ಮೈಸೂರು | ಮುಡಾ: ಖಾತೆ ವರ್ಗಾವಣೆಗೆ ಆನ್‌ಲೈನ್‌ ಪಾವತಿ ಕಡ್ಡಾಯ

ಚಲನ್ ನಕಲು ಮಾಡಿರುವ ಪ್ರಕರಣಗಳು ಹಲವು ವರ್ಷಗಳಿಂದ ಪ್ರಾಧಿಕಾರದಲ್ಲಿ ನಡೆದಿರುವ ಬಗ್ಗೆ ಅನುಮಾನ ವ್ಯಕ್ತವಾಗಿರುವ ಕಾರಣ ಇದೇ ಜನವರಿಯಿಂದ ಎಲ್ಲ ಶುಲ್ಕ ಪಾವತಿಗಳ ಬಗ್ಗೆ ಪರಿಶೀಲನೆಗೆ ತನಿಖಾ ತಂಡವನ್ನು ಮುಡಾ ಆಯುಕ್ತ ಜಿ.ಟಿ.ದಿನೇಶ್‌ ಕುಮಾರ್ ರಚಿಸಿದ್ದಾರೆ. ಈ ಪರಿಶೀಲನೆ ನಂತರ ಹಿಂದಿನ ವರ್ಷಗಳ ಎಲ್ಲ ವಹಿವಾಟನ್ನು ತಂಡ ತಪಾಸಣೆ ಮಾಡಲಿದೆ.

ನಗರ ಯೋಜನೆ ಸದಸ್ಯ ಆರ್‌.ಶೇಷ, ಕಾರ್ಯದರ್ಶಿ ಜೆ.ಡಿ.ಶೇಖರ್, ಎಇಇ ಕೆ.ಆರ್‌.ಮಹೇಶ್‌ ಹಾಗೂ ಮುಖ್ಯ ಲೆಕ್ಕಾಧಿಕಾರಿ ಮುತ್ತಾ ತನಿಖಾ ತಂಡದಲ್ಲಿದ್ದು, ಇದೀಗ ಅವರು ಬೆಳಕಿಗೆ ತಂದ 5 ನಕಲು ಪ್ರಕರಣಗಳಲ್ಲಿ 7 ಮಂದಿ ವಿರುದ್ಧ ಲಕ್ಷ್ಮಿಪುರಂ ಠಾಣೆಯಲ್ಲಿ ಬುಧವಾರ ಪ್ರಕರಣ ದಾಖಲಿಸಲಾಗಿದೆ. 

ನಗದು ಜಮಾ ಆಗಿರಲಿಲ್ಲ: ‘7 ಮಂದಿ ಅರ್ಜಿದಾರರು ಬ್ಯಾಂಕ್‌ ಆಫ್‌ ಬರೋಡದ ಚಲನ್‌ ಜೆರಾಕ್ಸ್‌ ಪ್ರತಿಯನ್ನು ದಾಖಲೆಗಳೊಂದಿಗೆ ಲಗತ್ತಿಸಿದ್ದರು. ಚಲನ್‌ ಆಧರಿಸಿ ಅವರಿಗೆ ವರ್ಗಾವಣೆ ಪತ್ರ ನೀಡಲಾಗಿತ್ತು. ‍ಆದರೆ, ಚಲನ್‌ನ ಸಹಿ ಹಾಗೂ ಮೊಹರು ತಾಳೆಯಾಗುತ್ತಿಲ್ಲ. ಅಲ್ಲದೇ, ನಗದು ಜಮಾ ಆಗಿರಲಿಲ್ಲ’ ಎಂದು ಜಿ.ಟಿ.ದಿನೇಶ್‌ ಕುಮಾರ್ ‘‍ಪ್ರಜಾವಾಣಿ’ಗೆ ತಿಳಿಸಿದರು.

‘ಪ್ರಾಧಿಕಾರಕ್ಕೆ ಯಾವುದೇ ಕಪ್ಪುಚುಕ್ಕೆ ಬರಬಾರದು. ಹೀಗಾಗಿ ನಾಲ್ವರ ತನಿಖಾ ತಂಡ ರಚಿಸಿ, ಎಲ್ಲ ವಿಭಾಗಗಳಲ್ಲೂ ಪರಿಶೀಲನೆ ನಡೆಸಲಾಗುತ್ತಿದೆ. ಮಧ್ಯವರ್ತಿಗಳು ಹಾಗೂ ಹೊರಗುತ್ತಿಗೆ ಸಿಬ್ಬಂದಿಯಿಂದಲೂ ಈ ಪ್ರಮಾದ ನಡೆದಿರುವ ಶಂಕೆಯಿದೆ’ ಎಂದು ಅನುಮಾನ ವ್ಯಕ್ತಪಡಿಸಿದರು.

‘ನಿವೇಶನಗಳಿಗೆ ಸಂಬಂಧಿಸಿದ ಕಡತಕ್ಕೆ ಅಧಿಕಾರಿಯ ಸಹಿಯನ್ನು ನಕಲು ಮಾಡಿರುವ ಮತ್ತೊಂದು ಪ್ರಕರಣದಲ್ಲಿ ಪ್ರಾಧಿಕಾರದ ನೌಕರ ಎಂ.ಎಸ್‌.ನಂದೀಶ್‌ ಅವರಿಗೆ ಕಡ್ಡಾಯ ರಜೆ ನೀಡಲಾಗಿದ್ದು, ಮತ್ತೊಬ್ಬ ಹೊರಗುತ್ತಿಗೆ ನೌಕರ ಗುರುದತ್‌ ಎಂಬವರನ್ನು  ಕೆಲಸದಿಂದ ತೆಗೆಯಲಾಗಿದೆ’ ಎಂದು ತಿಳಿಸಿದರು.

‘ಈ ಎರಡೂ ಪ್ರಕರಣದ ನಂತರ ಹೊರಗುತ್ತಿಗೆ ನೌಕರರನ್ನು ವಿವಿಧ ವಿಭಾಗಗಳಿಗೆ ಪಾಳಿ ಆಧಾರದಲ್ಲಿ ಬದಲಿಸಲಾಗಿದೆ. ಪೊಲೀಸರಿಗೆ ಮಾಹಿತಿಯನ್ನು ನೀಡಲಾಗಿದ್ದು, ಅವರು ಮಹಜರು ನಡೆಸುತ್ತಿದ್ದಾರೆ. ಹೊರಗುತ್ತಿಗೆ ನೌಕರರ ವಿರುದ್ಧವೂ ಪ್ರತ್ಯೇಕ ಎಫ್‌ಐಆರ್‌ ದಾಖಲಿಸಲಾಗುವುದು’ ಎಂದರು.