‘ವಿದೇಶಿ ಹಕ್ಕಿಗಳು ಸಂತಾನೋತ್ಪತ್ತಿಗೆ ದೇಶದ ಲಡಾಖ್ ಪ್ರಾಂತ್ಯಕ್ಕೆ ವಲಸೆ ಬರುತ್ತವೆ. ಅಲ್ಲಿಗೆ ತೆರಳುವ ಮುನ್ನ ಚಳಿಗಾಲದ ಅವಧಿಯಲ್ಲಿ ಪಶ್ಚಿಮ ಕರಾವಳಿಯಲ್ಲಿ ಆಶ್ರಯ ಪಡೆದುಕೊಳ್ಳುತ್ತವೆ. ಗಲ್ ಜಾತಿಯ ಹಕ್ಕಿಗಳು ಇದರಲ್ಲಿ ಸೇರಿವೆ. ಕಡಲತೀರದಲ್ಲಿ ದೊರೆಯುವ ಮೃದ್ವಂಗಿ, ಮೀನುಗಳು, ಏಡಿಗಳನ್ನು ತಿಂದು ಇವು ಜೀವಿಸುತ್ತವೆ. ಸರಾಸರಿ ನಾಲ್ಕು ತಿಂಗಳ ಕಾಲ ಸ್ಥಳೀಯ ಪ್ರಭೇದಗಳ ಪಕ್ಷಿಗಳ ಜತೆಗೆ ಸಹಬಾಳ್ವೆ ನಡೆಸುತ್ತವೆ. ಅವುಗಳೊಟ್ಟಿಗೆ ಸೇರಿ ಬೇಟೆಯಾಡುವುದು ವಿಶೇಷ’ ಎನ್ನುತ್ತಾರೆ ಪ್ರಾಣಿಶಾಸ್ತ್ರ ಅಧ್ಯಯನಕಾರ ಅಮಿತ್ ಹೆಗಡೆ.