ಶನಿವಾರ, ಮೇ 28, 2022
31 °C
ಜಾನಪದ ವಿದ್ವಾಂಸ ಸಣ್ಣಹೊನ್ನಯ್ಯ ಅಭಿಮತ

ಕಲೆಯತ್ತ ಯುವ ಸಮೂಹ ಬರಬೇಕಿದೆ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ತುಮಕೂರು: ನಾಟಕ ಕಲೆ, ಜಾನಪದ ಸಂಗೀತ ಹಾಗೂ ಇತರೇ ಕಲೆಗಳನ್ನು ಮುಂದಿನ ಪೀಳಿಗೆಗೆ ವರ್ಗಾಯಿಸುವ ಯುವ ಮನಸ್ಸುಗಳ ಅಗತ್ಯತೆ ಹೆಚ್ಚಿದೆ ಎಂದು ಜಾನಪದ ವಿದ್ವಾಂಸ ಸಣ್ಣಹೊನ್ನಯ್ಯ ಅಭಿಪ್ರಾಯಪಟ್ಟರು.

ಗ್ರಾಮೀಣ ಕ್ರಿಯಾತ್ಮಕ ರಂಗ ತಂಡವು ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಹಯೋಗದಲ್ಲಿ ಬುಧವಾರ ಸಂಜೆ ಆಯೋಜಿಸಿದ್ದ ಎರಡು ದಿನಗಳ ನಾಟಕ ಪ್ರದರ್ಶನಕ್ಕೆ ಚಂಡೆ ಬಾರಿಸುವ ಮೂಲಕ ಚಾಲನೆ ನೀಡಿ ಅವರು ಮಾತನಾಡಿದರು.

ಕಲೆ, ಸಾಹಿತ್ಯ, ಸಂಗೀತ ಸೇರಿದಂತೆ ಹಲವು ಕಲೆಗಳ ಸಮ್ಮಿಲನದೊಂದಿಗೆ ನಾಟಕ ರೂಪುಗೊಂಡಿರುತ್ತದೆ. ಇದನ್ನು ಕಲಿತು ಮುಂದಿನ ಪೀಳಿಗೆಗೆ ವರ್ಗಾಯಿಸುವ ಯುವಜನರ ಅಗತ್ಯವಿದೆ ಎಂದರು.

ಜಿಲ್ಲೆಯಲ್ಲಿ ಇತ್ತೀಚಿನ ದಿನಗಳಲ್ಲಿ ಯುವ ನಿರ್ದೇಶಕರು ಆಸಕ್ತರಿಗೆ ಕಲಿಸಿ ನಾಟಕಗಳ ಪ್ರದರ್ಶನಕ್ಕೆ ವೇದಿಕೆ ಒದಗಿಸಿಕೊಟ್ಟಿದ್ದಾರೆ. ಆದರೆ, ಜನಪದ ಕಲೆಗಳಾದ ಸೋಮನ ಕುಣಿತ, ಬಯಲಾಟ, ಮೂಡಲಪಾಯ ಯಕ್ಷಗಾನ, ಮುಖವೀಣೆ ಸೇರಿದಂತೆ ಹಲವು ಕಲೆಗಳನ್ನು ಕಲಿಯಲು ಯುವ ಸಮೂಹ ಮುಂದೆ ಬರುತ್ತಿಲ್ಲ ಎಂದು ವಿಷಾದಿಸಿದರು.

ಸಾಹಿತಿ ಬಿ.ಸಿ. ಶೈಲಾ ನಾಗರಾಜು, ‘ನಾಟಕ ಮತ್ತು ಸಿನಿಮಾಗಳನ್ನು ಹೋಲಿಕೆ ಮಾಡಿದರೆ ನಾಟಕಗಳು ಮನುಷ್ಯರ ಜೀವನಕ್ಕೆ ಹತ್ತಿರವಾಗಿರುತ್ತವೆ. ಹೆಚ್ಚು ಸೃಜನಶೀಲತೆಯಿಂದ ಕೂಡಿರುತ್ತವೆ. ನಾಟಕಗಳಲ್ಲಿ ಗಿಮಿಕ್‍ಗಳಿಗೆ ಅವಕಾಶವಿಲ್ಲ. ಹಾಗಾಗಿ, ಪೌರಾಣಿಕ ನಾಟಕಗಳು ಇಂದಿಗೂ ಜನಮಾನಸದಲ್ಲಿ ಹಾಸು ಹೊಕ್ಕಾಗಿವೆ’ ಎಂದು
ಹೇಳಿದರು.

ಲೇಖಕರಾದ ಎಂ.ಜಿ. ಪ್ರಿಯಾಂಕ, ಇಂಟರ್‌ನೆಟ್, ಟ್ವಿಟರ್, ಫೇಸ್‍ಬುಕ್ ನಂತಹ ಆಧುನಿಕ ಸಾಮಾಜಿಕ ಮಾಧ್ಯಮಗಳ ನಡುವೆಯೂ ಪೌರಾಣಿಕ ನಾಟಕಗಳು ನಮಗೆ ಪ್ರಸ್ತುತವಾಗಿ ಕಾಣುತ್ತವೆ. ಪಂಪ ಮಹಾಕವಿ ಹೇಳುವಂತೆ, ‘ಮಹಾಭಾರತದಲ್ಲಿ ನೆನೆವುದಾದರೆ ಕರ್ಣನ ಪಾತ್ರವನ್ನು ನೆನೆ’ ಎಂಬಂತೆ, ಕರ್ಣನ ತ್ಯಾಗ, ಬಲಿದಾನಗಳು ನಮಗೆ ಇಂದಿಗೂ ಆದರ್ಶಪ್ರಾಯವಾಗಿವೆ. ವೇದ, ಉಪನಿಷತ್ತುಗಳ ಕಾಲದಿಂದಲೂ ಅನಕ್ಷರಸ್ಥರ ಎದೆಯಲ್ಲಿ ನಾಟಕಗಳು ಮನೆ ಮಾಡಿವೆ’ ಎಂದು
ತಿಳಿಸಿದರು.

ಗ್ರಾಮೀಣ ಕ್ರಿಯಾತ್ಮಕ ರಂಗತಂಡದ ಶ್ರೀಲತಾ, ರಂಗ ಸೊಗಡು ಟ್ರಸ್ಟ್‌ನ ಸಿದ್ದರಾಜು ಉಪಸ್ಥಿತರಿದ್ದರು.

ಉದ್ಘಾಟನಾ ಕಾರ್ಯಕ್ರಮದ ನಂತರ ರಾಜಪ್ಪ ದಳವಾಯಿ ರಚಿಸಿರುವ, ಕಾಂತರಾಜು ಕೌತುಮಾರನಹಳ್ಳಿ ನಿರ್ದೇಶನದಲ್ಲಿ ಗ್ರಾಮೀಣ ಕ್ರಿಯಾತ್ಮಕ ರಂಗ ತಂಡದ ಕಲಾವಿದರು ಅಭಿನಯಿಸಿರುವ ‘ಕರ್ಣಕುಲಂ’ ನಾಟಕ ಪ್ರದರ್ಶನ ಕಂಡಿತು.

 

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.