ನಿಡಗುಂದಿ(ವಿಜಯಪುರ): ತಾಲ್ಲೂಕಿನ ಅಬ್ಬಿಹಾಳ ಕ್ರಾಸ್ ಬಳಿಯ ರಾಷ್ಟ್ರೀಯ ಹೆದ್ದಾರಿ ದಾಟುತ್ತಿದ್ದ ಕುರಿ ಹಿಂಡಿಗೆ ಕಾರು ಡಿಕ್ಕಿ ಹೊಡೆದ ಪರಿಣಾಮ 8 ಕುರಿಗಳು ಸ್ಥಳದಲ್ಲಿಯೇ ಸಾವನ್ನಪ್ಪಿದ್ದು, ಆರು ಕುರಿಗಳು ಗಂಭೀರವಾಗಿ ಗಾಯಗೊಂಡಿವೆ.
ಬೇನಾಳ ಎನ್.ಎಚ್. ಗ್ರಾಮದ ಅಶೋಕ ಬೆಳ್ಳೆಪ್ಪ ದಿಂಡವಾರ ಅವರಿಗೆ ಸೇರಿದ ಈ 14 ಕುರಿಗಳ ಹಿಂಡು ಮೇಯಲು ಹೊಲಕ್ಕೆ ಹೋಗಿದ್ದವು. ಹೆದ್ದಾರಿ ದಾಟುವಾಗ ಏಕಾಏಕಿ ಈ ಘಟನೆ ಬುಧವಾರ ಸಂಜೆ ಜರುಗಿದೆ.
ಆರು ಕುರಿಗಳಿಗೆ ಗಂಭೀರ ಗಾಯವಾಗಿದ್ದು, ಅವು ಕೂಡಾ ಬದಕುವ ಸಾಧ್ಯತೆ ಕಡಿಮೆ ಎನ್ನಲಾಗಿದೆ. ಮೊದಲಿಗೆ ಬೈಕ್ ಸವಾರನೊಬ್ಬ ಒಂದು ಕುರಿಗೆ ಡಿಕ್ಕಿ ಹೊಡೆಸಿದಾಗ, ಇನ್ನುಳಿದ ಕುರಿಗಳು ಬೆದರಿ ಏಕಾಏಕಿ ರಸ್ತೆಗೆ ಬಂದ ಕಾರಣ, ರಭಸದಿಂದ ಸಾಗುತ್ತಿದ್ದ ಕಾರು ಡಿಕ್ಕಿ ಹೊಡೆಯಿತು ಎನ್ನಲಾಗಿದೆ.
ನಿಡಗುಂದಿ ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿದರು. ಕುರಿ ಅಭಿವೃದ್ದಿ ನಿಗಮದಿಂದ ಕುರಿ ಮಾಲೀಕರಿಗೆ ಪರಿಹಾರ ನೀಡಬೇಕೆಂದು ಸ್ಥಳೀಯರು ಆಗ್ರಹಿಸಿದ್ದಾರೆ.
