Karnataka Bandh: ಪ್ರತಿಭಟನೆ, ಮನವಿಗೆ ಬಂದ್‌ ಸೀಮಿತ

ನಗರ ಗ್ರಾಮೀಣ ಪ್ರದೇಶಗಳಲ್ಲಿ ಎಂದಿನಂತೆ ಜನಜೀವನ ಯಾದಗಿರಿ ಸುರಪುರ ಶಹಾಪುರ ಗುರುಮಠಕಲ್‌ ಬಸ್ ಸಂಚಾರ ವಿರಳ ಹಳ್ಳಿಗಳಿಂದ ನಗರಕ್ಕೆ ಕಡಿಮೆ ಸಂಖ್ಯೆಯ ವಿದ್ಯಾರ್ಥಿಗಳ ಆಗಮನ ಎಂದಿನಂತೆ ತೆಗೆದ ಸರ್ಕಾರಿ ಕಚೇರಿಗಳು ಎಪಿಎಂಸಿ ವಹಿವಾಟು ಅಬಾಧಿತ ಟಂಟಂ ಆಟೋಗಳ ಸಂಚಾರವೂ ವಿರಳ ಶಾಲಾ–ಕಾಲೇಜುಗಳಿಗೆ ರಜೆ ಇಲ್ಲ ಅಂಗಡಿ ಮುಂಗಟ್ಟುಗಳಲ್ಲಿ ವಹಿವಾಟು

ಜಿಲ್ಲೆಯ ಶಹಾಪುರ ಶುಕ್ರವಾರ ವಾರದ ಸಂತೆ ಹಾಗೂ ರೈತರ ಕುರಿ ಸಂತೆಗೆ ಬಂದ್‌ ಬಿಸಿ ತಟ್ಟಿತು. ಕುರಿ ಸಂತೆಗೆ ದೂರದ ನಾರಾಯಣಪೇಟ ಮೈಹಿಬೂಬ್ ನಗರ ಮಕ್ತಲ್ ರಾಯಚೂರು ದೇವದುರ್ಗ ಸಿಂದಗಿ ಸೇರಿದಂತೆ ವಿವಿಧೆಡೆ ಕುರಿ ವ್ಯಾಪಾರಸ್ಥರ ವಾಹನಗಳ ಓಡಾಟ ಬಹಳ ವಿರಳವಾಗಿತ್ತು. ಯಾದಗಿರಿ-ಶಹಾಪುರ ರಾಜ್ಯ ಹೆದ್ದಾರಿಯ ಮೇಲೆ ವಾಹನಗಳ ಸಂಚಾರ ಬಹಳ ಕಡಿಮೆ ಇತ್ತು.

ಯಾದಗಿರಿ: ಕಾವೇರಿ ಹೋರಾಟ ದಶಕಗಳದ್ದು. ಪ್ರತಿ ಬಾರಿಯೂ ಮಳೆ ಕೊರತೆ ಉಂಟಾದಾಗ ನೆರೆಯ ರಾಜ್ಯದ ಬೇಡಿಕೆ ರಾಜ್ಯ ಮತ್ತು ರಾಜ್ಯದ ರೈತರ ಪಾಲಿಗೆ ಸಂಕಷ್ಟ ಉಂಟು ಮಾಡುತ್ತಿದೆ. ಆದರೆ ಕಾಂಗ್ರೆಸ್ ಸರ್ಕಾರ ಕಾವೇರಿ ಕೊಳ್ಳದ ರೈತರ ಹಿತಕ್ಕಾಗಿ ನಿರಂತರ ಹೋರಾಡುತ್ತಿದೆ ಎಂದು ಜಿಲ್ಲಾ ಕಿಸಾನ್ ಕಾಂಗ್ರೆಸ್ ಅಧ್ಯಕ್ಷ ಶಾಂತಗೌಡ ಮುಡಬೂಳ ಹೇಳಿದ್ದಾರೆ. ಈ ಕುರಿತು ಹೇಳಿಕೆ ನೀಡಿರುವ ಅವರು ಕಾನೂನು ಹೋರಾಟದ ಮೂಲಕ ಮನವರಿಕೆ ಮಾಡುವ ವಸ್ತುಸ್ಥಿತಿ ಬಿಚ್ಚಿಟ್ಟು ಮನವೊಲಿಸುವ ನಿಟ್ಟಿನಲ್ಲಿ ನಡೆಯುತ್ತಿರುವ ಕಾಂಗ್ರೆಸ್ ಪ್ರಯತ್ನ ಹೋರಾಟ ಕಣ್ಮುಂದೆ ಇದೆ. ಕೇಂದ್ರ ಜಲ ಶಕ್ತಿ ಸಚಿವ ಗಜೇಂದ್ರ ಸಿಂಗ್ ಶೇಖರಾವತ್‌ಗೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಸುದೀರ್ಘ ಪತ್ರ ಬರೆದಿದ್ದಾರೆ. ಸದ್ಯ ಕರ್ನಾಟಕದಲ್ಲಿ ಬರ ಪರಿಸ್ಥಿತಿ ನಿರ್ಮಾಣವಾಗಿರುವುದರಿಂದ ಮುಂಗಾರು ಕೈ ಕೊಟ್ಟಿರುವುದು ಹಾಗೂ ಕಾವೇರಿ ಕೊಳ್ಳ ಪ್ರದೇಶದಲ್ಲೂ ಬರ ಹಾಗೂ ಕುಡಿಯುವ ನೀರಿನ ಸಮಸ್ಯೆ ನೀರು ಹರಿಸಲಾಗದು ಎಂದು ಮನವರಿಕೆ ಮಾಡಲಾಗಿದೆ. ಕೂಡಲೇ ಪ್ರಧಾನಿ ನರೇಂದ್ರ ಮೋದಿ ಪ್ರಧಾನಿ ಮಧ್ಯ ಪ್ರವೇಶಿಸಬೇಕು. ರಾಜ್ಯದ ರೈತರ ರಕ್ಷಣೆಗೆ ಧಾವಿಸಬೇಕು ಎಂದು ಆಗ್ರಹಿಸಿದ್ದಾರೆ.