ಕಾರವಾರ: ವಿಚಾರಣಾಧೀನ ಕೈದಿಗಳಿಗೆ ಆಪ್ತ ಸಮಾಲೋಚನೆ

ಇಲ್ಲಿನ ಜಿಲ್ಲಾ ಕಾರಾಗೃಹದಲ್ಲಿ ಸದ್ಯ ಮೂರು ಮಂದಿ ಮಹಿಳೆಯರು ಸೇರಿದಂತೆ 145 ವಿಚಾರಣಾಧೀನ ಕೈದಿಗಳಿದ್ದಾರೆ. ಅವರ ಪೈಕಿ ತಂಬಾಕು, ಮದ್ಯ ವ್ಯಸನದ ಗೀಳು ಅಂಟಿಸಿಕೊಂಡಿರುವ ಕೈದಿಗಳನ್ನು ದುಶ್ಚಟದಿಂದ ಹೊರತರಲು ಜಾಗೃತಿ ಮೂಡಿಸಲು ಆರೋಗ್ಯ ಇಲಾಖೆ ಸಹಯೋಗದೊಂದಿಗೆ ಕಾರಾಗೃಹ ಇಲಾಖೆ ಕಾರ್ಯಕ್ರಮಗಳನ್ನು ರೂಪಿಸಿದೆ.

‘ಕೈದಿಗಳ ಮನಪರಿವರ್ತನೆಗೆ ಕಾರಾಗೃಹದಲ್ಲಿ ಪ್ರತಿ ವರ್ಷವೂ ಆಗಾಗ ಜಾಗೃತಿ ಕಾರ್ಯಾಗಾರ ಆಯೋಜಿಸಲಾಗುತ್ತಿತ್ತು. ಈಗ ಅದನ್ನು ಹೆಚ್ಚಿಸಲು ಮುಂದಾಗಿದ್ದೇವೆ. ಪ್ರತಿ ವಾರಕ್ಕೊಮ್ಮೆ ಆರೋಗ್ಯ ಸಂಬಂಧಿ ಕಾರ್ಯಾಗಾರ ಆಯೋಜಿಸುವ ಜತೆಗೆ ಕೈದಿಗಳ ವರ್ತನೆ ಆಧರಿಸಿ ಅವರನ್ನು ಆಪ್ತ ಸಮಾಲೋಚನೆಗೆ ಒಳಪಡಿಸಲಿದ್ದೇವೆ’ ಎಂದು ಜಿಲ್ಲಾ ಕಾರಾಗೃಹದ ಅಧೀಕ್ಷಕಿ ಹೇಮಲತಾ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ಈಚೆಗೆ ತಂಬಾಕು ಉತ್ಪನ್ನಕ್ಕೆ ಬೇಡಿಕೆ ಇಟ್ಟು ಕಾರಾಗೃಹದಲ್ಲಿ ಇಬ್ಬರು ಕೈದಿಗಳು ತಾವೇ ಹಲ್ಲೆ ಮಾಡಿಕೊಂಡು ಗಾಯಗೊಂಡ ಘಟನೆ ಬಳಿಕ ಎಲ್ಲ ಕೈದಿಗಳನ್ನು ಆರೋಗ್ಯ ತಪಾಸಣೆಗೆ ಒಳಪಡಿಸಲಾಗಿದೆ. ಅವರಿಗಾಗಿ ವಿಶೇಷ ಜಾಗೃತಿ ಕಾರ್ಯಾಗಾರ ನಡೆಸಿಕೊಡುವಂತೆ ಆರೋಗ್ಯ ಇಲಾಖೆಗೆ ಮನವಿ ಮಾಡಲಾಗಿದೆ’ ಎಂದರು.

‘ಕಾರಾಗೃಹದಲ್ಲಿರುವ ಕೈದಿಗಳ ಆರೋಗ್ಯ ತಪಾಸಣೆ ನಡೆಸುವ ಜತೆಗೆ ಅವರ ಮಾನಸಿಕ ಸ್ಥಿತಿಗತಿ ಅಭ್ಯಸಿಸಿ ಅಗತ್ಯ ಇದ್ದವರಿಗೆ ಆಪ್ತಸಮಾಲೋಚನೆ ನಡೆಸಲು ಇಲಾಖೆಯು ಸುತ್ತೋಲೆ ಹೊರಡಿಸಿದೆ. ಜಿಲ್ಲಾ ಮಾನಸಿಕ ಆರೋಗ್ಯ ಕಾರ್ಯಕ್ರಮದ ಅಡಿಯಲ್ಲಿ ಮನಃಶಾಸ್ತ್ರಜ್ಞರು, ಆಪ್ತಸಮಾಲೋಚಕರ ತಂಡವು ಕಾರಾಗೃಹಕ್ಕೆ ಆಗಾಗ ಭೇಟಿ ನೀಡಿ ಕೈದಿಗಳ ಮಾನಸಿಕ ಆರೋಗ್ಯದ ಕುರಿತು ಸಮಾಲೋಚಿಸುತ್ತಿದೆ’ ಎಂದು ಜಿಲ್ಲಾ ಆರೋಗ್ಯಾಧಿಕಾರಿ ಡಾ.ನೀರಜ್ ಬಿ.ವಿ ಪ್ರತಿಕ್ರಿಯಿಸಿದರು.

ಒಮ್ಮೆಲೇ ಮಾನಸಿಕ ನಿಯಂತ್ರಣ ಕಷ್ಟ

‘ಅಪರಾಧ ಕೃತ್ಯ ಎಸಗಿ ಕಾರಾಗೃಹ ಸೇರುವ ಕೈದಿಗಳ ಪೈಕಿ ದುಶ್ಚಟಕ್ಕೆ ಒಳಗಾದವರ ಸಂಖ್ಯೆ ಹೆಚ್ಚಿದೆ. ಬಂಧಿಯಾದವರಿಗೆ ಮಾದಕ ವಸ್ತು ಸಿಗದ ಕಾರಣಕ್ಕೆ ಒಮ್ಮೆಲೇ ಅವರು ಮಾನಸಿಕ ಸ್ಥಿಮಿತತೆ ಕಳೆದುಕೊಳ್ಳುತ್ತಾರೆ. ಅಂಥವರನ್ನು ಒಮ್ಮೆಲೇ ನಿಯಂತ್ರಿಸುವುದು ಕಷ್ಟ. ನಿರಂತರವಾಗಿ ಅವರನ್ನು ಆಪ್ತಸಮಾಲೋಚನೆಗೆ ಒಳಪಡಿಸುತ್ತಲೇ ಅವರಿಗೆ ದುಶ್ಚಟದ ಅಪಾಯದ ಅರಿವು ಮೂಡಿಸಿ ಅವರನ್ನು ಸರಿದಾರಿಗೆ ತರಬೇಕಾಗುತ್ತದೆ’ ಎನ್ನುತ್ತಾರೆ ಆಪ್ತ ಸಮಾಲೋಚಕರೊಬ್ಬರು.