ಕಾರವಾರ: ಬಿಣಗಾ ಗ್ರಾಮ ಪಂಚಾಯ್ತಿ ಕಚೇರಿ ಕಟ್ಟಡ ಹಾಗೂ ಸಭಾಭವನ ಹಲವು ವರ್ಷಗಳಿಂದ ಅಭಿವೃದ್ಧಿ ಕಾಣದೇ ಪಾಳು ಬಿದ್ದಿದ್ದು, ಅನೈತಿಕ ಚಟುವಟಿಕೆಗಳ ತಾಣವಾಗಿ ಮಾರ್ಪಟ್ಟಿದೆ. 1999ರಲ್ಲಿ ಬಿಣಗಾ ಗ್ರಾಮವು ನಗರಸಭೆ ವ್ಯಾಪ್ತಿಗೆ ಸೇರಿದೆ. 1981ರಲ್ಲಿ ನಿರ್ಮಾಣಗೊಂಡಿರುವ ಈ ಗ್ರಾಮ ಪಂಚಾಯ್ತಿ ಕಟ್ಟಡ ನಗರಸಭೆಗೆ ಸೇರಿದ ನಂತರ ನಿರುಪಯೋಗಿಯಾಗಿದ್ದು, ಅಭಿವೃದ್ಧಿಯ ಸ್ಪರ್ಶವಿಲ್ಲದೇ ಮೂಲೆಗುಂಪಾಗಿದೆ. ಇದರ ಹಿಂಭಾಗದಲ್ಲೇ ಸಭಾಭವನವಿದ್ದು, ಅದು ಕೂಡ ಶಿಥಿಲಗೊಂಡು ಹಾವು, ಚೇಳುಗಳ ವಾಸಸ್ಥಾನವಾಗಿದೆ.
ಕಟ್ಟಡದಲ್ಲಿ ಗ್ರಾಮ ಪಂಚಾಯ್ತಿ ಅಧ್ಯಕ್ಷರ ಕೊಠಡಿ, ಕಾರ್ಯದರ್ಶಿ ಕೊಠಡಿ ಹಾಗೂ ದಾಖಲೆಗಳನ್ನು ಸಂಗ್ರಹಿಸಿಡುವ ಕೊಠಡಿಗಳಿದ್ದು ಎಲ್ಲವೂ ಹಾಳಾಗಿವೆ. ಈ ಕೊಠಡಿಗಳಿಗೆ ಅಳವಡಿಸಲಾಗಿದ್ದ ರೋಲಿಂಗ್ ಶೆಟರ್ ಕೂಡ ತುಕ್ಕು ಹಿಡಿದಿವೆ. ಕಟ್ಟಡದ ಗೋಡೆಗಳು ಪಕ್ಕದಲ್ಲಿರುವ ಆಲದ ಮರದ ಕೊಂಬೆಗಳಿಂದ ಹಾನಿಯಾಗಿದೆ. ಕೊಂಬೆಗಳು ಗೋಡೆಯನ್ನು ಸೀಳಿಕೊಂಡು ಕಟ್ಟಡದೊಳಗೂ ಹಬ್ಬಿದೆ.