ಕಾಳಿ ನದಿ ಹಳೆಯು ಸೇತುವೆ ಕುಸಿತ: ಜೀವನೋಪಾಯಕ್ಕೆ ಅಡ್ಡಿಯಾದ ಅವಶೇಷ

ಕಾಳಿ ನದಿಯ ಹಳೆಯ ಸೇತುವೆಯ ಮೇಲಿನಿಂದ ರಾತ್ರಿ ವೇಳೆ ಗಾಳಿ ಹಾಕಿ ಮೀನುಗಾರಿಕೆ ನಡೆಸಿ ಹತ್ತಾರು ಕುಟುಂಬಗಳು ಜೀವನ ಸಾಗಿಸುತ್ತಿದ್ದವು. ಸೇತುವೆಯ ತಳಭಾಗ, ಸುತ್ತಮುತ್ತ ಮೀನುಗಾರಿಕೆ ನಡೆಸುವದು ಹಲವು ಕುಟುಂಬಗಳಿಗೆ ಜೀವನೋಪಾಯವಾಗಿದೆ. ಅಳ್ವೆವಾಡಾ, ಗಾಬೀತವಾಡಾ, ತಾರಿವಾಡಾ, ನದಿವಾಡ ಸೇರಿದಂತೆ ಕೋಡಿಬಾಗ ಸುತ್ತಮುತ್ತಲಿನ ನೂರಾರು ಮೀನುಗಾರರು ನಿತ್ಯ ಇದೇ ಪ್ರದೇಶದಲ್ಲಿ ಮೀನುಗಾರಿಕೆ ನಡೆಸುತ್ತಿದ್ದಾರೆ.

ಆದರೆ, ಆ.7 ರಂದು ತಡರಾತ್ರಿ ಸೇತುವೆ ಬಿದ್ದ ಬಳಿಕ ನದಿಯಲ್ಲಿ ಸೇತುವೆ ಅವಶೇಷಗಳು ಸಿಲುಕಿಕೊಂಡಿವೆ. ಇನ್ನೂ ಸುಮಾರು 200 ಮೀ.ನಷ್ಟು ಉದ್ದದ ಸೇತುವೆಯು ಕುಸಿಯುವ ಅಪಾಯದಲ್ಲಿದೆ. ಈ ಕಾರಣಕ್ಕೆ ಸೇತುವೆ ಸಮೀಪ ಮೀನುಗಾರಿಕೆ ನಡೆಸುವುದನ್ನು ನಿಷೇಧಿಸಲಾಗಿದೆ. ಮೀನು ದೊರೆಯಲು ಸೂಕ್ತವಾಗಿದ್ದ ಜಾಗದಲ್ಲಿ ಮೀನುಗಾರಿಕೆ ನಡೆಸಲು ಅಡ್ಡಿಯಾಗಿರವುದು ಮೀನುಗಾರರನ್ನು ಚಿಂತೆಗೆ ತಳ್ಳಿದೆ.

‘ಅಳ್ವೆವಾಡಾ ಭಾಗದ ಮೀನುಗಾರರಿಗೆ ಸಂಗಮ ಪ್ರದೇಶಕ್ಕೆ ಸಮೀಪದಲ್ಲಷ್ಟೆ ಮೀನುಗಾರಿಕೆ ನಡೆಸಲು ಆಗದು. ನಂದನಗದ್ದಾ, ಇನ್ನಿತರ ಪ್ರದೇಶದವರೆಗೂ ನದಿಯಲ್ಲಿ ತೆರಳಿ ಮೀನುಗಾರಿಕೆ ನಡೆಸಬೇಕಾಗುತ್ತದೆ. ಕಾಳಿ ಸೇತುವೆ ಕುಸಿದು ಬಿದ್ದಿರವುದರಿಂದ ಅತ್ತ ಸಾಗಲು ಸಾಧ್ಯವಾಗುತ್ತಿಲ್ಲ. ಸೇತುವೆ ಬಿದ್ದ ಜಾಗ ದಾಟಿ ಹೋಗಲು ಪೊಲೀಸರು ಬಿಡುತ್ತಿಲ್ಲ. ಇದರಿಂದ ಅಗತ್ಯ ಪ್ರಮಾಣದಲ್ಲಿ ಮೀನು ಸಿಗದೆ ಸಮಸ್ಯೆ ಉಂಟಾಗುತ್ತಿದೆ’ ಎನ್ನುತ್ತಾರೆ ಮೀನುಗಾರ ಸೂರಜ ಸಾರಂಗ.

‘ಪಾತಿ ದೋಣಿ ಮೂಲಕ ಸಾಂಪ್ರದಾಯಿಕ ಮೀನುಗಾರಿಕೆ ನಡೆಸುವ ಕುಟುಂಬಗಳೇ ಕೋಡಿಬಾಗ ಪ್ರದೇಶದಲ್ಲಿ ಹೆಚ್ಚಿವೆ. ಸೇತುವೆ ಬಿದ್ದ ಬಳಿಕ ನದಿಯಲ್ಲಿ ಮೀನುಗಾರಿಕೆ ನಡೆಸಲು ಆತಂಕ ಉಂಟಾಗುತ್ತಿದೆ. ಗಾಳ ಹಾಕಿ ಮೀನು ಹಿಡಿಯಲು ಇದ್ದ ಆಸರೆಯನ್ನೂ ಕಳೆದುಕೊಂಡಿದ್ದೇವೆ’ ಎಂದು ನಾಗೇಶ ಮೇಥಾ ಹೇಳಿದರು. 

ಸೇತುವೆ ಅವಶೇಷ ತೆರವಿಗೆ ಆಗ್ರಹ

‘ನದಿಗೆ ಕುಸಿದು ಬಿದ್ದಿರುವ ಕಾಳಿ ಸೇತುವೆಯ ಅವಶೇಷಗಳನ್ನು ಆದಷ್ಟು ಬೇಗನೆ ತೆರವುಗೊಳಿಸುವ ಜತೆಗೆ ಸೇತುವೆಯ ಉಳಿದುಕೊಂಡಿರು ಭಾಗವನ್ನೂ ಕೆಡವಿ ತೆರವುಗೊಳಿಸಬೇಕು. ಇಲ್ಲದಿದ್ದರೆ ಮೀನುಗಾರಿಕೆ ನಡೆಸಲು ತೊಂದರೆ ಉಂಟಾಗಲಿದೆ. ಅಲ್ಲದೆ ಸೇತುವೆ ನೋಡುವ ಭರದಲ್ಲಿ ಜನರು ಅಪಾಯಕ್ಕೆ ಸಿಲುಕುವ ಸಾಧ್ಯತೆ ಇದೆ’ ಎಂದು ನದಿ ತಟದ ನಿವಾಸಿಗಳು ಒತ್ತಾಯಿಸಿದ್ದಾರೆ.

‘ಎನ್.ಎಚ್.ಎ.ಐನ ಉನ್ನತ ಅಧಿಕಾರಿಗಳು ಸ್ಥಳ ಪರಿಶೀಲಿಸಿದ್ದು ಸೇತುವೆಯ ಅವಶೇಷ ತೆರವಿಗೆ ನಿರ್ದೇಶನ ನೀಡಿದ್ದಾರೆ. ಕೆಲ ದಿನಗಳಲ್ಲಿ ಅವಶೇಷ ತೆರವು ಮಾಡುವ ಜತೆಗೆ ಸೇತುವೆಯ ಉಳಿದ ಭಾಗವನ್ನೂ ತೆರವುಗೊಳಿಸಲು ಕ್ರಮವಹಿಸಲಾಗುತ್ತದೆ’ ಎಂದು ಜಿಲ್ಲಾಧಿಕಾರಿ ಕೆ.ಲಕ್ಷ್ಮಿಪ್ರಿಯಾ ತಿಳಿಸಿದ್ದಾರೆ.