ಕೊಡಿಗೇನಹಳ್ಳಿ: ಮಣ್ಣಿನ ಮಡಿಕೆಯಲ್ಲಿ ಪಾರಿವಾಳಗಳ ಪರಿವಾರ

ಪುರವರ ಹೋಬಳಿಯ ದೊಡ್ಡಹೊಸಹಳ್ಳಿ ಗ್ರಾಮದ ರಾಮಾಂಜನೇಯಸ್ವಾಮಿ ದೇವಸ್ಥಾನದ ಬಲಭಾಗದ ಮಣ್ಣಿನ ಗೂಡಿನಲ್ಲಿ ನೂರಾರು ವರ್ಷಗಳಿಂದ ಪಾರಿವಾಳಗಳ ಪರಿವಾರ ನೆಲೆಸಿದೆ.

200 ವರ್ಷದ ಹಿಂದೆ ಪಟೇಲ್ ನರಸೇಗೌಡ ಅವರಿಗೆ ಪಾರಿವಾಳಗಳೆಂದರೆ ಮೆಚ್ಚು. ಹಾಗಾಗಿ ಅವರು ಎರಡು ಪಾರಿವಾಳಗಳನ್ನು ಬೇರೆಡೆಯಿಂದ ತಂದು ಗ್ರಾಮದಲ್ಲಿನ ರಾಮಾಂಜನೇಯ ದೇವಸ್ಥಾನದ ಬಲಭಾಗದಲ್ಲಿ ಗೂಡು ಕಟ್ಟಿ ಬಿಟ್ಟದ್ದರಂತೆ. ಮುಂದೆ ಪಾರಿವಾಳಗಳ ಸಂತತಿ ಹೆಚ್ಚಾಗಿದ್ದಕ್ಕೆ ಅವುಗಳ ವಾಸಕ್ಕೆ ತೊಡಕಾಗದಂತೆ ನರಸೇಗೌಡರು ಕೆಲ ಗ್ರಾಮಸ್ಥರ ಸಹಕಾರದೊಂದಿಗೆ ಕಲ್ಲು ಕಂಬಗಳ ಮೇಲೆ ಕಲ್ಲುಗಳನ್ನು ಇರಿಸಿ ಅದರ ಮೇಲೆ ಮಣ್ಣಿನ ಮಡಿಕೆಗಳನ್ನು ಇಟ್ಟು ಗೂಡು ತಯಾರಿಸಿದರು. ಪಾರಿವಾಳಗಳ ಸಂತತಿ ಬೆಳೆದು ಇಂದು 250ಕ್ಕಿಂತ ಹೆಚ್ಚು ಪಾರಿವಾಳಗಳು ಇಲ್ಲಿ ಬೀಡು ಬಿಟ್ಟಿವೆ.

‘ಪಾರಿವಾಳಗಳು ಕೆಲ ಕಾಯಿಲೆಗಳಿಗೆ ಮದ್ದಾಗಿರುವುದರಿಂದ, ನಮ್ಮ ಸಂಬಂಧಿಕರಿಗೆ ಪಾರ್ಶ್ವವಾಯು ಪೀಡಿತರಾಗಿದ್ದಾರೆ, ಇತರೆ ಕಾಯಿಲೆಯಾಗಿದೆ. ಆ ಕಾಯಿಲೆಗೆ ಪಾರಿವಾಳ ಮಾಂಸ ಮದ್ದು. ಹಾಗಾಗಿ ಒಂದೆರೆಡು ಹಿಡಿದುಕೊಂಡು ಹೋಗುತ್ತೇವೆ ಎಂದು ಕೆಲವರು ಪಾರಿವಾಳ ಹಿಡಿದುಕೊಂಡು ಹೋಗುತ್ತಿದ್ದಾರೆ. ಇಲ್ಲದಿದ್ದರೆ ಅವುಗಳ ಸಂಖ್ಯೆ ಇನ್ನೂ ಸಾವಿರಾರು ಆಗುತ್ತಿತ್ತು’ ಎನ್ನುತ್ತಾರೆ ಗ್ರಾಮಸ್ಥ ನರಸೇಗೌಡ.

ಪಾರಿವಾಳು ಬಹಳ ಅದ್ಭುತ ನೆನಪಿನ ಶಕ್ತಿಯನ್ನು ಹೊಂದಿರುವುದಲ್ಲದೆ, ಅತ್ಯಂತ ಶಾಂತ ಸ್ವಭಾವದ ಪಕ್ಷಿಯಾಗಿರುವುದರಿಂದ ಹಿಂದಿನಿಂದಲೂ ರಾಜರು ಮತ್ತು ಕೆಲವರು ಅವುಗಳನ್ನು ಇಷ್ಟಪಟ್ಟು ಸಾಕುತ್ತಿದ್ದರು. ಪಾರಿವಾಳ ಮಂಗಳಕರ ಪಕ್ಷಿ ಎಂದು ಮತ್ತು ಅವುಗಳು ಮನೆಯಲ್ಲಿ ಇದ್ದರೆ ಲಕ್ಷ್ಮಿದೇವಿ ಇದ್ದಂತೆ ಎನ್ನುವುದರ ಜೊತೆಗೆ ಜನರು ಅನಾದಿ ಕಾಲದಿಂದಲೂ ಪಾರಿವಾಳಗಳೊಂದಿಗೆ ಉತ್ತಮ ಸಂಬಂಧ ಹೊಂದಿರುವುದರಿಂದ ನಮ್ಮ ಗ್ರಾಮದಲ್ಲೂ ದಿವಂಗತ ಪಟೇಲ್ ನರಸೇಗೌಡರು ತಂದು ಸಾಕಿರಬಹುದು ಎಂದು ಗ್ರಾಮದ ಹಿರಿಯರಾದ ನರಸಿಂಹಮೂರ್ತಿ ವಿವರಿಸಿದರು.