ವಿಶ್ರಾಂತ ಕುಲಪತಿ, ಕುಲಸಚಿವರವಿರುದ್ಧ ರಾಜ್ಯಪಾಲರಿಗೆ ದೂರು

2015ರಿಂದ 2019ರ ಅವಧಿಯಲ್ಲಿ ₹50.86 ಕೋಟಿಯಲ್ಲಿ ವಿವಿಧ ಕಾಮಗಾರಿಗಳನ್ನು ಕೆಟಿಪಿಪಿ ಕಾಯ್ದೆ ಉಲ್ಲಂಘಿಸಿ ಮಾಡಲಾಗಿದೆ ಎಂದು ಇತ್ತೀಚೆಗೆ ಸರ್ಕಾರಕ್ಕೆ ಲೋಕಾಯುಕ್ತ ಅಂತಿಮ ವರದಿ ಸಲ್ಲಿಸಿತ್ತು. ಈ ಕುರಿತು ವಿಶ್ವವಿದ್ಯಾಲಯದ ಕಾನೂನು ಘಟಕದ ಸೂಪರಿಂಟೆಂಡೆಂಟ್‌ ಎಚ್‌.ಎಂ. ಸೋಮನಾಥ ಅವರು ದೂರು ಸಲ್ಲಿಸಿದ್ದರು. ಈಗ ಲೋಕಾಯುಕ್ತ ವರದಿ ಆಧರಿಸಿ ರಾಜ್ಯಪಾಲರಿಗೆ ಪತ್ರ ಬರೆದಿದ್ದಾರೆ. ಆ ಪತ್ರ ‘ಪ್ರಜಾವಾಣಿ’ಗೆ ಲಭ್ಯವಾಗಿದೆ.

‘ಲೋಕಾಯುಕ್ತ ಸಲ್ಲಿಸಿದ ವರದಿಯಲ್ಲಿ ಕೆಟಿಪಿಪಿ ಕಾಯ್ದೆ ಉಲ್ಲಂಘಿಸಲಾಗಿದೆ ಎಂದು ಸ್ಪಷ್ಟವಾಗಿ ತಿಳಿಸಲಾಗಿದೆ. ಐಪಿಸಿಯ 403, 405, 409, 420, 120ಬಿ ಅಡಿ ತಪ್ಪಿತಸ್ಥರ ವಿರುದ್ಧ ಕ್ರಮ ಜರುಗಿಸಬೇಕು ಮತ್ತು ಸಾರ್ವಜನಿಕರ ತೆರಿಗೆ ಹಣವನ್ನು ಅವರಿಂದ ಭರಿಸಿಕೊಳ್ಳಬೇಕು’ ಎಂದು ರಾಜ್ಯಪಾಲರಿಗೆ ಬರೆದಿರುವ ಪತ್ರದಲ್ಲಿ ಸೋಮನಾಥ ಕೋರಿದ್ದಾರೆ.

‘2015ರಿಂದ 2019ರ ಅವಧಿಯಲ್ಲಿ ಕುಲಪತಿಯಾಗಿದ್ದ ಮಲ್ಲಿಕಾ ಎಸ್‌. ಘಂಟಿ, ಕುಲಸಚಿವರಾಗಿದ್ದ ಡಿ. ಪಾಂಡುರಂಗಬಾಬು, ಮಂಜುನಾಥ ಬೇವಿನಕಟ್ಟಿ, ಅಶೋಕಕುಮಾರ ರಂಜೇರೆ, ಹಣಕಾಸು ಅಧಿಕಾರಿಯಾಗಿದ್ದ ಪಿ. ಮಹದೇವಯ್ಯ, ಸಿದ್ದಗಂಗಮ್ಮ, ಎಂಜಿನಿಯರಿಂಗ್‌ ವಿಭಾಗದ ಮುಖ್ಯಸ್ಥರಾಗಿದ್ದ ಜೆ.ಎಸ್‌. ನಂಜಯ್ಯನವರ್, ಸಹಾಯಕ ಕುಲಸಚಿವರಾಗಿದ್ದ ಎಚ್‌. ಶ್ರೀನಿವಾಸ್‌, ಯೋಜನಾ ಅಧಿಕಾರಿಯಾಗಿದ್ದ ಈಟಿ ನಾಗರಾಜ, ಸೂಪರಿಟೆಂಡೆಂಟ್ ಜಿ. ಶಿವಕುಮಾರ ವಿರುದ್ಧ ಕ್ರಮ ಕೈಗೊಳ್ಳಬೇಕು’ ಎಂದೂ ಪತ್ರದಲ್ಲಿ ಮನವಿ ಮಾಡಿದ್ದಾರೆ.