ಮಳೆ, ಮೋಡ ಕವಿದ ವಾತಾವರಣ; ಹೂವು ಬೆಳೆಗಾರರಿಗೆ ನಷ್ಟದ ಭೀತಿ

ಶ್ರವಣ ಮಾಸದಲ್ಲಿನ ಹಬ್ಬ, ಮದುವೆ ಮತ್ತು ಸಮಾರಂಭಗಳಿಗೆ ಹೂವಿನ ಫಸಲು ಬರುವಂತೆ ಯೋಚಿಸಿ ನೂರಾರು ಎಕರೆಯಲ್ಲಿ ಹೂವು ಬೆಳೆದಿದ್ದಾರೆ. ಆದರೀಗ ಹೂವಿನ ತಾಕುಗಳು ಮಳೆ ನೀರು ಕುಡಿದು ಬೇರು ಕೊಳೆಯಲು ಪ್ರಾರಂಭವಾಗಿದೆ. ಗಿಡಗಳಿಗೆ ಸೊರಗು ರೋಗ ಬರುವ ಮುನ್ಸೂಚನೆ ಕಂಡು ಬರುತ್ತಿದೆ. ಗಿಡಗಳಿಗೆ ಹುಳಗಳು ಬಿದ್ದು ಹಾಳಾಗುವುದು ಹೆಚ್ಚುತ್ತಿದೆ. ಮೋಡದ ಕಾರಣ ಹೂವು ಸರಿಯಾಗಿ ಬರದೇ ಮೊಗ್ಗಿನಲ್ಲಿ ನಲುಗುತ್ತಿವೆ.

ಮೋಡದ ವಾತಾವರಣದಲ್ಲಿ ಔಷಧಿ ಸಿಂಪಡಣೆ ಮಾಡಿದರೆ ಉಪಯೋಗವಿಲ್ಲ. ಬಿಸಿಲು ಇದ್ದರೆ ಹೂವಿನ ಬೇಸಾಯಕ್ಕೆ ಸೂಕ್ತವಾಗಿರುತ್ತದೆ ಎನ್ನುತ್ತಾರೆ ಬೆಳೆಗಾರ ಉಪ್ಪಾರ ಪಾಳ್ಯದ ಜೆ.ಸಿ.ಸೋಮಶೇಖರ್.

ಹೂವಿನ ತಾಕುಗಳಲ್ಲಿ ಇಳಿಜಾರು ಇದ್ದರೆ ಬಿದ್ದ ಮಳೆ ನೀರು ಹರಿದು ಹೋಗುತ್ತದೆ. ತುಂತುರು ಮಳೆಯಾದಾಗ ಮಳೆ ನೀರು ಭೂಮಿಯಲ್ಲಿ ಇಂಗುತ್ತದೆ.

ಹಲವು ದಿನಗಳ ಮೋಡದ ವಾತಾವರಣ ಹೂವಿನ ತಾಕುಗಳಿಗೆ ಸಮಸ್ಯೆ ತರುತ್ತಿದೆ. ಈಗಾಗಲೇ ರೋಗ ಕಾಣಿಸಿಕೊಂಡಿದ್ದು, ಔಷಧಿ ಸಿಂಪಡಣೆ ಮಾಡಿದ ದಿನವೇ ಮಳೆ ಬಂದ ಕಾರಣ ₹2,000 ನಷ್ಟವಾಯಿತು ಎನ್ನುತ್ತಾರೆ ಬೆಳೆಗಾರ ಮಣುವಿನಕುರಿಕೆಕಾವಲಪ್ಪ.