ಕೈಗಾ ದಾಖಲೆ ಮೀರಿದ ಡಾರ್ಲಿಂಗ್‌ಟನ್

ಭಾರಜಲ ಮಾದರಿಯ ರಿಯಾಕ್ಟರ್ ಹೊಂದಿರುವ ಕೈಗಾ ಅಣು ವಿದ್ಯುತ್ ಸ್ಥಾವರದ ಒಂದನೇ ಘಟಕವು, 2018ರ ಡಿ.10ರಂದು ಇಂಗ್ಲೆಂಡ್‌ನ ಹೇಶಮ್ ಅಣು ವಿದ್ಯುತ್ ಉತ್ಪಾದನಾ ಸ್ಥಾವರದ ದಾಖಲೆಯನ್ನು ಮೀರಿತ್ತು. ಇದರ ಎರಡನೇ ಘಟಕವು 2016ರ ಆ.1ರವರೆಗೆ ನಿರಂತರವಾಗಿ 940 ದಿನ ಕಾರ್ಯಾಚರಣೆ ಮಾಡಿತ್ತು.

ಕೈಗಾದ ಮೊದಲನೇ ಘಟಕವನ್ನು 2018ರ ಡಿ.31ರಂದು 962ನೇ ದಿನದ ಕಾರ್ಯಾಚರಣೆಯ ಬಳಿಕ ನಿರ್ವಹಣೆಗಾಗಿ ಸ್ಥಗಿತಗೊಳಿಸಲಾಗಿತ್ತು. ಈ ಸ್ಥಾವರದ ಸಾಧನೆಯನ್ನು ಪ್ರಧಾನಿ ನರೇಂದ್ರ ಮೋದಿ ಕೂಡ ಶ್ಲಾಘಿಸಿ ಟ್ವೀಟ್ ಮಾಡಿದ್ದರು. ಸ್ವದೇಶಿ ವಿನ್ಯಾಸ ಹೊಂದಿರುವ ಕೈಗಾ ಸ್ಥಾವರದ ಒಂದನೇ ಘಟಕವು, ನಿರಂತರವಾಗಿ ವಿದ್ಯುತ್ ಉತ್ಪಾದನೆ ಮಾಡಿದ್ದು ಬಹುದೊಡ್ಡ ಸಾಧನೆ ಎಂದು ಅವರು ವರ್ಣಿಸಿದ್ದರು.

ಕೈಗಾ ಅಣು ವಿದ್ಯುತ್ ಸ್ಥಾವರದ ಇತರ ಮೂರು ಘಟಕಗಳೂ ಉತ್ತಮ ರೀತಿಯಲ್ಲಿ ಕಾರ್ಯ ನಿರ್ವಹಿಸುತ್ತಿವೆ. ಸ್ಥಾವರದ ಎರಡನೇ ಘಟಕವು 698 ದಿನ, ಮೂರನೇ ಘಟಕವು 542 ದಿನ ಹಾಗೂ ನಾಲ್ಕನೇ ಘಟಕವು 550 ದಿನ ನಿರಂತರ ಕಾರ್ಯ ನಿರ್ವಹಿಸಿದ ದಾಖಲೆ ಹೊಂದಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಡಾರ್ಲಿಂಗ್‌ಟನ್ ಅಣು ವಿದ್ಯುತ್ ಸ್ಥಾವರವೂ ಭಾರಜಲ ಮಾದರಿಯ ರಿಯಾಕ್ಟರ್ ಅನ್ನೇ ಹೊಂದಿದೆ. ಈ ಸ್ಥಾವರವು 1992ರ ನ.14ರಂದು ಉದ್ಘಾಟನೆಯಾಗಿತ್ತು. ಇದರ ಮೊದಲ ಘಟಕವನ್ನು ನಿರ್ವಹಣೆಗಾಗಿ ಸ್ಥಗಿತಗೊಳಿಸಿದ ಬಳಿಕ 2018ರ ಜ.26ರಂದು ಪುನಃ ಚಾಲನೆ ನೀಡಲಾಗಿತ್ತು. ಈ ಘಟಕವು 878 ಮೆಗಾವಾಟ್ ವಿದ್ಯುತ್ ಉತ್ಪಾದನೆಯ ಸಾಮರ್ಥ್ಯ ಹೊಂದಿದೆ ಎಂದು ಸ್ಥಾವರದ ವೆಬ್‌ಸೈಟ್‌ ತಿಳಿಸಿದೆ.