ಗುರುವಾರ , ಜೂಲೈ 9, 2020
26 °C

ಒಂದು ಕಡಿದು ಹತ್ತು ಮರ ಬೆಳೆಸಿದ ಶಿವಣ್ಣ ದಂಪತಿ

ಟಿ.ಎಚ್.ಗುರುಚರಣ್ ಸಿಂಗ್ Updated:

ಅಕ್ಷರ ಗಾತ್ರ : | |

Prajavani

ಕುಣಿಗಲ್: ಮರ ಕಡಿದು ಮಾರಾಟಮಾಡುವ ವೃತ್ತಿ ಮಾಡುವ ದಂಪತಿ ಒಂದು ಮರ ಕಡಿದರೆ ಹತ್ತು ಸಸಿ ನೆಟ್ಟು ಬೆಳೆಸುತ್ತಿದ್ದಾರೆ. ಈ ಕಾಯಕದಿಂದ ಇದುವರೆಗೂ ಬೆಳೆದು ನಿಂತ ಮರಗಳು ಬರೋಬ್ಬರಿ 20 ಸಾವಿರ. ಅರೆಪಾಳ್ಯದ ಶಿವಣ್ಣ ದಂಪತಿಯ ಪರಿಸರ ಪ್ರೇಮ ಎಲ್ಲರ ಗಮನಸೆಳೆದಿದೆ.

ತಾಲ್ಲೂಕಿನ ಸಂತೆ ಮಾವತ್ತೂರು ಪಂಚಾಯಿತಿಯ ಅರೆಪಾಳ್ಯದ ಶಿವಣ್ಣ ಮರಗಳನ್ನು ಖರೀದಿಸಿ ಕಡಿದು ಮಾರಾಟ ಮಾಡುವ ಕೆಲಸದಲ್ಲಿ ತೊಡಗಿಸಿಕೊಂಡಿದ್ದಾರೆ. ಹೀಗೆ ವ್ಯಾಪಾರ ಮಾಡುವ ಸಮಯದಲ್ಲಿ ಹಿರಿಯರೊಬ್ಬರು ‘ವ್ಯಾಪಾರಕ್ಕಾಗಿ ಮರ ಕಡಿಯುತ್ತಾ ಹೋದರೆ ಪರಿಸರ ಉಳಿಯುವುದೆ’ ಎಂದು ಪ್ರಶ್ನಿಸಿದರು. ಅಂದೇ ಶಿವಣ್ಣ ಅವರ ಮನಸ್ಸಿನಲ್ಲಿ ಹೊಸ ಆಲೋಚನೆ ಮೂಡಿ ಮರ ನೆಡುವ ಕಾಯಕಕ್ಕೆ ಮುಂದಾದರು. ಏಳು ವರ್ಷಗಳಿಂದ ಇದು ನಿರಂತರವಾಗಿ ಸಾಗಿದೆ. ಒಂದು ಮರ ಕಡಿದರೆ ಹತ್ತು ಮರ ಬೆಳೆಸುವ ಶಪಥದೊಂದಿಗೆ ಕಾರ್ಯಪ್ರವೃತ್ತರಾಗಿದ್ದಾರೆ.

ಮೊದಲಿಗೆ ಖಾಸಗಿ ನರ್ಸರಿಗಳಿಂದ ಸಸಿಗಳನ್ನು ಖರೀದಿಸಿ ತಮ್ಮ 20 ಎಕರೆ ಜಮೀನಿನಲ್ಲಿ ನೆಟ್ಟು ಬೆಳೆಸಲಾರಂಭಿಸಿದರು. ಅರಣ್ಯ ಇಲಾಖೆಯಿಂದ ಪ್ರತಿವರ್ಷ 500ರಿಂದ 600 ಹೊನ್ನೆ, ಬೀಟೆ, ಸಿಲ್ವರ್, ಹೊಂಗೆ, ತೇಗ, ಯಾಬೇವಿನ ಸಸಿಗಳನ್ನು ನೆಟ್ಟು ಬೆಳೆಸುತ್ತಿದ್ದಾರೆ.

‘ಬೆಳೆದ ಮರಗಳನ್ನು ಕಟಾವುಮಾಡಿ ಮಾರಿದ್ದರಿಂದ ಕಳೆದ ವರ್ಷ ಸುಮಾರು ₹5 ಲಕ್ಷ ಆದಾಯ ಬಂದಿದೆ. ಸುಮಾರು 200 ಶ್ರೀಗಂಧದ ಮರಗಳನ್ನು ಬೆಳೆದಿದ್ದೇವೆ. ಆದರೆ, ದುಷ್ಕರ್ಮಿಗಳು ಕಳವು ಮಾಡುತ್ತಾರೆ. ಅವುಗಳ ನಿರ್ವಹಣೆ ಕಷ್ಟವಾಗಿದೆ’ ಎನ್ನುತ್ತಾರೆ ಶಿವಣ್ಣ.

ಶಿವಣ್ಣ ಅವರ ಮರ ಬೆಳೆಸುವ ಉತ್ಸಾಹಕ್ಕೆ ಪತ್ನಿ ಗೌರಮ್ಮ, ಮಕ್ಕಳಾದ ಲಕ್ಷ್ಮಣ, ವಸಂತ್ ಸಾಥ್ ನೀಡಿದ್ದಾರೆ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.