ಮೈಸೂರು: ‘ಇಲ್ಲಿನ ಮಹಾನಗರ ಪಾಲಿಕೆಯ ವಾಣಿ ವಿಲಾಸ ನೀರು ಸರಬರಾಜು ವಿಭಾಗದಲ್ಲಿ ನಾಲ್ವರನ್ನು ಕಾಯಂಗೊಳಿಸಿದ್ದು, ಈ ಪ್ರಕ್ರಿಯೆ ಅಕ್ರಮದಿಂದ ಕೂಡಿದೆ. ಇದರಲ್ಲಿ ಭ್ರಷ್ಟಾಚಾರ ನಡೆದಿದೆ’ ಎಂದು ಮೈಸೂರು ಮಹಾನಗರ ಪಾಲಿಕೆ ವಾಣಿ ವಿಲಾಸ ನೀರು ಸರಬರಾಜು ಮಂಡಳಿ ವರ್ಕರ್ಸ್‌ ಯೂನಿಯನ್‌ನ ಅಧ್ಯಕ್ಷ ಎಸ್.ಶಾಂತಪ್ಪ ಸೋಮವಾರ ಇಲ್ಲಿ ದೂರಿದರು.
‘300 ಜನರು 15 ವರ್ಷದಿಂದ ಗುತ್ತಿಗೆ ನೌಕರರಾಗಿ ದುಡಿಯುತ್ತಿದ್ದರೂ; ಕೇವಲ ನಾಲ್ಕು ಮಂದಿಯನ್ನಷ್ಟೇ ಕಾಯಂಗೊಳಿಸಿದ್ದಾರೆ. ಇದರ ವಿರುದ್ಧ ಹೈಕೋರ್ಟ್‌ನಲ್ಲಿ ಪಿಐಎಲ್‌ ಹಾಕುತ್ತೇವೆ’ ಎಂದು ನಗರದಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಹೇಳಿದರು.
‘ಗುತ್ತಿಗೆ ಪದ್ಧತಿಯನ್ನು 2012ರಲ್ಲೇ ರದ್ದುಗೊಳಿಸಲಾಗಿದೆ. ಆದರೂ 200 ಹೊರ ಗುತ್ತಿಗೆ ನೌಕರರನ್ನು ಅಕ್ರಮವಾಗಿ ನೇಮಿಸಿಕೊಳ್ಳಲಾಗಿದೆ’ ಎಂದು ಶಾಂತಪ್ಪ ಆರೋಪಿಸಿದರು.
