ಕಣ ಮಾಯ, ರಸ್ತೆ ಮೇಲೆ ಒಕ್ಕಣೆ

ತಾಲ್ಲೂಕಿನಲ್ಲಿ ಉತ್ತಮ ರಾಗಿ ಫಸಲು ಬಂದಿದ್ದು ಒಕ್ಕಣೆ ಕೆಲಸವು ಆರಂಭವಾಗಿದೆ. ಪೂರ್ವಜರ ಕಾಲದಿಂದಲೂ ಹಳ್ಳಿಗಳಲ್ಲಿ ಕಣಗಳ ಮೂಲಕ ಒಕ್ಕಣೆಯನ್ನು ಮಾಡುತ್ತಿದ್ದರು. ಆದರೆ ಇತ್ತೀಚಿನ ದಿನಗಳಲ್ಲಿ ರಸ್ತೆ ಮೇಲೆ ರಾಗಿ ಒಕ್ಕಣೆ ಮಾಡುತ್ತಿರುವ ಹಿನ್ನೆಲೆ ವಾಹನಗಳಿಂದ ಸೋರುವ ಪೆಟ್ರೋಲ್, ಡೀಸೆಲ್, ಆಯಿಲ್ ಎಲ್ಲವೂ ಸಹ ರಾಗಿಯ ಮೇಲೆ ಬೀಳುತ್ತದೆ.

ರೈತರು ರಾಗಿ ಒಕ್ಕಣೆಯನ್ನು ಕಣದಲ್ಲಿ ಮಾಡುವ ಬದಲಾಗಿ ರಸ್ತೆಯಲ್ಲಿ ಹಾಕುತ್ತಿದ್ದಾರೆ. ಇದರಿಂದಾಗಿ ವಾಹನ ಸವಾರರಿಗೂ ತೊಂದರೆಯಾಗುವ ಜೊತೆಗೆ ರಾಗಿಯೂ ಸಹ ವಿಷಪೂರಿತವಾಗಿ ಬದಲಾಗುತ್ತಿದೆ. ಆದರೆ ಈ ಬಗ್ಗೆ ರೈತರು ಮಾತ್ರ ತಲೆಕೆಡಿಸಿಕೊಳ್ಳುತ್ತಿಲ್ಲ. ರಾಗಿಯ ಫಸಲು ಈ ಬಾರಿ ಉತ್ತಮವಾಗಿ ರೈತರ ಕೈಸೇರಿದೆ. ಆದರೆ ಕಣದ ಬದಲಿಗೆ ರಸ್ತೆಯಲ್ಲಿಯೇ ರಾಗಿಯನ್ನು ಒಕ್ಕಣೆ ಮಾಡುತ್ತಿದ್ದಾರೆ. ಇದರಿಂದಾಗಿ ರಸ್ತೆಯಲ್ಲಿ ಓಡಾಡುವ ಜನರಿಗೂ ತೊಂದರೆಯಾಗುತ್ತಿದೆ.

ಪೊಲೀಸರ ಮಾಹಿತಿ ಪ್ರಕಾರ, ಜಿಲ್ಲೆಯಲ್ಲಿ 5 ವರ್ಷದಲ್ಲಿ ರಸ್ತೆಯಲ್ಲಿ ರಾಗಿ ಒಕ್ಕಣೆ ಮಾಡುವುದರಿಂದ ಅಪಘಾತಕ್ಕೊಳಗಾಗಿ ಹೆಚ್ಚಿನ ಮಂದಿ ಗಂಭೀರವಾಗಿ ಗಾಯಗೊಂಡು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದಿದ್ದಾರೆ.

ಅಪಘಾತಗಳು ಒಂದು ಕಡೆಯಾದರೆ ರಸ್ತೆ ಮೇಲೆ ರಾಗಿ ಒಕ್ಕಣೆ ಮಾಡುವುದರಿಂದ ಜನರ ಆರೋಗ್ಯದ ಮೇಲೆ ವ್ಯತಿರಿಕ್ತ ಪರಿಣಾಮಗಳು ಬೀರುತ್ತವೆ. ರಸ್ತೆ ಮೇಲೆ ರಾಗಿ ಒಕ್ಕಣೆ ಮಾಡುತ್ತಿರುವ ಹಿನ್ನೆಲೆ ವಾಹನಗಳಿಂದ ಸೋರುವ ಪೆಟ್ರೋಲ್, ಡೀಸೆಲ್, ಆಯಿಲ್ ಎಲ್ಲವೂ ಸಹ ರಾಗಿಯ ಮೇಲೆ ಬೀಳುತ್ತದೆ. ಜೊತೆಗೆ ವಾಹನಗಳ ಟೈಯರ್‌ಗಳು ರಾಗಿಯ ಮೇಲೆ ಹೋಗುವುದರಿಂದ ಎಲ್ಲಾ ರೀತಿಯ ಕಸದ ಅಂಶಗಳು ರಾಗಿಯಲ್ಲಿ ಬೆರೆಯುತ್ತದೆ. ಇದರಿಂದಾಗಿ ರಾಗಿ ಸಂಪೂರ್ಣ ವಿಷವಾಗುತ್ತದೆ. ಆ ರಾಗಿಯನ್ನು ತಿನ್ನುವ ಜನರು ಸಹ ರೋಗಕ್ಕೆ ತುತ್ತಾಗುತ್ತಾರೆಂದು ಜನರ ಅಭಿಪ್ರಾಯವಾಗಿದೆ.

‘ರಾಗಿ ಒಕ್ಕಣೆ ಮಾಡದಂತೆ ಈಗಾಗಲೇ ಜನರಿಗೆ ತಿಳಿ ಹೇಳಿದ್ದರೂ ಕೂಡ ರೈತ ವರ್ಗದ ಹಲವು ಮಂದಿ ರಸ್ತೆಗಳಲ್ಲೇ ಒಕ್ಕಣೆ ಮಾಡುತ್ತಿದ್ದಾರೆ. ಇದು ವಾಹನ ಸವಾರರಿಗೆ ಮಾತ್ರವಲ್ಲದೆ, ರಾಗಿ ಸೇವಿಸುವ ಮಂದಿಗೂ ಅಪಾಯ ತಂದೊಡ್ಡುತ್ತಿದ್ದಾರೆ’ ಎಂದು ಪ್ರಜ್ಞಾವಂತ ಗ್ರಾಮ ವಾಸಿಗಳು ಹೇಳುತ್ತಾರೆ.