ಹಾಡು ಹಗಲೇ ಕಳ್ಳತನ

ಸರ್ಕಲ್ ಬಳಿಯ ಅಂಗಡಿ ಮಾಲೀಕ ಆನಂದ್ ಅವರ ಪತ್ನಿ ಪೂಜೆ ಮುಗಿಸಿ ತಮ್ಮ ಮನೆಗೆ ತೆರಳಿದ ಸಂದರ್ಭದಲ್ಲಿ ಅವರನ್ನೇ ಹಿಂಬಾಲಿಸಿ ಮನೆಗೆ ನುಗ್ಗಿದ ದುಷ್ಕರ್ಮಿ ಅವರ ಕತ್ತಿನಲ್ಲಿದ್ದ ಮಾಂಗಲ್ಯ ಸರವನ್ನು ಕಸಿದು ಅಲ್ಲಿಂದ ಕಾಲ್ಕಿತ್ತಿದ್ದ. ಮಹಿಳೆಯ ಆಕ್ರಂದನ ಆಲಿಸಿದ ಸ್ಥಳೀಯ ಯುವಕರು ಕಳ್ಳನನ್ನು ಹಿಂಬಾಲಿಸಿ ಹುಡುಕಾಟ ನಡೆಸಿದರು. ಕಾಯೀಪೇಟೆ ಮಸೀದಿಯ ಪಕ್ಕದ ಬೇಲಿ ಸಾಲಿನಲ್ಲಿ ಅವಿತಿದ್ದ ಕಳ್ಳನನ್ನು ಹಿಡಿದು ತಕ್ಷಣ ಗುಬ್ಬಿ ಪೊಲೀಸರಿಗೆ ಒಪ್ಪಿಸಿದರು.

ಸ್ಥಳೀಯ ಆಟೊಚಾಲಕ ಈ ದುಷ್ಕೃತ್ಯ ನಡೆಸಿರುವ ಬಗ್ಗೆ ಪೊಲೀಸ್ ಮೂಲಗಳು ತಿಳಿಸಿವೆ. ಪ್ರಕರಣ ದಾಖಲಿಸಿಕೊಂಡ ಗುಬ್ಬಿ ಠಾಣಾ ಪಿಎಸ್‍ಐ ಕಾಂತರಾಜು ಮುಂದಿನ ತನಿಖೆ ನಡೆಸಿದ್ದಾರೆ. ಹಾಡುಹಗಲೇ ಮನೆಗೆ ನುಗ್ಗಿದ ಘಟನೆ ಪಟ್ಟಣದ ಸಾರ್ವಜನಿಕರನ್ನು ಬೆಚ್ಚಿ ಬೀಳಿಸಿದೆ. ಇಂತಹ ಘಟನೆ ಜನನಿಬೀಡ ಪ್ರದೇಶದಲ್ಲಿ ನಡೆದಿದೆ. ಪವನ್ ಕ್ಲಿನಿಕ್ ಪಕ್ಕದ ಮನೆಯಲ್ಲಿ ನಡೆದಿರುವ ಘಟನೆ ಜನರಲ್ಲಿ ಆತಂಕ ಮೂಡಿಸಿದೆ.