ತಮಿಳು ಕಾಲೊನಿಯಲ್ಲಿ ಮಡುಗಟ್ಟಿದ ಮೌನ

7
ಕರುಣಾನಿಧಿ ಸಾವು; ಅಂತ್ಯಸಂಸ್ಕಾರದಲ್ಲಿ ಪಾಲ್ಗೊಳ್ಳಲು ತಮಿಳುನಾಡಿಗೆ ತೆರಳಿದ ನಿವಾಸಿಗಳು

ತಮಿಳು ಕಾಲೊನಿಯಲ್ಲಿ ಮಡುಗಟ್ಟಿದ ಮೌನ

Published:
Updated:
Deccan Herald

ಮಂಡ್ಯ: ತಮಿಳುನಾಡು ಮಾಜಿ ಮುಖ್ಯಮಂತ್ರಿ, ಡಿಎಂಕೆ ವರಿಷ್ಠ ಕರುಣಾನಿಧಿ ನಿಧನಕ್ಕೆ ಮಿಮ್ಸ್‌ ಆಸ್ಪತ್ರೆ ಸಮೀಪದ ತಮಿಳು ಕಾಲೊನಿ ನಿವಾಸಿಗಳು ಕಂಬನಿ ಮಿಡಿದಿದ್ದಾರೆ. ಅಂತ್ಯಸಂಸ್ಕಾರದಲ್ಲಿ ಪಾಲ್ಗೊಳ್ಳಲು ಕೆಲವರು ಮಂಗಳವಾರ ರಾತ್ರಿಯೇ ಚೆನ್ನೈಗೆ ತೆರಳಿದ್ದಾರೆ.

ಮಂಗಳವಾರ ಸಂಜೆ ಕರುಣಾನಿಧಿ ನಿಧನದ ಸುದ್ದಿ ತಿಳಿಯುತ್ತಿದ್ದಂತೆ ಕಾಲೊನಿಯಲ್ಲಿ ನೀರವ ಮೌನ ಆವರಿಸಿತು. ಕೆಲವರು ಕಣ್ಣೀರು ಸುರಿಸುತ್ತಾ ಅಗಲಿದ ನಾಯಕನನ್ನು ಸ್ಮರಿಸಿದರು. ಚೆನ್ನೈನ ಮರೀನಾ ಬೀಚ್‌ನಲ್ಲೇ ಕರುಣಾನಿಧಿ ಅವರ ಅಂತ್ಯಸಂಸ್ಕಾರಕ್ಕೆ ಅವಕಾಶ ಸಿಗಬೇಕು ಎಂದು ದೇವರಲ್ಲಿ ಮೊರೆ ಇಟ್ಟರು. ಬೀಚ್‌ ಸಮೀಪ ಅಂತಸಂಸ್ಕಾರಕ್ಕೆ ಅವಕಾಶ ನೀಡಿ ಸುಪ್ರೀಂ ಕೋರ್ಟ್‌ ತೀರ್ಪು ಪ್ರಕಟಿಸಿದಾಗ ಇಲ್ಲಿಯ ನಿವಾಸಿಗಳು ನಿಟ್ಟುಸಿರು ಬಿಟ್ಟರು. ಕೆಲವರು ಮಂಗಳವಾರ ರಾತ್ರಿಯಿಡೀ ನಿದ್ದೆ ಮಾಡದೇ ನಾಯಕನ ಸಾಧನೆಗಳನ್ನು ವರ್ಣಿಸುತ್ತಾ ಜಾಗರಣೆ ಮಾಡಿದರು.

ಬಹುತೇಕ ಪೌರ ಕಾರ್ಮಿಕರು ಹಾಗೂ ಗಾರೆ ಕೆಲಸದವರೇ ತಮಿಳು ಕಾಲೊನಿಯಲ್ಲಿ ವಾಸವಾಗಿದ್ದಾರೆ. ಬುಧವಾರ ಯಾರೂ ತಮ್ಮ ಕೆಲಸಗಳಿಗೆ ತೆರಳಲಿಲ್ಲ. ರಜೆ ಹಾಕಿ ಮನೆಯಲ್ಲೇ ಉಳಿದರು. ಎಲ್ಲರೂ ಟಿವಿ ಮುಂದೆ ಕುಳಿತು ಇಲ್ಲಿಂದಲೇ ಪಾರ್ಥಿವ ಶರೀರದ ದರ್ಶನ ಪಡೆದರು. ಮಹಿಳೆಯರು, ಮಕ್ಕಳು ಟಿವಿ ವೀಕ್ಷಣೆ ಮಾಡುತ್ತಿದ್ದರು. ಮನೆಯಲ್ಲಿ ಟಿವಿ ಇಲ್ಲದವರು ಪಕ್ಕದ ಮನೆಯಲ್ಲಿ ಟಿವಿ ಮುಂದೆ ಕುಳಿತಿದ್ದರು. ರಸ್ತೆಗಳು ಬಿಕೋ ಎನ್ನುತ್ತಿದ್ದವು. ಕಾಲೊನಿಯಲ್ಲಿರುವ ಶಾಲೆಗೆ ಬಹುತೇಕ ವಿದ್ಯಾರ್ಥಿಗಳು ಗೈರು ಹಾಜರಾಗಿದ್ದರು.

‘ನಾನು ಚೆನ್ನೈನಲ್ಲಿ ತಂಪು ಪಾನೀಯ ಮಾರಾಟ ಮಾಡುತ್ತಿದ್ದೆ. 1967ರಲ್ಲಿ ಮೆರವಣಿಗೆಯೊಂದರಲ್ಲಿ ನಾನು ಕರುಣಾನಿಧಿ ಅವರನ್ನು ನೋಡಿದ್ದೆ. ಎಂ.ಜಿ.ರಾಮಚಂದ್ರರಾವ್‌ ಕೂಡ ಜೊತೆಯಲ್ಲಿದ್ದರು. ಎಂಜಿಆರ್‌ ನನ್ನನ್ನು ಕರೆದು 1 ಆಣೆ ಕೊಟ್ಟು ತಂಪು ಪಾನೀಯ ಕೊಂಡರು. ಅವರ ಪಕ್ಕದಲ್ಲೇ ಕರುಣಾನಿಧಿ ಕುಳಿತಿದ್ದರು. ಬಹಳ ಹತ್ತಿರದಿಂದ ನಾನು ಅವರನ್ನು ನೋಡಿದ್ದೆ’ ಎಂದು ಚೆನ್ನೈನಿಂದ ಮಂಡ್ಯಕ್ಕೆ ವಲಸೆ ಬಂದಿರುವ ದೇವರಾಜ್‌ ಹೇಳಿದರು.

ಶ್ರದ್ಧಾಂಜಲಿ:
ಬುಧವಾರ ಮಧ್ಯಾಹ್ನದ ವೇಳೆಗೆ ಕಾಲೊನಿಯ ಹಲವೆಡೆ ಕರುಣಾನಿಧಿ ಅವರಿಗೆ ಶ್ರದ್ಧಾಂಜಲಿ ಕೋರಿದ ಭಾವಚಿತ್ರಗಳು ರಾರಾಜಿಸುತ್ತಿದ್ದವು. ಪ್ರಮುಖ ಬೀದಿಯಲ್ಲಿ ಸೇರಿದ ಜನರು ಭಾವಚಿತ್ರಕ್ಕೆ ಹೂವಿನ ಹಾರ ಹಾಕಿ ಪೂಜೆ ಸಲ್ಲಿಸಿದರು. ಅಗಲಿದ ನಾಯಕನನ್ನು ನೆನೆದು ಕಣ್ಣೀರು ಹಾಕಿದರು.

‘ತಮಿಳು ಭಾಷಿಗರು ಎಲ್ಲೇ ಇದ್ದರೂ ಅವರ ರಕ್ಷಣೆಗಾಗಿ ಕರುಣಾನಿಧಿ ಅವರು ಶ್ರಮಿಸುತ್ತಿದ್ದರು. ಅವರ ಸಾವು ಇಡೀ ದೇಶಕ್ಕೆ ನಷ್ಟವಾಗಿದೆ. ಅವರ ಪುಣ್ಯತಿಥಿ ಸಮಾರಂಭವನ್ನು ವಿಜೃಂಭಣೆಯಿಂದ ಆಚರಣೆ ಮಾಡುತ್ತೇವೆ. ಕಾಲೊನಿಯ ಯುವಜನರು ಮುಡಿಕೊಟ್ಟು ಅವರಿಗೆ ಗೌರವ ತೋರಲಿದ್ದಾರೆ. ಜೊತೆಗೆ ಕಾಲೊನಿಯ ಸರ್ವರಿಗೂ ಅನ್ನಸಂತರ್ಪಣೆ ಮಾಡಲಾಗುವುದು’ ಎಂದು ಮಹೇಂದ್ರನ್‌ ಹೇಳಿದರು.

ಅಭಿಮಾನಿಯಿಂದ ಭಾವಚಿತ್ರ ಮೆರವಣಿಗೆ

ಎಂ.ಕರುಣಾನಿಧಿ ಅವರ ಅಭಿಮಾನಿ, ತಿರುವಣ್ಣಮಲೈ ಮೂಲದ ರಾಮು ನಗರದ ಹಲವೆಡೆ ಕರುಣಾನಿಧಿ ಅವರ ಭಾವಚಿತ್ರದ ಮೆರವಣಿಗೆ ಮಾಡಿದರು. ಅವರ ಜೊತೆ ಹಲವು ಮಂದಿ ಯುವಕರು ಇದ್ದರು. ತಮಿಳುಕಾಲೊನಿಯಿಂದ ಹೊರಟ ಮೆರವಣಿಗೆ ನಂದಾ ಟಾಕೀಸ್‌ ಸರ್ಕಲ್‌, ವಿವಿ ರಸ್ತೆ ವೃತ್ತ, ಸಂಜಯ್‌ ವೃತ್ತದವರೆಗೂ ಮೆರವಣಿಗೆ ನಡೆಸಿದರು. ಮೆರವಣಿಗೆಯುದ್ದಕ್ಕೂ ಕರುಣಾನಿಧಿ ಅವರಿಗೆ ಕಣ್ಣೀರು ಹಾಕಿದರು.
‘ತಿರುವಣ್ಣಮಲೈ ಜಿಲ್ಲೆಯ ಕಿಲ್‌ಪೆಣ್ಣತೂರ್‌ ನಮ್ಮ ಊರು. ಕೆಲಸಕ್ಕಾಗಿ ನಾನು ಮಂಡ್ಯಕ್ಕೆ ಬಂದಿದ್ದೇನೆ. ಚಿಕ್ಕಂದಿನಿಂದಲೂ ನಾನು ಕರುಣಾನಿಧಿ ಅವರ ಅಭಿಮಾನಿ. ಅವರ ಸಾವು ನನಗೆ ಅಪಾರ ನೋವುಂಟುಮಾಡಿದೆ. ಅವರು ಇಲ್ಲ ಎನ್ನುವುದನ್ನು ಕಲ್ಪಿಸಿಕೊಳ್ಳುವುದಕ್ಕೂ ಆಗುತ್ತಿಲ್ಲ’ ಎಂದು ರಾಮು ಕಣ್ಣೀರು ಹಾಕಿದರು.

Tags: 

ಬರಹ ಇಷ್ಟವಾಯಿತೆ?

  • 1

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !