ವಿಜಯನಗರ: ಕುಂಚ ತಂದಿತು ಕೊಂಚ ನೆಮ್ಮದಿ

ವಿಶ್ವ ಪಾರಂಪರಿಕ ತಾಣ ಹಂಪಿಯನ್ನು ನೋಡಲು ಬಂದ ಪ್ರವಾಸಿಗರು ಹಂಪಿ ಮೃಗಾಲಯದತ್ತ, ಆರೆಂಜ್ ಕೌಂಟಿಯತ್ತ, ನೇಚರ್‌ ಕ್ಯಾಂಪ್‌ನತ್ತ, ಜಂಗಲ್‌ ಲಾಡ್ಜ್‌ನತ್ತ ತೆರಳುವಾಗ ಕಮಲಾಪುರ ಮುಖ್ಯ ರಸ್ತೆಯಲ್ಲೇ ಸಂಚರಿಸಬೇಕು. ಈ ರಸ್ತೆಯ ಪಕ್ಕದಲ್ಲೇ ಇದೆ ವಿಶ್ವವಿದ್ಯಾಲಯದ ದೃಶ್ಯಕಲಾ ವಿಭಾಗ. ಇದು ವಿದ್ಯಾರ್ಥಿಗಳ ಕಲಿಕೆಯ ಜತೆಗೆ ಗಳಿಕೆಗೆ ನೆರವಾಗಿರುವ ಪ್ರಮುಖ ಅಂಶ.

ಹಂಪಿ ಎಂದರೆ ಕಲ್ಲು, ಹೀಗಾಗಿ ಹಂಪಿಯಲ್ಲಿರುವ ದೃಶ್ಯಕಲಾ ವಿಭಾಗವೂ ಎದುರಿನಲ್ಲೇ ಇಟ್ಟಂತಹ ಕಲ್ಲಿನ ಕಲಾಕೃತಿಗಳಿಂದ ಜನರನ್ನು ಸೆಳೆಯುತ್ತಿದೆ. ಸಹಜ ಕುತೂಹಲದಿಂದ ವಿಭಾಗದೊಳಗೆ ತೆರಳಿದಾಗ ಪ್ರಸಿದ್ಧ ಕಲಾವಿದರ ಕಲಾಕೃತಿಗಳ ಪ್ರದರ್ಶನ ಮನಸೂರೆಗೊಳ್ಳುತ್ತದೆ. ಇದು ಪ್ರದರ್ಶನಕ್ಕೆ ಮಾತ್ರ. ಪಕ್ಕದ ಬಣ್ಣದ ಕೊಠಡಿಗಳಿಗೆ ತೆರಳಿದಾಗ ವಿದ್ಯಾರ್ಥಿಗಳು ಮಾಡುತ್ತಿರುವ ಪೇಂಟಿಂಗ್‌ಗಳು ಕಣ್ಣು ಕೋರೈಸುತ್ತವೆ. ಅಲ್ಲೇ ದರ ಕುದುರುತ್ತದೆ. ₹100, ₹ 500, ₹ 1,000, ₹5,000 ಹೀಗೆ ಸಾಕಷ್ಟು ಕಲಾಕೃತಿಗಳು ಮಾರಾಟವಾಗುತ್ತವೆ. ಈ ವರ್ಷ ವಿದ್ಯಾರ್ಥಿಗಳು ಏನಿಲ್ಲವೆಂದರೂ ತಿಂಗಳಿಗೆ ₹ 5 ಸಾವಿರದಿಂದ ₹ 8 ಸಾವಿರದವರೆಗೆ ಗಳಿಸಿದ್ದಾರೆ.

ಕಳೆದ ತಿಂಗಳು ನಡೆದ ಜಿ20 ಸಭೆಗೆ ಮೊದಲು ಕಮಲಾಪುರ, ಹಂಪಿ ಭಾಗದಲ್ಲಿ ಹಾಗೂ ಹೊಸಪೇಟೆ ನಗರದ ತುಂಬೆಲ್ಲ ಕಲಾಕೃತಿಗಳು ಗೋಡೆಗಳಲ್ಲಿ ರಾರಾಜಿಸಿದ್ದವು. ಇಲ್ಲಿನ ವಿದ್ಯಾರ್ಥಿಗಳ ಕುಂಚಗಳೂ ಬಣ್ಣ ಹಚ್ಚಿ ದುಡ್ಡು ಬಾಚಿವೆ.

‘ಇಲ್ಲಿನ ದೃಶ್ಯಕಲಾ ವಿಭಾಗದಲ್ಲಿ 20 ಮಂದಿ ವ್ಯಾಸಂಗ ಮಾಡುತ್ತಿದ್ದಾರೆ. ಇವರು ರಾಜ್ಯದ ವಿವಿಧ ಭಾಗಗಳಿಂದ, ಡಾರ್ಜಿಲಿಂಗ್‌, ಕೋಲ್ಕತ್ತ, ತೆಲಂಗಾಣ, ಆಂಧ್ರದಿಂದ ಬಂದವರು. ಹಲವರ ಆರ್ಥಿಕ ಸ್ಥಿತಿ ಉತ್ತಮವಾಗಿಲ್ಲ. ಇಲ್ಲಿ ಆಗುತ್ತಿರುವ ಗಳಿಕೆಯಿಂದಾಗಿ ಅವರು ಮನೆಯನ್ನು ಅವಲಂಬಿಸುವುದು ಕಡಿಮೆಯಾಗಿದೆ. ಇಲ್ಲಿ ವ್ಯಾಸಂಗ ಮುಗಿಸಿ ಹೋದ ಶೇ 80ಕ್ಕಿಂತ ಅಧಿಕ ವಿದ್ಯಾರ್ಥಿಗಳಿಗೆ ಉತ್ತಮ ಸಂಬಳದ ಕೆಲಸ ಸಿಕ್ಕಿದೆ’ ಎನ್ನುತ್ತಾರೆ ದೃಶ್ಯಕಲಾ ವಿಭಾಗದ ಮುಖ್ಯಸ್ಥ ಪ್ರೊ.ಮೋಹನರಾವ್‌ ಬಿ.ಪಂಚಾಳ್‌.

ಸದ್ಯ ಹಂಪಿ ವಿಶ್ವವಿದ್ಯಾಲಯಕ್ಕೆ ರಾಜ್ಯದ 57 ಕಲಾ ಶಾಲೆಗಳು ಸಂಯೋಜನೆಗೊಂಡಿವೆ. ವಿಶೇಷವೆಂದರೆ ರಾಜ್ಯದಲ್ಲಿ ಯುಜಿಸಿ ಮಾನ್ಯತೆ ಪಡೆದ ದೃಶ್ಯಕಲಾ ಪ್ರೊಫೆಸರ್‌ಗಳ ಸಂಖ್ಯೆ ಕೇವಲ ಮೂರು. ಒಬ್ಬರು ಪಂಚಾಳ್, ಇನ್ನಿಬ್ಬರು ದಾವಣಗೆರೆ ವಿಶ್ವವಿದ್ಯಾಲಯದಲ್ಲಿದ್ದಾರೆ. ಕಲೆಗೆ ಇರುವ ಉತ್ತೇಜನದ ಕೊರತೆಯ ಕತೆಯನ್ನು ಇದು ಹೇಳುತ್ತಿದೆ.