ಹುಳಿಯಾರು: ಜಲ ಸಾಹಸ ತರಬೇತಿ ತಾಣವಾದೀತೆ ಬೋರನಕಣಿವೆ

ತುಮಕೂರು ಜಿಲ್ಲೆಯಲ್ಲಿ ಮಾರ್ಕೋನಹಳ್ಳಿ ಜಲಾಶಯ ಬಿಟ್ಟರೆ ಬೋರನಕಣಿವೆ ಎರಡನೇ ದೊಡ್ಡ ಜಲಾಶಯ. 30 ಅಡಿ ಆಳ ಹಾಗೂ ವಿಶಾಲವಾದ ಹಿನ್ನೀರಿನ ಪ್ರದೇಶವನ್ನು ಹೊಂದಿದೆ. ಹಿನ್ನೀರಿನ ಪ್ರದೇಶದಲ್ಲಿ ಕಾರೇಹಳ್ಳಿ ರಂಗನಾಥಸ್ವಾಮಿ ದೇಗುಲದ ವಿಶಾಲ ಆವರಣವಿದೆ. ಅಲ್ಲದೆ ಜಲಾಶಯ ಏರಿ ಮತ್ತು ಕೋಡಿ ನೀರು ಒಂದೇ ಕಡೆ ಹರಿಯುತ್ತದೆ. ಜಲಾಶಯದ ಮುಂಭಾಗ ಕೂಡ ಸುಂದರ ಸ್ಥಳವಾಗಿದೆ.

ಬಾವಿಗಳಲ್ಲಿ ನೀರಿಲ್ಲ: 20 ವರ್ಷಗಳಿಂದ ಅಂತರ್ಜಲ ಮಟ್ಟ ಕುಸಿತದಿಂದ ಬಾವಿಗಳಲ್ಲಿ ನೀರು ಇಂಗಿ ಹೋಗಿದೆ. ಮೊದಲೆಲ್ಲಾ ಕೆರೆ, ಕಟ್ಟೆ, ಬಾವಿಗಳಲ್ಲಿ ಚಿಕ್ಕ ವಯಸ್ಸಿನಲ್ಲಿ ಹಿರಿಯರ ಮಾರ್ಗದರ್ಶನದಲ್ಲಿ ಈಜು ಕಲಿಯಲು ಅವಕಾಶವಿತ್ತು. ಆದರೆ ಬಾವಿಗಳಲ್ಲಿ ನೀರಿಲ್ಲ. ಇನ್ನೂ ಕೆರೆ ಕಟ್ಟೆಗಳಲ್ಲಿ ಬಹು ವರ್ಷ ನೀರು ತುಂಬದೆ ಗಿಡ-ಗಂಟಿಗಳು ಬೆಳೆದು ತುಂಬಿದಾಗಲೂ ಅವುಗಳಲ್ಲಿ ಈಜಾಡುವುದು ದುಸ್ಸಾಹಸವಾಗಿದೆ. ಇದರಿಂದ ಇಂದಿನ ಯುವಕರಿಗೆ ಈಜು ಕಲಿಯುವುದು ಕನಸಿನ ಮಾತಾಗಿದೆ.

ಅನುಕೂಲ ಏನು: ತುಮಕೂರು ಜಿಲ್ಲೆಯಲ್ಲಿ ಎಲ್ಲಿಯೂ ಜಲ ಸಾಹಸ ಕ್ರೀಡೆಗಳಿಗೆ ಅವಕಾಶ ಕಲ್ಪಿಸಿಲ್ಲ. ಇದರಿಂದ ಜಿಲ್ಲೆಯ ವಿದ್ಯಾರ್ಥಿಗಳು, ಸ್ವಯಂ ಸೇವಕರು ಸಾಹಸ ಕ್ರೀಡೆಗಳಿಂದ ವಂಚಿತರಾಗುತ್ತಿದ್ದಾರೆ. ಬೋರನಕಣಿವೆ ಜಲಾಶಯದಲ್ಲಿ ಜಲ ಸಾಹಸ ತರಬೇತಿ ಆರಂಭಿಸುವುದರಿಂದ ಯುವಕರಲ್ಲಿ ಸಾಹಸ ಮನೋಭಾವನೆ ತುಂಬುವುದು ಹಾಗೂ ಅವರಲ್ಲಿ ಆತ್ಮವಿಶ್ವಾಸ ಹೆಚ್ಚಿಸಲು ಅನುಕೂಲವಾಗುತ್ತದೆ. ಅಲ್ಲದೆ ಜಲ ಕ್ರೀಡೆಗಳ ತರಬೇತಿ ನೀಡುವುದರಿಂದ ಜಲ ಕಂಟಕಗಳು ಎದುರಾದಾಗ ಸಮರ್ಥವಾಗಿ ಎದುರಿಸಲು ಸಜ್ಜುಗೊಳಿಸಿದಂತಾಗುತ್ತದೆ ಎನ್ನುವುದು ಅನೇಕರ ಅಭಿಪ್ರಾಯ.

ಎಲ್ಲೆಲ್ಲಿ ತರಬೇತಿ: ಈಗಾಗಲೇ ಚಿತ್ರದುರ್ಗ ಜಿಲ್ಲೆಯ ವಿ.ವಿ.ಸಾಗರ ಜಲಾಶಯದಲ್ಲಿ ಯುವ ಸಬಲೀಕರಣ ಹಾಗೂ ಕ್ರೀಡಾ ಇಲಾಖೆಯಿಂದ ಜನರಲ್‌ ತಿಮ್ಮಯ್ಯ ರಾಷ್ಟ್ರೀಯ ಸಾಹಸ ಅಕಾಡಮಿಯಿಂದ ಜಲ ಸಾಹಸ ಕ್ರೀಡಾ ತರಬೇತಿ ನಿರಂತರವಾಗಿ ನಡೆಯುತ್ತಿದೆ. ತರಬೇತಿಯಲ್ಲಿ ಈಜು ಸೇರಿದಂತೆ ವಿವಿಧ ತರಬೇತಿ ನೀಡಲಾಗುತ್ತಿದೆ. ಚಿತ್ರದುರ್ಗ ಮಾತ್ರವಲ್ಲದೆ ದಾಂಡೇಲಿ, ರಾಮನಗರ, ಬಾದಾಮಿ, ಕಾರವಾರ, ಕೊಡಗು ಪ್ರದೇಶಗಳಲ್ಲಿಯೂ ತರಬೇತಿ ನೀಡಲಾಗುತ್ತಿದೆ.