ಮರಿಯಮ್ಮನಹಳ್ಳಿ: 60 ಮೀ. ಉದ್ದ ಹೊಸದಾಗಿ ಹಳಿ ಜೋಡಣೆ

500ಕ್ಕೂ ಅಧಿಕ ಕೆಲಸಗಾರರು ಸತತ 24 ಗಂಟೆ ಕೆಲಸ ಮಾಡಿದ ಬಳಿಕ ಶುಕ್ರವಾರ ರಾತ್ರಿ 8 ಗಂಟೆ ಸುಮಾರಿಗೆ ಹಳಿ ಜೋಡಣೆ ಕಾರ್ಯ ಕೊನೆಗೊಂಡಿದ್ದು, ಪ್ರಾಯೋಗಿಕ ರೈಲು ಸಂಚಾರ ನಡೆಸಲು ಅನುಮತಿ ನೀಡಲಾಗಿದೆ. ಶನಿವಾರ ಈ ಮಾರ್ಗದಲ್ಲಿ ಈ ಹಿಂದಿನ ವೇಳಾಪಟ್ಟಿಯಂತೆ ಹೊಸಪೇಟೆ–ಹರಿಹರ ಪ್ಯಾಸೆಂಜರ್‌ ರೈಲು ಓಡಾಡಲಿದೆ ಎಂದು ನೈರುತ್ಯ ರೈಲ್ವೆಯ ಮುಖ್ಯ ಸಾರ್ವಜನಿಕ ಸಂಪರ್ಕ ಅಧಿಕಾರಿ ಅನೀಶ್ ಹೆಗಡೆ ಅವರು ತಿಳಿಸಿದ್ದಾರೆ.

ರೈಲು ಹಳಿ ತಪ್ಪಿದ ಸ್ಥಳ ಗುಡ್ಡ ಪ್ರದೇಶದಲ್ಲಿದೆ. ವ್ಯಾಸನಕೇರಿ ಹೆದ್ದಾರಿಯಿಂದ ಕೆಲವು ಕಿ.ಮೀ.ದೂರದಲ್ಲಿ ಇರುವ ಸ್ಥಳಕ್ಕೆ ಒಂದಷ್ಟು ದೂರ ನಡೆದೇ ಹೋಗಬೇಕು. ಇಂತಹ ಸ್ಥಿತಿಯಲ್ಲಿ ಕ್ರೇನ್‌ಗಳನ್ನು ತಂದು ಕೆಲಸ ಮಾಡಿಸಿದ್ದು ದೊಡ್ಡ ಸಾಹಸವೆಂಬಂತೆ ಕಾಣಿಸಿತು. ಹಳಿ ತಪ್ಪಿ ಆ್ಯಕ್ಸಲ್‌ ತುಂಡಾದ ಎರಡು ವ್ಯಾಗನ್‌ಗಳನ್ನು ಎತ್ತಿ ಬದಿಯಲ್ಲಿ ಇಡಲಾಗಿದ್ದು, ಅದರೊಳಗಿದ್ದ ಕೋಳಿ, ಮೀನು ಗೊಬ್ಬರ ತಯಾರಿಕೆಯ ಕಚ್ಚಾ ವಸ್ತುಗಳ ಮೂಟೆಗಳನ್ನು ಹೊರಗೆ ತೆಗೆದು ಜೋಡಿಸಿ ಇಡಲಾಯಿತು. ಈ ಸರಕು ಮಧ್ಯಪ್ರದೇಶದಿಂದ ಹಾಸನಕ್ಕೆ ಸಾಗುತ್ತಿತ್ತು.

ವ್ಯಾಸ ಕಾಲೋನಿ ಮತ್ತು ವ್ಯಾಸನಕೇರಿ ರೈಲು ನಿಲ್ದಾಣದ ಮಧ್ಯೆ, ಸ್ಮೆಯೋರ್ ಕಂಪನಿಯ ಹಿಂಭಾಗದ ಅರಣ್ಯ ಪ್ರದೇಶದಲ್ಲಿ ಗುರುವಾರ ಸಂಜೆ 54 ವ್ಯಾಗನ್‍ಗಳನ್ನು ಹೊಂದಿದ್ದ ಗೂಡ್ಸ್ ರೈಲು ಹಾಸನದತ್ತ ತೆರಳುತ್ತಿದ್ದಾಗ 12 ವ್ಯಾಗನ್‌ಗಳು ಹಳಿ ತಪ್ಪಿದ್ದವು. ಈ ಪೈಕಿ ಎರಡು ವ್ಯಾಗನ್‌ಗಳು ಉರುಳಿ ಬಿದ್ದಿದ್ದವು. ಹಳಿ ತಪ್ಪಿದ್ದ ಕೆಲವು ವ್ಯಾಗನ್‌ಗಳು ಶುಕ್ರವಾರ ಸಂಜೆಯ ತನಕವೂ ಸ್ಥಳದಲ್ಲೇ ಇದ್ದವು, ಉಳಿದ ವ್ಯಾಗನ್‌ಗಳನ್ನು ಕಳುಹಿಸಿಸಲಾಗಿದೆ.

ಹಲವು ಕೆಲಸ: ಹಳಿ ತಪ್ಪಿದ ಸ್ಥಳದಲ್ಲಿ ಕೇವಲ ಹಳಿಗಳ ಮರುಜೋಡಣೆಯಷ್ಟೇ ಅಲ್ಲ, ವಿದ್ಯುತ್ ತಂತಿಗಳು, ಕಂಬಗಳ ಮರುಜೋಡಣೆಯೂ ಅಗತ್ಯ. ಹೀಗಾಗಿ ವಿವಿಧ ವಿಭಾಗಗಳ ಸಿಬ್ಬಂದಿ ಜತೆ ಜತೆಯಾಗಿ ಕೆಲಸ ಮಾಡುವ ಮತ್ತು ತ್ವರಿತವಾಗಿ ಕಾಮಗಾರಿ ಮುಗಿಸುವ ಹೊಣೆಗಾರಿಕೆ ಇದೆ. ಇದೆಲ್ಲವನ್ನೂ ಅಧಿಕಾರಿಗಳು ಮತ್ತು ಕೆಲಸಗಾರರು ಶ್ರಮಪಟ್ಟು ಮಾಡುತ್ತಿದ್ದುದು ಸ್ಥಳಕ್ಕೆ ಭೇಟಿ ನೀಡಿದ ‘ಪ್ರಜಾವಾಣಿ’ಗೆ ಕಾಣಿಸಿತು.

ನೂರಾರು ಕಾರ್ಮಿಕರಿಗೆ ಹಾಗೂ ಅಧಿಕಾರಿಗಳಿಗೆ ಸ್ಥಳಕ್ಕೇ ಆಹಾರ, ನೀರು ತಂದು ಕೊಡುವ ಕೆಲಸವೂ ಇನ್ನೊಂದು ಕಡೆಯಿಂದ ನಡೆಯಿತು. 

ನಾಲ್ಕು ವರ್ಷಗಳ ಹಿಂದೆ ಈ ಮಾರ್ಗದಲ್ಲಿ ಗೂಡ್ಸ್ ರೈಲುಗಳ ಓಡಾಟ ಆರಂಭವಾಗಿದ್ದು, ಇದೇ ಮೊದಲ ಬಾರಿಗೆ ಈ ಭಾಗದಲ್ಲಿ ರೈಲು ಅಪಘಾತ ಸಂಭವಿಸಿದೆ.