ಉತ್ತರ ಕನ್ನಡ: ‘ಸ್ವಚ್ಛ ಭಾರತ’ಕ್ಕೆ ನಾರಿಶಕ್ತಿ ಬಲ

ಗ್ರಾಮೀಣ ಪ್ರದೇಶದಲ್ಲಿ ಮನೆಗಳಿಂದ ಒಣ ಕಸ ಸಂಗ್ರಹಿಸಿ ಸ್ವಚ್ಛತಾ ಸಂಕೀರ್ಣಕ್ಕೆ ತರುವ ‘ಸ್ವಚ್ಛ ವಾಹಿನಿ’ಗಳನ್ನು ಚಲಾಯಿಸುವವರ ಪೈಕಿ ಬಹುತೇಕ ಮಹಿಳಾ ಚಾಲಕರೇ ಕಾರ್ಯನಿರ್ವಹಿಸುತ್ತಿದ್ದಾರೆ. ಜಿಲ್ಲೆಯಲ್ಲಿ ಒಟ್ಟು 104 ಚಾಲಕಿಯರು ಸದ್ಯ ಕಾರ್ಯನಿರ್ವಹಿಸುತ್ತಿದ್ದಾರೆ. ಜಿಲ್ಲಾ ಪಂಚಾಯಿತಿಯ ರಾಷ್ಟ್ರೀಯ ಗ್ರಾಮೀಣ ಜೀವನೋಪಾಯ ಸಂಜೀವಿನಿ (ಎನ್‌ಆರ್‌ಎಲ್‌ಎಂ) ವಿಭಾಗದಿಂದ 125 ಮಹಿಳೆಯರಿಗೆ ತಿಂಗಳ ಕಾಲ ಚಾಲನಾ ತರಬೇತಿ ನೀಡಿ ಚಾಲನಾ ಪರವಾನಗಿ ಮಾಡಿಕೊಟ್ಟು ಬಳಿಕ ಕೆಲಸಕ್ಕೆ ನೇಮಕ ಮಾಡಿಕೊಳ್ಳಲಾಗಿದೆ. ‘ಹಳ್ಳಿ ರಸ್ತೆಗಳಲ್ಲಿನ ಅಪಾಯಕಾರಿ ತಿರುವು ದಟ್ಟ ಕಾಡಿನ ನಡುವೆ ಸಾಗುವ ಮಾರ್ಗದಲ್ಲಿ ವಾಹನ ಚಲಾಯಿಸಿಕೊಂಡು ಸಾಗಲು ಭಯವಾಗುತ್ತಿತ್ತು. ಈಗ ವಾಹನ ಚಾಲನೆ ರೂಢಿಗತವಾಗಿದೆ. ಜೀವನದಲ್ಲಿ ಪುಣ್ಯ ಕೆಲಸವೊಂದನ್ನು ಮಾಡುತ್ತಿರುವ ಹೆಮ್ಮಯಿದೆ’ ಎನ್ನುತ್ತಾರೆ ಸ್ವಚ್ಛ ವಾಹಿನಿ ಚಾಲಕಿ ಸುನೀತಾ ಗೌಡ.