ಉ.ಕ |ಮತದಾರರ ಪಟ್ಟಿ ಪರಿಷ್ಕರಣೆ: ಆರೂವರೆ ಸಾವಿರ ಹೆಸರು ರದ್ದು

ಅ.27ರಂದು ಕರಡು ಮತದಾರರ ಪಟ್ಟಿ ಪ್ರಕಟಗೊಂಡ ಅವಧಿಯಿಂದ ಜ.22ರಂದು ಅಂತಿಮ ಮತದಾರರ ಪಟ್ಟಿ ಪ್ರಕಟಗೊಂಡ ಅವಧಿಯೊಳಗೆ ಮತದಾರರ ಪಟ್ಟಿಯಿಂದ ಹಲವು ಕಾರಣದಿಂದ ಈ ಹೆಸರುಗಳನ್ನು ಕೈಬಿಡಲಾಗಿದೆ. ಮೃತಪಟ್ಟವರು, ವರ್ಗಾವಣೆಗೊಂಡವರು, ವಿವಾಹವಾಗಿ ಬೇರೆ ಜಿಲ್ಲೆಗೆ ವಲಸೆ ಹೋದವರ ಹೆಸರು ಕೈಬಿಡಲಾಗಿದೆ.

ಅಲ್ಲದೆ, ಡೆಮಾಗ್ರಫಿಕಲಿ ಸಿಮಿಲರ್ ಎಂಟ್ರಿ (ಡಿ.ಸಿ.ಇ), ಫೋಟೊ ಸಿಮಿಲರ್ ಎಂಟ್ರಿ (ಪಿ.ಸಿ.ಇ) ಹೊಂದಿರುವ 200ಕ್ಕೂ ಹೆಚ್ಚು ಮತದಾರರ ಹೆಸರು ಕೂಡ ಪಟ್ಟಿಯಿಂದ ಹೊರಬಿದ್ದಿದೆ.

‘ಪ್ರತಿ ಬಾರಿಯೂ ಸರಾಸರಿ ನಾಲ್ಕರಿಂದ ಆರು ಸಾವಿರದಷ್ಟು ಮತದಾರರ ಹೆಸರನ್ನು ಪಟ್ಟಿಯಿಂದ ಕೈಬಿಡುವ, ಹೊಸ ಮತದಾರರನ್ನು ಸೇರಿಸುವ ಪ್ರಕ್ರಿಯೆ ನಡೆಯುತ್ತದೆ. ಈ ಬಾರಿ ಮತದಾರರ ಪಟ್ಟಿಯಲ್ಲಿ ಪರಿಷ್ಕರಣೆಗೆ ಹೆಚ್ಚು ಸಮಯಾವಕಾಶವೂ ಸಿಕ್ಕಿದ್ದರಿಂದ ಕೂಲಂಕಷವಾಗಿ ಪರಿಶೀಲಿಸಿ ಹಲವು ಹೆಸರುಗಳನ್ನು ತೆಗೆದು ಹಾಕಲಾಗಿದೆ. ಆದರೆ, ಪಟ್ಟಿಯಿಂದ ಕೈಬಿಟ್ಟ ಬಹುತೇಕ ಹೆಸರುಗಳು ಮೃತಪಟ್ಟವರು ಮತ್ತು ವಲಸೆ ಹೋದವರದ್ದು’ ಎಂದು ಚುನಾವಣಾ ಶಾಖೆಯ ಅಧಿಕಾರಿಯೊಬ್ಬರು ಹೇಳಿದರು.

‘ತಾಂತ್ರಿಕ ದೋಷದಿಂದ 5,677 ಮತದಾರರ ಫೋಟೊ ಗೊಂದಲ ಉಂಟಾಗಿತ್ತು. ಒಬ್ಬರನ್ನೇ ಹೋಲುವ ಭಾವಚಿತ್ರಗಳು ಪಟ್ಟಿಯಲ್ಲಿ ಎರಡು ಅಥವಾ ಮೂರು ಕಡೆ ದಾಖಲಾಗಿದ್ದವು. ಕೆಲವರ ಹೆಸರುಗಳು ಎರಡು ಬೇರೆ ಬೇರೆ ಸ್ಥಳದಲ್ಲಿ ಪತ್ತೆಯಾಗಿದ್ದವು. ಅಂತಹವರಿಗೆ ನೋಟಿಸ್ ಜಾರಿ ಮಾಡಿ ಖಚಿತ ಮಾಹಿತಿ ಒದಗಿಸಲು ಸೂಚಿಸಲಾಗಿತ್ತು. ಸೂಕ್ತ ಮಾಹಿತಿ ನೀಡದ 200ಕ್ಕೂ ಹೆಚ್ಚು ಜನರ ಹೆಸರನ್ನು ಪಟ್ಟಿಯಿಂದ ತೆಗೆದು ಹಾಕಲಾಗಿದೆ. ಆದರೆ ಅವರ ಹೆಸರು ಅವರು ನೆಲೆಸಿದ ಪ್ರದೇಶದ ಮತದಾರರ ಪಟ್ಟಿಯಲ್ಲಿರುವಂತೆ ನೋಡಿಕೊಳ್ಳಲಾಗಿದೆ’ ಎಂದೂ ಹೇಳಿದರು.

ಕಳೆದ ಮೂರು ತಿಂಗಳ ಅವಧಿಯಲ್ಲಿ 15,879 ಜನರ ಹೆಸರು ಮತದಾರರ ಪಟ್ಟಿಗೆ ಹೊಸದಾಗಿ ಸೇರ್ಪಡೆಗೊಂಡಿದೆ. ಈ ಪೈಕಿ ಈಗಷ್ಟೆ 18 ವರ್ಷ ದಾಟಿದ ಯುವ ಮತದಾರರ ಸಂಖ್ಯೆ ಹೆಚ್ಚಿದೆ. ಕೆಲವೇ ಸಂಖ್ಯೆಯಲ್ಲಿ ಅನ್ಯ ಜಿಲ್ಲೆಯಿಂದ ವಲಸೆ ಬಂದ ಮತದಾರರು ಪಟ್ಟಿಗೆ ಸೇರ್ಪಡೆಗೊಂಡಿದ್ದಾರೆ.