ಅಪಾಯದಲ್ಲಿದ್ದ ಕಾಡುಪಾಪದ ರಕ್ಷಣೆ

ಜೊಯಿಡಾ ತಾಲ್ಲೂಕಿನ ಕುಂಬಾರವಾಡದಲ್ಲಿ ಕಾಡುಪಾಪವು ನಿಧಾನವಾಗಿ ತೆವಳುತ್ತ ರಸ್ತೆ ದಾಟಲು ಪ್ರಯತ್ನಿಸುತ್ತಿತ್ತು. ಗಾಯಗೊಂಡಿದ್ದ ಅದು, ವಾಹನಗಳ ಕೆಳಗೆ ಸಿಲುಕುವ ಅಪಾಯದಲ್ಲಿತ್ತು.

ಅದೇ ಮಾರ್ಗದಲ್ಲಿ ಪ್ರಯಾಣಿಸುತ್ತಿದ್ದ ಮಾಜಾಳಿಯ ಕೃಷಿಕ ರಮೇಶ ಕದಮ್, ಕೈಗಾ ಅಣುವಿದ್ಯುತ್ ಕೇಂದ್ರದ ಸಿಬ್ಬಂದಿ ಪರೇಶ ನಾಯ್ಕ ಹಾಗೂ ಅಶೋಕ ಭಜಂತ್ರಿ ಅದನ್ನು ಗಮನಿಸಿದರು. ಬಳಿಕ ಕಾಡುಪಾಪವನ್ನು ಜತನದಿಂದ ಅರಣ್ಯ ಇಲಾಖೆಯ ಸುಪರ್ದಿಗೆ ಒಪ್ಪಿಸಿದರು. ಕುಂಬಾರವಾಡದ ಅರಣ್ಯ ಇಲಾಖೆ ಕಚೇರಿಯಲ್ಲಿ ಅದನ್ನು ಉಪಚರಿಸಿ ಮರಳಿ ಕಾಡಿಗೆ ಬಿಡಲಾಯಿತು.

ಅತ್ಯಂತ ಸೂಕ್ಷಜೀವಿಯಾದ ಕಾಡುಪಾಪವನ್ನು ಸರಿಯಾದ ಸಮಯದಲ್ಲಿ ರಕ್ಷಿಸಿದ್ದನ್ನು ಕುಂಬಾರವಾಡ ವಿಭಾಗದ ಸಹಾಯಕ ಅರಣ್ಯ ಸಂರಕ್ಷಣಾಧಿಕಾರಿ ಶಿವಾನಂದ ತೋಡ್ಕರ ಶ್ಲಾಘಿಸಿದ್ದಾರೆ.