ತುಮಕೂರು- ತರಕಾರಿ, ಸೊಪ್ಪು ಧಾರಣೆ ಇಳಿಕೆ

ಕಳೆದ ವಾರ ಏರಿಕೆಯಾಗಿದ್ದ ತರಕಾರಿ ಬೆಲೆ ಈ ವಾರ ಕಡಿಮೆಯಾಗಿದೆ. ಮಳೆ ನಿಂತ ನಂತರ ತರಕಾರಿ ಆವಕ ಹೆಚ್ಚಳವಾಗಿದ್ದು, ಧಾರಣೆ ಸಾಕಷ್ಟು ಪ್ರಮಾಣದಲ್ಲಿ ಇಳಿದಿದೆ. ಮುಂದಿನ ಒಂದೆರಡು ವಾರಗಳಲ್ಲಿ ಮತ್ತಷ್ಟು ತಗ್ಗಲಿದೆ ಎಂದು ಮಾರುಕಟ್ಟೆ ಮೂಲಗಳು ತಿಳಿಸಿವೆ.

ಬಹುತೇಕ ತರಕಾರಿಗಳ ಬೆಲೆ ಅರ್ಧದಷ್ಟು ಇಳಿಕೆಯಾಗಿದ್ದು, ಬೀನ್ಸ್ ಬೆಲೆ ಅರ್ಧದಷ್ಟು ತಗ್ಗಿದ್ದು ಕೆ.ಜಿ ₹30–40ಕ್ಕೆ ಕುಸಿದಿದೆ. ಗೆಡ್ಡೆಕೋಸು ದರ ಗಣನೀಯವಾಗಿ ಕಡಿಮೆಯಾಗಿದ್ದು, ಕೆ.ಜಿ ₹30–40ಕ್ಕೆ ಬಂದಿದೆ. ಸದಾ ಕಡಿಮೆ ಬೆಲೆಗೆ ಸಿಗುತ್ತಿದ್ದಮೂಲಂಗಿ ಸಹ ದುಬಾರಿಯಾಗಿತ್ತು. ಈ ವಾರ ಕೆ.ಜಿ ₹10–15ಕ್ಕೆ ತಲುಪಿದೆ. ಸಾಕಷ್ಟು ಪ್ರಮಾಣದಲ್ಲಿ ಏರಿಕೆಯಾಗಿದ್ದ ಹಸಿರು ಮೆಣಸಿನ ಕಾಯಿ, ಸ್ವಲ್ಪ ಮಟ್ಟಿಗೆ ಕಡಿಮೆಯಾಗಿದ್ದು, ಕೆ.ಜಿ ₹50–60ಕ್ಕೆ ಇಳಿಕೆ ಕಂಡಿದೆ.

ಕ್ಯಾರೆಟ್, ಆಲೂಗಡ್ಡೆ, ಬೆಂಡೆಕಾಯಿ, ಬದನೆಕಾಯಿ, ಹೂ ಕೋಸು, ತೊಂಡೆಕಾಯಿ, ಹಾಗಲಕಾಯಿ ದರ ಕಡಿಮೆಯಾಗಿದ್ದು, ನುಗ್ಗೆಕಾಯಿ ಕೆ.ಜಿ ₹100 ದಾಟಿದೆ. ಈರುಳ್ಳಿ ಧಾರಣೆ ನಿಧಾನವಾಗಿ ಏರಿಕೆಯತ್ತ ಸಾಗಿದೆ. ಸೌತೆಕಾಯಿ ಸಹ ಅಲ್ಪ ಹೆಚ್ಚಳವಾಗಿದೆ. ವಾರದಿಂದ ವಾರಕ್ಕೆ ಕುಸಿಯುತ್ತಲೇ ಇದ್ದ ಟೊಮೆಟೊ ಮತ್ತೆ ಈ ವಾರ ಸಹ ಅದೇ ದಾರಿಯಲ್ಲಿ ಸಾಗಿದ್ದು, ಕೆ.ಜಿ ₹10–15ಕ್ಕೆ ಇಳಿದಿದೆ. ಮುಂದಿನ ದಿನಗಳಲ್ಲಿ ಬೆಲೆ ಏರಿಕೆ ಕಷ್ಟಕರ ಎಂಬಂತಹ ವಾತಾವರಣ ಮಾರುಕಟ್ಟೆಯಲ್ಲಿ ಕಂಡು ಬರುತ್ತಿದೆ. ಆವಕ ಹೆಚ್ಚಾಗಿರುವುದೇ ಬೆಲೆ ಇಳಿಕೆಗೆ ಕಾರಣವಾಗಿದೆ.

ಸೊಪ್ಪು ಅಗ್ಗ: ಕುಸಿತ ಕಂಡು ಮತ್ತೆ ಚೇತರಿಸಿಕೊಂಡಿದ್ದ ಸೊಪ್ಪು, ಈ ವಾರ ಮತ್ತೊಮ್ಮೆ ಇಳಿಕೆಯತ್ತ ಮುಖ ಮಾಡಿದೆ. ಪಾಲಕ್ ಬಿಟ್ಟರೆ ಉಳಿದ ಸೊಪ್ಪು ಧಾರಣೆ ಕುಸಿದಿದ್ದು, ಸಬ್ಬಕ್ಕಿ ಸೊಪ್ಪು ಅರ್ಧದಷ್ಟು ಕಡಿಮೆಯಾಗಿದೆ. ಕೊತ್ತಂಬರಿ ಸೊಪ್ಪು ಕೆ.ಜಿ ₹30–40, ಸಬ್ಬಕ್ಕಿ ಕೆ.ಜಿ ₹30–40, ಮೆಂತ್ಯ ಸೊಪ್ಪು ಕೆ.ಜಿ ₹40–50, ಪಾಲಕ್ ಸೊಪ್ಪು (ಕಟ್ಟು) ₹30ಕ್ಕೆ ಅಂತರಸನಹಳ್ಳಿ ಮಾರುಕಟ್ಟೆಯಲ್ಲಿ ಮಾರಾಟ
ವಾಗುತ್ತಿದೆ.

ಹಣ್ಣು ದುಬಾರಿ: ಹಣ್ಣುಗಳ ಬೆಲೆ ಮತ್ತಷ್ಟು ದುಬಾರಿಯಾಗುತ್ತಲೇ ಸಾಗಿದ್ದು, ಸೇಬು, ಕಿತ್ತಳೆ ಬಿಟ್ಟರೆ ಉಳಿದ ಹಣ್ಣುಗಳ ದರ ಹೆಚ್ಚಳವಾಗಿದೆ. ಕಲ್ಲಂಗಡಿ, ಪಪ್ಪಾಯ ಹಣ್ಣು ಕೆ.ಜಿ ₹40ಕ್ಕೆ ತಲುಪಿದ್ದು, ದಾಳಿಂಬೆ, ಮೂಸಂಬಿ, ಸಪೋಟ ಸಹ ದುಬಾರಿಯಾಗಿವೆ. ಬಾಳೆ ಹಣ್ಣಿನ ಬೆಲೆಯೂ ಇಳಿಕೆಯಾಗುತ್ತಿಲ್ಲ. ದ್ರಾಕ್ಷಿ ಮತ್ತಷ್ಟು ದುಬಾರಿಯಾಗಿದೆ.

ಅಡುಗೆ ಎಣ್ಣೆ ಸ್ಥಿರ: ಏರಿಳಿತ ಕಂಡಿದ್ದ ಖಾದ್ಯ ತೈಲ ಈ ವಾರ ಹೆಚ್ಚಿನ ವ್ಯತ್ಯಾಸ ಕಂಡಿಲ್ಲ. ಸನ್‌ಫ್ಲವರ್ ಕೆ.ಜಿ ₹155, ಪಾಮಾಯಿಲ್ ಕೆ.ಜಿ ₹101–105, ಕಡಲೆಕಾಯಿ ಎಣ್ಣೆ ಕೆ.ಜಿ ₹155–160ಕ್ಕೆ ಮಂಡಿಪೇಟೆ ಮಾರುಕಟ್ಟೆಯಲ್ಲಿ ಮಾರಾಟವಾಗುತ್ತಿದೆ.

ಬೇಳೆ ಧಾರಣೆ: ಕಳೆದ ಎರಡು ವಾರಗಳಿಂದ ಬೇಳೆ ಕಾಳುಗಳ ಧಾರಣೆ ಅಲ್ಪ ಪ್ರಮಾಣದಲ್ಲಿ ಏರಿಕೆ ಕಂಡಿದ್ದು, ಈ ವಾರ ಹೆಚ್ಚಿನ ವ್ಯತ್ಯಾಸವಾಗಿಲ್ಲ. ಬಹುತೇಕ ಸ್ಥಿರವಾಗಿರುವುದು ಮಂಡಿಪೇಟೆ ಮಾರುಕಟ್ಟೆಯಲ್ಲಿ ಕಂಡುಬರುತ್ತದೆ.

ಮಸಾಲೆ ಪದಾರ್ಥ: ಮಸಾಲೆ ಪದಾರ್ಥಗಳ ಬೆಲೆಯಲ್ಲೂ ಹೆಚ್ಚಿನ ವ್ಯತ್ಯಾಸ ಕಂಡುಬಂದಿಲ್ಲ. ಧನ್ಯ ಕೆ.ಜಿ ₹155–180, ಬ್ಯಾಡಗಿ ಮೆಣಸಿನಕಾಯಿ ಕೆ.ಜಿ ₹500–530, ಗೌರಿಬಿದನೂರು ಖಾರದ ಮೆಣಸಿನಕಾಯಿ ಕೆ.ಜಿ ₹260–280, ಮೆಣಸು ಕೆ.ಜಿ ₹540–560, ಜೀರಿಗೆ ಕೆ.ಜಿ ₹285–290, ಸಾಸಿವೆ ಕೆ.ಜಿ ₹80–85, ಮೆಂತ್ಯ ಕೆ.ಜಿ ₹80–85, ಚಕ್ಕೆ ಕೆ.ಜಿ ₹300–320, ಲವಂಗ ಕೆ.ಜಿ ₹750–780, ಗುಣಮಟ್ಟದ ಗಸಗಸೆ ಕೆ.ಜಿ ₹1,400–1,500, ಬಾದಾಮಿ ಕೆ.ಜಿ ₹620–650, ಗೋಡಂಬಿ ಕೆ.ಜಿ ₹680–720, ದ್ರಾಕ್ಷಿ ಕೆ.ಜಿ ₹230–240, ಹುಣಸೆಹಣ್ಣು ₹80–120ಕ್ಕೆ ಮಂಡಿಪೇಟೆ ಮಾರುಕಟ್ಟೆಯಲ್ಲಿ ಮಾರಾಟವಾಗುತ್ತಿದೆ.

ಕೋಳಿ ಅಲ್ಪ ದುಬಾರಿ: ಕಾರ್ತಿಕ ಮಾಸದಲ್ಲಿ ಸಾಕಷ್ಟು ಸಂಖ್ಯೆಯ ಜನರು ಮಾಂಸಹಾರ ತ್ಯಜಿಸುವುದರಿಂದ ಕೋಳಿ ಮಾಂಸದ ಬೆಲೆ ಇಳಿಕೆಯಾಗಲಿದೆ ಎಂದು ನಿರೀಕ್ಷಿಸಲಾಗಿತ್ತು. ಆದರೆ ಅಲ್ಪ ಪ್ರಮಾಣದಲ್ಲಿ ಏರಿಕೆ ಕಂಡಿದ್ದು, ಬ್ರಾಯ್ಲರ್ ಕೋಳಿ ಕೆ.ಜಿ ₹140, ರೆಡಿ ಚಿಕನ್ ಕೆ.ಜಿ ₹220, ಸ್ಕಿನ್ ಲೆಸ್ ಕೆ.ಜಿ ₹240, ಮೊಟ್ಟೆ ಕೋಳಿ (ಫಾರಂ) ಕೆ.ಜಿ ₹127ಕ್ಕೆ ಮಾರಾಟ
ವಾಗುತ್ತಿದೆ.

ಅಂಜಲ್ ಮೀನು ಏರಿಕೆ: ಕೆಲವು ಮೀನಿನ ಬೆಲೆ ಇಳಿಕೆಯಾಗಿದ್ದರೆ, ಕೆಲವು ದುಬಾರಿಯಾಗಿವೆ. ಬಂಗುಡೆ, ಬೂತಾಯಿ ಮೀನು ದರ ಗಣನೀಯವಾಗಿ ಕಡಿಮೆಯಾಗಿದ್ದರೆ, ಅಂಜಲ್ ಮೀನು ಬೆಲೆ ಏರಿಕೆಯಾಗಿದೆ. ಈಗ ಬಂಗುಡೆ, ಬೂತಾಯಿ ಹೆಚ್ಚಿನ ಪ್ರಮಾಣದಲ್ಲಿ ಬರುತ್ತಿದ್ದರೆ, ಇತರೆ ಮೀನು ಬೇಡಿಕೆಗೆ ತಕ್ಕಷ್ಟು ಬರುತ್ತಿಲ್ಲ. ಬಂಗುಡೆ ಕೆ.ಜಿ ₹160, ಬೂತಾಯಿ ಕೆ.ಜಿ ₹110, ಅಂಜಲ್ ಕೆ.ಜಿ ₹870, ಬಿಳಿಮಾಂಜಿ ಕೆ.ಜಿ ₹830, ಸೀಗಡಿ ಕೆ.ಜಿ ₹590ಕ್ಕೆ ನಗರದ ಮತ್ಸ್ಯದರ್ಶಿನಿಯಲ್ಲಿ ಮಾರಾಟವಾಗುತ್ತಿದೆ.