿ ‘ಬಾಬರಿ ಒಂದು ದಿನ ಎದ್ದು ನಿಲ್ಲಲಿದೆ, 6 ಡಿಸೆಂಬರ್ 1992 ನಾವು ಮರೆಯದಿರೋಣ’ ಎಂಬ ಸಂದೇಶವಿದೆ. ಭಿತ್ತಿಪತ್ರದ ಕೊನೆಯಲ್ಲಿ ಪಿಎಫ್‌ಐ ಸಂಘಟನೆಯ ಹೆಸರು ಉಲ್ಲೇಖಿಸಲಾಗಿದೆ.

ಈ ವಿಷಯ ತಿಳಿದ ಪೊಲೀಸರು ಸೋಮವಾರ ರಾತ್ರಿ ಹಲವೆಡೆ ಭಿತ್ತಿಪತ್ರ ತೆರವುಗೊಳಿಸಿದರು. ಮುನ್ನೆಚ್ಚರಿಕೆ ಕ್ರಮವಾಗಿ ನಗರದೆಲ್ಲೆಡೆ ಬಿಗಿ ಪೊಲೀಸ್‌ ಬಂದೋಬಸ್ತ್‌ ಮಾಡಲಾಗಿದೆ.