ಅಭಿವೃದ್ಧಿ ಕೆಲಸ ನುಂಗಿದ ಒಳಚರಂಡಿ ಅಸಮರ್ಪಕ ಕಾಮಗಾರಿ !

7

ಅಭಿವೃದ್ಧಿ ಕೆಲಸ ನುಂಗಿದ ಒಳಚರಂಡಿ ಅಸಮರ್ಪಕ ಕಾಮಗಾರಿ !

Published:
Updated:
Deccan Herald

ಕುಮಟಾ : ಕುಮಟಾ ಪುರಸಭೆ ವ್ಯಾಪ್ತಿಯಲ್ಲಿ ಕಳೆದ ಅವಧಿಯೊಳಗೆ ಸಾಕಷ್ಟು ಅಭವೃದ್ಧಿ ಕೆಲಸಗಳಾಗಿದ್ದರೂ ‘ಎಲ್ಲ ಬಣ್ಣ ಮಸಿ ನುಂಗಿತು’ ಎನ್ನುವಂತೆ ಸುಮಾರು ರೂ. 43 ಕೋಟಿ ಮೊತ್ತದ ಒಳ ಚರಂಡಿ ನಿರ್ಮಾಣ ಅಸಮಪರ್ಕ ಕಾಮಗಾರಿ ಪಟ್ಟಣವಾಸಿಗಳ ಬೇಸರಕ್ಕೆ ಕಾರಣವಾಗಿದೆ.

ಕಳೆದ ವರ್ಷ ರಾಷ್ಟ್ರೀಯ ಹೆದ್ದಾರಿ ಪಕ್ಕದ ಚೆನ್ನಮ್ಮ ಉದ್ಯಾನವದಲ್ಲಿ ಸುಮಾರು ರೂ. 82 ಲಕ್ಷ ವೆಚ್ಚದಲ್ಲಿ ನಿರ್ಮಾಣಗೊಂಡಿರುವ ಪುರಭವನ ಈಗ ಸಾರ್ವಜನಿಕರ ಉಪಯೋಗಕ್ಕೆ ಬಳಕೆಯಾಗುತ್ತಿದೆ. ಕಳೆದ ಹತ್ತು ವರ್ಷಗಳಿಂದ ನೆನೆಗುದಿಗೆ ಬಿದ್ದಿದ್ದ ಪುರಭವನ ಕಾಮಗಾರಿಗೆ ಹಿಂದಿನ ಶಾಸಕಿ ಶಾರದಾ ಶೆಟ್ಟಿ ಮರುಚಾಲನೆ ನೀಡಿದ್ದರು. ಇದೇ ಉದ್ಯಾನವನ್ನು ಬೆಂಗಳೂರಿನ ಕಬ್ಬನ್ ಪಾರ್ಕ್ ಮಾದರಿಯಲ್ಲಿ ಅಭಿವೃದ್ಧಿಪಡಿಸುವ ಕಾಮಗಾರಿ ಈಗ ಚಾಲನೆಯಲ್ಲಿದೆ. ಇದಕ್ಕೆ ಸ್ಥಳೀಯ ಪುರಸಭೆ ರೂ. 17 ಲಕ್ಷ ನೀಡಿದರೆ ಅಂದಿನ ಕರಾವಳಿ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷೆಯಾಗಿದ್ದ ಹಿಂದಿನ ಶಾಸಕಿ ಶಾರದಾ ಶೆಟ್ಟಿ ಪ್ರಾಧಿಕಾರದಿಂದ ರೂ. 30 ಲಕ್ಷ ನೀಡಿದ್ದಾರೆ.

ಎರಡು ವರ್ಷಗಳ ಹಿಂದೆ ಬೇಸಿಗೆಯಲ್ಲಿ ಪಟ್ಟಣಕ್ಕೆ ಕುಡಿಯುವ ನೀರು ಪೂರೈಕೆ ಮಾಡುವ ಅಘನಾಶಿನಿ ನದಿಯಲ್ಲಿ ನೀರಿನ ಕೊರತೆ ಉಂಟಾದಾಗ ರೂ. 20 ಲಕ್ಷ ವೆಚ್ಚದಲ್ಲಿ ತಕ್ಷಣ ನದಿಗೆ ಅಡ್ಡಲಾಗಿ ಒಂದು ಮಿನಿ ಒಡ್ಡು ನಿರ್ಮಿಸಿ ನೀರು ಸಂಗ್ರಹಿಸಿ ಪಟ್ಟಣಕ್ಕೆ ನೀರು ಪೂರೈಕೆ ಮಾಡಿರುವುದು ಮಹತ್ವದ ಕೆಲಸ. ‘ಹಲವಾರು ವರ್ಷಗಳಿಂದ ಬಾಡಿಗೆ ನವೀಕರಣ ಮಾಡದ ವ್ಯಾಪಾರಿಗಳಿಂದ ಪುರಸಭೆ ಅಂಗಡಿ ಮಳಿಗೆಗಳನ್ನು ವಶಕ್ಕೆ ಪಡೆದು ಹೊಸ ಬಾಡಿಗೆ ಆಧಾರದ ಮೇಲೆ ನೀಡಲಾಗಿದೆ.

ಪರಿಶೀಷ್ಟ ಜಾತಿ– ಜನಾಂಗದ 25 ಅರ್ಹ ಫಲಾನುಭವಿಗಳಿಗೆ ಚಿತ್ರಿಗಿ ಬಳಿ ಪುರಸಭೆ ಜಾಗದಲ್ಲಿ ರೂ. 1.35 ಕೋಟಿ ವೆಚ್ಚದಲ್ಲಿ 18 ಉಚಿತ ಮನೆ ನಿರ್ಮಾಣ ಕಾಮಗಾರಿ ಆರಂಭಗೊಂಡಿದೆ. ಕರಾವಳಿ ಅಭಿವೃದ್ಧಿ ಪ್ರಾಧಿಕಾರದಿಂದ ರೂ. 80 ಲಕ್ಷ ವೆಚ್ಚದಲ್ಲಿ ಮೀನು ಮಾರುಕಟ್ಟೆ ನವೀಕರಣ ಆರಂಭವಾಗಿರುವುದು ಪುರಸಭೆಯ ಮಹತ್ವದ ಕೆಲಸ’ ಎನ್ನುತ್ತಾರೆ ಅಧ್ಯಕ್ಷ ಮಧುಸೂದನ್ ಶೇಟ್.

 ಅಸಮರ್ಪಕ ರಸ್ತೆ, ಚರಂಡಿಯಿಂದಾಗಿ ಸಾರ್ವಜನಿಕರು ಬೇಸತ್ತಿದ್ದಾರೆ. ‘ ಕುಮಟಾಕ್ಕೆ ಒಳಚರಂಡಿ ವ್ಯವಸ್ಥೆಯೇ ಬೇಡವಾಗಿತ್ತು. ಒಳಚರಂಡಿ ಕಾಮಗಾರಿ ಆರಂಭವಾಗದಿದ್ದರೆ ಪಟ್ಟಣದ ಎಲ್ಲ ರಸ್ತೆ ಚೆನ್ನಾಗಿರುತ್ತಿದ್ದವು. ಒಳ ಚರಂಡಿ ಚೇಂಬರ್ ನಿರ್ಮಿಸಿದ ರಸ್ತೆ ಮಧ್ಯೆ ಭಾದಲ್ಲಿ ದುರಸ್ತಿ ಮಾಡಿದ ನಂತರವೂ ದೊಡ್ಡ ಅಪಾಯಕಾರಿ ಗುಂಡಿಗಳು ಹಾಗೇ ಉಳಿದಿವೆ. ಇದರಿಂದ ರಸ್ತೆ ಹಾಗೂ ಗಟಾರ ನಡುವೆ ಅಂತರ ಉಳಿದಿಲ್ಲ’ ಎನ್ನುತ್ತಾರೆ ಸ್ಥಳೀಯರಾದ ಕಿರಣ ಕಾಮತ್.

ಪಟ್ಟಣದ ರಸ್ತೆ ಅಗಲೀಕರಣಕ್ಕೆ ಹಿಂದೆ ಜಿಲ್ಲಾಧಿಕಾರಿಕಾರಿಯಾಗಿದ್ದ ಮೌನೀಶ್ ಮುದ್ಗಿಲ್ ಚಾಲನೆ ನೀಡಿದ್ದರು. ಅದರ ನಂತರ ಆ ಕಾರ್ಯ ಯಾರೂ ಮುಂದುರಿಸಿಲ್ಲ. ಜನ ನಿಬಿಡ ಕೋರ್ಟ್ ರಸ್ತೆ ಸೇರಿದಂತೆ ಪಟ್ಟಣದ ಕೆಲವು ಕಿರಿದಾದ ರಸ್ತೆಗಳಲ್ಲಿ ನಿತ್ಯ ಹತ್ತಾರು ಬಾರಿ ಸಂಚಾರ ದಟ್ಟಣೆ ಉಂಟಾಗಿ ಜನರು ಪರದಾಡುವಂತಾಗುತ್ತದೆ, ಈ ಸಮಸ್ಯೆಗೆ ಪುರಸಭೆ ಪರಿಹಾರ ಕಂಡುಕೊಳ್ಳುವಲ್ಲಿ ವಿಫಲವಾಗಿದೆ. ‘ ಪಟ್ಟಣದ ರಸ್ತೆ ಅಗಲೀಕರಣ ಕಾರ್ಯ ಸರ್ಕಾರ ಹಾಗೂ ಜಿಲ್ಲಾಧಿಕಾರಿ ನಿರ್ಧಾರಕ್ಕೆ ಬಿಟ್ಟದ್ದು. ಸರ್ಕಾರ ಆದೇಶ ಮಾಡಿದರೆ ಪುರಸಭೆ ಅದನ್ನು ಅನುಷ್ಠಾನ ಮಾಡುತ್ತದೆ’ ಎಂದು ಪುರಸಭೆ ಮುಖ್ಯಾಧಿಕಾರಿ ಎಂ.ಕೆ. ಸುರೇಶ ಹೇಳಿದರು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !