ಭದ್ರಾವತಿ | ನೈರ್ಮಲ್ಯ ಮರೀಚಿಕೆ, ನಿವಾಸಿಗಳ ಹಿಡಿಶಾಪ

ತಾಲ್ಲೂಕು ಸಾರ್ವಜನಿಕ ಆಸ್ಪತ್ರೆ ಇರುವ ಬಡಾವಣೆ, ಭೋವಿ ಕಾಲೋನಿ, ಗಾಂಧಿನಗರ, ಚಾನೆಲ್ ಏರಿಯಾ, ಕನಕ ಮಂಟಪ ರಸ್ತೆ ಹಿಂಭಾಗ, ರಾಜು ನಾಯ್ಡು ರಸ್ತೆ, ತರೀಕೆರೆ ರಸ್ತೆಯ ಯಕೆನ್ ಶಾ ಕಾಲೊನಿ, ಸಿದ್ಧಾರೂಢ ನಗರ ಬಡಾವಣೆಗಳಲ್ಲಿ ಹೇಳತೀರದಷ್ಟು ನಿರ್ವಹಣೆ ಕಾರ್ಯ ಬಾಕಿ ಉಳಿದಿವೆ.

ಬಡಾವಣೆಯ ಜನರು ಅನೇಕ ಬಾರಿ  ನಗರಸಭೆಯ ಅಧಿಕಾರಿಗಳಿಗೆ ದೂರುಗಳ ಸಲ್ಲಿಸಿದ್ದಾರೆ. ಆದರೂ ಸಹ ಸಂಬಂಧ ಪಟ್ಟ ಅಧಿಕಾರಿಗಳು ಗಮನ ಹರಿಸದೇ, ಸಮಸ್ಯೆಗಳಿಗೆ ಶಾಶ್ವತ ಪರಿಹಾರ ಹುಡುಕದೇ ಸಾಬೂಬುಗಳನ್ನು ಹೇಳುತ್ತಾ ತಾತ್ಕಾಲಿಕ ಪರಿಹಾರಕ್ಕೆ ಒತ್ತು ನೀಡುತ್ತಿದ್ದಾರೆ ಎಂದು ಸ್ಥಳೀಯರಾದ ಕಾಂತಮ್ಮ ಆರೋಪಿಸುತ್ತಾರೆ.

ಸೊಳ್ಳೆ ಕಾಟ ವಿಪರೀತ ಹೆಚ್ಚಳ:

ವಾತಾವರಣದ ಏರುಪೇರಿನಿಂದಾಗಿ ಸೊಳ್ಳೆಗಳು ಹೆಚ್ಚಾಗುತ್ತಿವೆ. ಅವುಗಳಿಗೆ ಪೂರಕವೆಂಬಂತೆ ಚರಂಡಿಗಳಲ್ಲಿ ನಿಂತ ನೀರು, ಇತ್ತೀಚೆಗೆ ಆಗಾಗೆ ಸುರಿಯುತ್ತಿರುವ ಮಳೆಯಿಂದಾಗಿ ಹಳ್ಳ ಕೊಳ್ಳಗಳಲ್ಲಿ ಶೇಖರಣೆ ಗೊಂಡಿರುವ ಅಲ್ಪಸ್ವಲ್ಪ ನೀರಿನಿಂದಾಗಿ ಸೊಳ್ಳೆಗಳ ಉಗಮ ಸ್ಥಾನ ಸೃಷ್ಟಿಯಾಗಿದೆ. ಜನರು ಸಂಜೆಯಾಗುತ್ತಿದ್ದಂತೆ ಕಿಟಕಿ ಬಾಗಿಲುಗಳ ಮುಚ್ಚಿ, ಸೊಳ್ಳೆ ನಿವಾರಕಗಳ ಬಳಸಲೇಬೇಕಾದ ಅನಿವಾರ್ಯತೆ ಸೃಷ್ಟಿಯಾಗಿದೆ ಎಂದು ನಿವೃತ್ತ ಉದ್ಯೋಗಿ ಮಹೇಶ್ ತಿಳಿಸಿದರು.

ತಲೆಕೆಡಿಸಿಕೊಳ್ಳದ ಅಧಿಕಾರಿಗಳು :

ಸ್ವಚ್ಛತೆಯ ನಿರ್ವಹಣೆಗೆ ಪೌರಕಾರ್ಮಿಕರ ಸಂಖ್ಯೆ ಕಡಿಮೆ ಇದೆ ಎಂದು ಅಧಿಕಾರಿಗಳು ಹೇಳುತ್ತಾರೆ. ಭೂತನ ಗುಡಿ ವಾರ್ಡ್ ನಲ್ಲಿ ಸೊಳ್ಳೆ ಔಷಧಿ ಸಿಂಪಡಿಸಿ ಬಹಳಷ್ಟು ಕಾಲ ಆಗಿದೆ. ನಗರಸಭೆ ಅಧಿಕಾರಿಗಳ ಕೇಳಿದರೆ, 15 ದಿನಕ್ಕೊಮ್ಮೆ ಪ್ರತಿ ವಾರ್ಡ್ ಗಳಿಗೂ ಸಿಂಪಡಿಸಲಾಗುತ್ತಿದೆ. ನಿಮ್ಮ ವಾರ್ಡಿಗೆ ಬರಲಿಲ್ಲವೇ ಎಂಬುದಾಗಿ ಮರುಪ್ರಶ್ನಿಸುತ್ತಾರೆ‘ ಎಂದು ಸ್ಥಳೀಯರು ದೂರುತ್ತಾರೆ.

ರಸ್ತೆ, ಚರಂಡಿ, ಕಸ ಬಿಸಾಡುವ ಸ್ಥಳಗಳನ್ನು ಸ್ವಚ್ಛಗೊಳಿಸಲು ದೈನಂದಿನ ಸ್ವಚ್ಛತಾ ಸಿಬ್ಬಂದಿ, ಮೇಲ್ವಿಚಾರಕರನ್ನು ನಿಯೋಜಿಸಿ, ದೈನಂದಿನ ನಿರ್ವಹಣೆ ಕಡ್ಡಾಯಗೊಳಿಸಬೇಕಿದೆ ಎಂದು ಅಂಗನವಾಡಿ ಕಾರ್ಯಕರ್ತೆಯೊಬ್ಬರು ತಿಳಿಸಿದರು