ಮಂಗಳವಾರ, ಸೆಪ್ಟೆಂಬರ್ 22, 2020
22 °C
ಮತ್ತೆ ಕುಸಿದ ಪಾಂಫ್ರೆಟ್ ಮೀನಿನ ದರ: ದುಬಾರಿ ಬೆಲೆ ಹೊತ್ತು ನುಗ್ಗೆಕಾಯಿ ಮಾರುಕಟ್ಟೆಗೆ ಲಗ್ಗೆ

ಕ್ಯಾರೆಟ್ ದರದಲ್ಲಿ ದು‍ಪ್ಪಟ್ಟು ಏರಿಕೆ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಕಾರವಾರ: ಒಂದೇ ವಾರದಲ್ಲಿ ಮೀನು ಮತ್ತು ತರಕಾರಿ ದರಗಳಲ್ಲಿ ಹಲವು ಏರುಪೇರು ಕಂಡುಬಂದಿವೆ. ಕ್ಯಾರೆಟ್ ದುಪ್ಪಟ್ಟು ಏರಿಕೆ ಕಂಡು ಗ್ರಾಹಕರಿಗೆ ಬಿಸಿ ಮುಟ್ಟಿಸಿದರೆ, ಪಾಂಫ್ರೆಟ್ ಮೀನು ದರದಲ್ಲಿ ಇಳಿಕೆ ಕಂಡು ಮೀನು ಪ್ರಿಯರಿಗೆ ಸಂತಸ ಮೂಡಿಸಿದೆ. 

ಪ್ರತಿ ಕೆ.ಜಿ.ಗೆ ₹ 70ರಲ್ಲಿ ಬಿಕರಿಯಾಗುತ್ತಿದ್ದ ಕ್ಯಾರೆಟ್ ದರವು ₹ 50ರಷ್ಟು ಜಾಸ್ತಿಯಾಗಿದ್ದು ಸದ್ಯ ₹ 120 ದರದಲ್ಲಿ ಗ್ರಾಹಕರು ಕೊಂಡುಕೊಳ್ಳುತ್ತಿದ್ದಾರೆ. ಒಂದೇ ವಾರದಲ್ಲಿ ಇದರ ಬೆಲೆ ದಿಢೀರ್ ಏರಿಕೆಯಾಗಿದೆ. ಆವಕ ಕಡಿಮೆಯಾಗಿರುವುದೇ ದರ ಏರಿಕೆಗೆ ಕಾರಣ ಎನ್ನಲಾಗಿದೆ. ಪ್ರತಿ ಕೆ.ಜಿ.ಗೆ ₹ 60ರಲ್ಲಿ ಬಿಕರಿಯಾಗುತ್ತಿದ್ದ ಕ್ಯಾಪ್ಸಿಕಂ ಈಗ ₹ 80ರಲ್ಲಿ ಮಾರಾಟವಾಗುತ್ತಿದೆ. ಅಂದರೆ ₹ 20ರಷ್ಟು ಬೆಲೆ ಏರಿಕೆ ಕಂಡಿದೆ. ಹಿಂದಿನ ವಾರ ತುಟ್ಟಿಯಾಗಿದ್ದ ಈರುಳ್ಳಿ ದರವು ಸದ್ಯ ಸ್ಥಿರವಾಗಿದೆ. ಪ್ರತಿ ಕೆ.ಜಿ.ಗೆ ₹ 60 ದರ ಹೊಂದಿದೆ. ಬೀಟ್‌ರೂಟ್ ₹ 10ರಷ್ಟು ಏರಿಕೆ ಕಂಡು ₹ 50ರ ದರದಲ್ಲಿ ಬಿಕರಿಯಾಗುತ್ತಿದೆ.

ಶುಂಠಿ, ಮೆಣಸಿನಕಾಯಿ ಇಳಿಕೆ: ತರಕಾರಿ ದರವು ವಾರದಿಂದ ವಾರಕ್ಕೆ ಏರಿಕೆ ಕಾಣುತ್ತಿರುವ ಚಿಂತೆಯ ನಡುವೆ, ಕೆಲವೊಂದರ ಬೆಲೆ ಇಳಿಕೆಯು ಗ್ರಾಹಕರಲ್ಲಿ ಸಮಾಧಾನ ತಂದಿದೆ. ಪ್ರತಿ ಕೆ.ಜಿ.ಗೆ ₹ 60ರ ದರವನ್ನು ಹೊಂದಿದ್ದ ಮೆಣಸಿನ ಕಾಯಿ ₹ 40ಕ್ಕೆ ಇಳಿದಿದೆ. ಕೆ.ಜಿ.ಗೆ ₹ 120ರಲ್ಲಿ ಮಾರಾಟವಾಗುತ್ತಿದ್ದ ಶುಂಠಿ ₹ 80ಕ್ಕೆ ಕುಸಿದಿದೆ. ಅಂದರೆ ದರದಲ್ಲಿ ಇವು ತಲಾ ₹ 20, ₹ 40ರಷ್ಟು ಇಳಿಕೆ ಕಂಡಿದೆ. ಅಚ್ಚರಿಯ ಏರಿಕೆ ಕಂಡಿದ್ದ ಬೀನ್ಸ್ ಪ್ರತಿ ಕೆ.ಜಿ.ಗೆ ₹ 80ರಲ್ಲಿ ಬಿಕರಿಯಾಗುತ್ತಿತ್ತು. ಅದು ಈಗ ₹ 20ರಷ್ಟು ಇಳಿಕೆಯಾಗಿ ₹ 60ರಲ್ಲಿ ಗ್ರಾಹಕರ ಕೈ ಸೇರುತ್ತಿದೆ. ನುಗ್ಗೆಕಾಯಿಯು ಮಾರುಕಟ್ಟೆಗೆ ಆವಕಗೊಂಡಿದ್ದು ಪ್ರತಿ ಕೆ.ಜಿ.ಗೆ ₹ 350ರ ದರ ಹೊಂದಿದೆ.

ಪಾಂಫ್ರೆಟ್ ಮೀನಿನ ದರ ಇಳಿಕೆ: ಒಂದೇ ಬಾರಿಗೆ ₹ 300ರಷ್ಟು ಏರಿಕೆ ಕಂಡು ಪ್ರತಿ ಕೆ.ಜಿ.ಗೆ ₹ 900ರಷ್ಟು ಹೊಂದಿದ್ದ ಪಾಂಫ್ರೆಟ್ ಮೀನು, ಸದ್ಯ ದರದಲ್ಲಿ ಗಮನಾರ್ಹ ಇಳಿಕೆ ಕಂಡಿದೆ. ಪ್ರತಿ ಕೆ.ಜಿ.ಗೆ ₹ 600ರಲ್ಲಿ ಸಿಗುತ್ತಿದೆ. ಬಂಗಡೆ ಮೀನು ₹ 100ಕ್ಕೆ ಆರರಿಂದ ಏಳು ಸಿಗುತ್ತಿವೆ. ಸಣ್ಣ ಮೀನು ಒಂದು ಪಾಲಿಗೆ ₹ 300 ಹಾಗೂ ದೊಡ್ಡ ಮೀನು ಒಂದು ಪಾಲಿಗೆ ₹ 700ರಲ್ಲಿ ಬಿಕರಿಯಾಗುತ್ತಿದ್ದ ತೋರ ಮೀನಿನ ದರ ಇಳಿಕೆಯಾಗಿದೆ. ತಲಾ ₹ 200 ಹಾಗೂ ₹ 500ರಲ್ಲಿ ಮಾರಾಟ ಕಾಣುತ್ತಿದೆ. 

ಲೆಪ್ಪೆ, ಶೆಟ್ಲೆ, ಬೆಳುಂಜೆ ಮೀನುಗಳ ದರವಾಗಿ ಸ್ಥಿರವಾಗಿದೆ. ಇವುಗಳು ಒಂದು ಪಾಲಿಗೆ ತಲಾ ₹ 50, ₹ 100 ಹಾಗೂ ₹ 100ರ ದರವನ್ನು ಹೊಂದಿವೆ.  

ಕಾರವಾರ ಮಾರುಕಟ್ಟೆ

ತರಕಾರಿ

ದರ (₹ಗಳಲ್ಲಿ)
ನುಗ್ಗೆಕಾಯಿ350
ತೊಂಡೆಕಾಯಿ50
ಆಲೂಗಡ್ಡೆ30
ಶುಂಠಿ80
ಬೀನ್ಸ್60
ಸೌತೆಕಾಯಿ40
ಬೆಂಡೆಕಾಯಿ60
ಟೊಮೆಟೊ50
ಮೆಣಸಿನಕಾಯಿ40
ಬೀಟ್‌ರೂಟ್50
ಹೂಕೋಸು40
ಕ್ಯಾಪ್ಸಿಕಂ80
ಬದನೆಕಾಯಿ80
ಕ್ಯಾರೆಟ್120
ಕ್ಯಾಬೇಜ್40
ಬೆಳ್ಳುಳ್ಳಿ200

**

ತರಕಾರಿ ಒಯ್ಯಲು ಬಂದಾಗ ಕ್ಯಾರೆಟ್ ಖರೀದಿಸುವುದು ಸಾಮಾನ್ಯ. ನಮಗೆ ನೆಚ್ಚಿನ ತರಕಾರಿ ಇದು. ಬೆಲೆ ಅನಿರೀಕ್ಷಿತ ಏರಿಕೆ ಕಂಡಿರುವುದು ತಲೆಬಿಸಿಯಾಗಿದೆ.
-ನಿತ್ಯಾನಂದ ಭಟ್ಟ, ಗ್ರಾಹಕ

**

ಮೀನಿನ ಬೆಲೆ ಇಳಿಕೆ ಕಂಡಿರುವುದು ಗ್ರಾಹಕರಲ್ಲಿ ಮಂದಹಾಸ ಮೂಡಿಸಿರಬಹುದು. ಆದರೆ, ದಿನೇ ದಿನೇ ದರದಲ್ಲಿ ವ್ಯತ್ಯಾಸ ಆಗುತ್ತಿರುವುದರಿಂದ ನಮಗೆ ನಷ್ಟವಾಗುತ್ತಿದೆ.
-ಭಾರತಿ ಹರಿಕಂತ್ರ, ಮೀನು ವ್ಯಾಪಾರಿ

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.