ಗುರುವಾರ , ಮಾರ್ಚ್ 4, 2021
18 °C
₹ 1ಕ್ಕೆ ಕುಸಿತ, ಬೆಳೆಗಾರರು ಕಂಗಾಲು

ಬೆಲೆ ಕುಸಿತಕ್ಕೆ ಸೇರ್ಪಡೆಯಾದ ಮಂಗಳೂರು ಸೌತೆ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಮೈಸೂರು: ಇಲ್ಲಿನ ಎಪಿಎಂಸಿ ಮಾರುಕಟ್ಟೆಯಲ್ಲಿ ಸೋಮವಾರ ಮಂಗಳೂರು ಸೌತೆ ಕೆ.ಜಿಗೆ ₹ 1 ಇದ್ದರೆ, ಸಿಹಿಕುಂಬಳ ₹ 2, ಬದನೆ ಹಾಗೂ ಎಲೆಕೋಸು ₹ 3, ಪಡುವಲಕಾಯಿ ₹ 4 ಹಾಗೂ ಟೊಮೆಟೊ ₹ 5ಕ್ಕೆ ಕನಿಷ್ಠ ಧಾರಣೆ ಇದ್ದು, ಬೆಳೆಗಾರರು ತೀವ್ರವಾಗಿ ನಷ್ಟ ಅನುಭವಿಸುವಂತಾಗಿದೆ.

ಸೋಮವಾರ ಒಟ್ಟು 3,278 ಕ್ವಿಂಟಲ್‌ನಷ್ಟು ತರಕಾರಿಗಳು ಆವಕವಾಗಿದ್ದವು. ಇವುಗಳಲ್ಲಿ 985 ಕ್ವಿಂಟಲ್‌ನಷ್ಟು ಟೊಮೆಟೊ ಇದ್ದರೆ, ಸಿಹಿಗುಂಬಳ 720 ಕ್ವಿಂಟಲ್‌, ಎಲೆಕೋಸು 320 ಕ್ವಿಂಟಲ್, ಮಂಗಳೂರು ಸೌತೆ 118 ಕ್ವಿಂಟಲ್‌ನಷ್ಟು ಇತ್ತು. ಆವಕ ಹೆಚ್ಚಾಗಿ, ಬೇಡಿಕೆ ಕಡಿಮೆಯಾದ್ದರಿಂದ ಬೆಲೆಗಳಲ್ಲಿ ಇಳಿಕೆಯಾಗಿದೆ. ‌

ತಮಿಳುನಾಡಿನಿಂದ ಹೆಚ್ಚಾಗಿ ಕ್ಯಾರೆಟ್ ಬಂದಿದ್ದರಿಂದ (115 ಕ್ವಿಂಟಲ್) ಇದರ ದರ ಕೆ.ಜಿಗೆ ₹ 15ಕ್ಕೆ ಇಳಿಕೆಯಾಗಿತ್ತು.

ಬೀನ್ಸ್‌ಗೆ ಮಾತ್ರ ಹೆಚ್ಚಿನ ಬೆಲೆ ಇದ್ದು, ಬೆಳೆಗಾರರ ಮುಖದಲ್ಲಿ ಮಂದಹಾಸ ಮೂಡಿಸಿದೆ. 65 ಕ್ವಿಂಟಲ್‌ನಷ್ಟು ಬಂದಿದ್ದ ಬೀನ್ಸ್‌ನ ಕನಿಷ್ಠ ಧಾರಣೆ ₹ 40 ಇದ್ದರೆ, ಗರಿಷ್ಠ ಧಾರಣೆ ₹ 42 ಇತ್ತು. ಇದರ ಆವಕ ಕಡಿಮೆಯಾಗಿರುವುದರಿಂದ ಸಹಜವಾಗಿಯೇ ಬೆಲೆಯೂ ಹೆಚ್ಚಾಗಿದೆ.

ಉಳಿದಂತೆ, ಹೂಕೋಸು ಕೆ.ಜಿಗೆ ₹ 10, ಹಸಿರುಮೆಣಸಿನಕಾಯಿ ₹ 15, ಬೆಂಡೆಕಾಯಿ ₹ 17, ಬೀಟ್ರೂಟ್ ₹ 7, ಹೀರೆಕಾಯಿ ₹ 20, ದಪ್ಪಮೆಣಸಿನಕಾಯಿ ₹ 17 ಇತ್ತು.

ಈರುಳ್ಳಿಯ ಆವಕ ಹೊರರಾಜ್ಯ ಮತ್ತು ಉತ್ತರ ಕರ್ನಾಟಕದ ಕಡೆಯಿಂದ ಹೆಚ್ಚಾಗಿದೆ. ಇದಕ್ಕೆ ತಕ್ಕಂತೆ ಬೇಡಿಕೆಯಲ್ಲಿ ಯಾವುದೇ ಹೆಚ್ಚಳವಾಗುತ್ತಿಲ್ಲ. ಹೀಗಾಗಿ, ದರವು ಕುಸಿತ ಕಂಡಿದೆ. ಶನಿವಾರ ಇಲ್ಲಿನ ಎಪಿಎಂಸಿ ಮಾರುಕಟ್ಟೆಗೆ 2,282 ಕ್ವಿಂಟಲ್‌ನಷ್ಟು ಈರುಳ್ಳಿ ಬಂದಿತ್ತು. ಇದರ ದರ ಕೆ.ಜಿಗೆ ₹ 12 ಇತ್ತು.

ಮಾವಿನ ಆವಕ ಮಾರುಕಟ್ಟೆಗೆ ನಿಧಾನವಾಗಿ ಹೆಚ್ಚಾಗುತ್ತಿದ್ದು, ಬೆಲೆಯು ಏರುಗತಿಯಲ್ಲೇ ಇದೆ. ಉತ್ತಮ ಗುಣಮಟ್ಟದ ರಸಪೂರಿ ಕೆ.ಜಿಗೆ ₹ 60 ಇದ್ದರೆ, ಬಾದಾಮಿ ₹ 80 ಹಾಗೂ ಸೆಂದೂರ ₹ 40 ಇದೆ. ಇನ್ನು ಮುಂದೆ ಮಾವಿನ ಆವಕದಲ್ಲಿ ಹೆಚ್ಚಳವಾಗುವ ಸಾಧ್ಯತೆ ಇದ್ದು, ದರ ಇಳಿಯುವ ವಿಶ್ವಾಸ ಇದೆ ಎಂದು ಹಣ್ಣಿನ ವ್ಯಾಪಾರಿ ಸೋಮಶೇಖರ ತಿಳಿಸಿದರು.

ಕೋಳಿಮೊಟ್ಟೆ ದರವು ಈ ವಾರವೂ ಚೇತರಿಕೆ ಪಡೆಯಲು ಸಾಧ್ಯವಾಗಿಲ್ಲ. ರಾಷ್ಟ್ರೀಯ ಮೊಟ್ಟೆ ದರ ಸಮನ್ವಯ ಸಮಿತಿಯ ದರವು ಒಂದು ಮೊಟ್ಟೆಗೆ ₹ 3.41ರಲ್ಲಿ ಸೋಮವಾರ ಇತ್ತು.

ಕೇಂದ್ರ ಬಜೆಟ್ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು