ಇತಿಹಾಸ ಮರೆತರೆ ಸಮಾಧಿಯಾಗುತ್ತೀರಿ: ಜ್ಞಾನಪ್ರಕಾಶ ಸ್ವಾಮೀಜಿ

‘ಮಹಿಷ ಪ್ರತಿಮೆಯು 400 ವರ್ಷಗಳ ಹಿಂದಿನದು ಎಂದು ಹೇಳಲಾಗುತ್ತದೆ. ಆದರೆ ಯಾರ ಕಾಲದಲ್ಲಿ ನಿರ್ಮಾಣವಾಯಿತು ಶಿಲ್ಪಿ ಯಾರು ಎಷ್ಟು ಖರ್ಚಾಯಿತು ಎಂಬ ಮಾಹಿತಿ ಎಲ್ಲೂ ಸಿಗುತ್ತಿಲ್ಲ. ಇತಿಹಾಸವನ್ನು ಮುಚ್ಚಿಹಾಕಿರುವುದಕ್ಕೆ ಇದೊಂದು ಉದಾಹರಣೆ’ ಎಂದು ಮೈಸೂರು ವಿಶ್ವವಿದ್ಯಾಲಯದ ವ್ಯವಹಾರ ಅಧ್ಯಯನ ವಿಭಾಗದ ಪ್ರಾಧ್ಯಾಪಕ ಡಿ.ಆನಂದ್ ಹೇಳಿದರು. ವಿಚಾರ ಸಂಕಿರಣ ಉದ್ಘಾಟಿಸಿ ಮಾತನಾಡಿದ ಅವರು ‘ಚಾಮುಂಡಿ ಬೆಟ್ಟದಲ್ಲಿರುವ ದೇವಾಲಯ ನಂದಿ ಮೆಟ್ಟಿಲುಗಳನ್ನು ಯಾರು ನಿರ್ಮಿಸಿದರು ಎಂಬ ಬಗ್ಗೆ ಪೂರ್ಣ ಮಾಹಿತಿ ಇದೆ. ಮಹಿಷ ಪ್ರತಿಮೆ ಬಗ್ಗೆ ಏಕಿಲ್ಲ. ಈ ಬಗ್ಗೆ ಅಧ್ಯಯನವಾಗಬೇಕು ಸತ್ಯ ದರ್ಶನವಾಗಬೇಕು. ಕ್ರೀಡಾ ದಸರಾ ಸಾಂಸ್ಕೃತಿಕ ದಸರಾದಂತೆ ಮಹಿಷ ಹಾಗೂ ಮಹಿಷ ಮಂಡಲದ ಚರ್ಚೆಯೇ ಒಂದು ವೈಚಾರಿಕ ದಸರಾ’ ಎಂದು ಪ್ರತಿಪಾದಿಸಿದರು. ‘ಮಹಿಷ ಯಾರು ಮಹಿಷ ಮಂಡಲದ ವ್ಯಾಪ್ತಿಯೇನು ಕ್ರಿಸ್ತ ಪೂರ್ವ ಬುದ್ಧ ಪೂರ್ವ ಪುರಾಣಗಳಲ್ಲೂ ಇರುವ ಮಹಿಷ ಪದದ ಉಲ್ಲೇಖದ ಬಗ್ಗೆಯೂ ಪೂರ್ವಗ್ರಹವಿಲ್ಲದ ಅಧ್ಯಯಯನವಾಗಬೇಕು’ ಎಂದರು.

‘ಮಹಿಷ ದಸರಾ ವಿಷಯದಲ್ಲಿ ಇಡೀ ಇತಿಹಾಸವನ್ನೇ ನಾಶ ಮಾಡಲಾಗಿದೆ. ದೇಶದ ವ್ಯವಸ್ಥೆಯನ್ನೂ ಹಾಳು ಮಾಡಿದ್ದಾರೆ. ವ್ಯಕ್ತಿಯು ತನ್ನ ಸಾಂಸ್ಕೃತಿಕ ಧಾರ್ಮಿಕ ಆಚರಣೆಯಾಗಿ ಮಹಿಷಾ ದಸರಾ ಮಾಡಲು ಯಾರೂ ಅಡ್ಡಿ ಮಾಡಬಾರದು. ಸರ್ಕಾರವೂ ಸಹಕರಿಸಬೇಕು’ ಎಂದು ಕೆಪಿಸಿಸಿ ವಕ್ತಾರ ಎಂ.ಲಕ್ಷ್ಮಣ ಹೇಳಿದರು. ‘ಇಂದು ಪರಿಶಿಷ್ಟ ಹಿಂದುಳಿದ ವರ್ಗಗಳ ಯುವಜನತೆಯೂ ಮೇಲ್ವರ್ಗದ ಆಲೋಚನೆಗೆ ಪೂರಕವಾಗಿ ಕಾರ್ಯನಿರ್ವಹಿಸುತ್ತಿದ್ದು ತಮ್ಮ ಪೂರ್ವಿಕರ ಸಂಸ್ಕೃತಿ ಆಚರಣೆಗೆ ಬೆಲೆ ನೀಡುತ್ತಿಲ್ಲ. ಸಾಮಾಜಿಕ ಮಾಧ್ಯಮದಲ್ಲಿ ಬರುವ ಸುಳ್ಳುಗಳೇ ಅವರನ್ನು ಆವರಿಸಿದೆ’ ಎಮದು ಬೇಸರ ವ್ಯಕ್ತಪಡಿಸಿದರು.