ಯಾದಗಿರಿ: ವಲಸೆ ನಿಲ್ಲಿಸುವತ್ತ ’ನರೇಗಾ’ ದಾಪುಗಾಲು

ಉದ್ಯೋಗ ಸೃಷ್ಟಿಯಿಂದ ವಲಸೆ ತಡೆಯುವುದು ಒಂದು ಉಪಯೋಗವಾದರೆ ಉದ್ಯೋಗ ಖಾತರಿ ಯೋಜನೆಯಲ್ಲಿ ಕೈಗೊಂಡಿರುವಂತಹ ಕಾಮಗಾರಿಗಳು ಮುಂದಿನ ಹಂತದಲ್ಲಿಯೂ ಲಾಭದಾಯಕವಾಗಿರಬೇಕು ಎನ್ನುವ ಕಲ್ಪನೆಯೊಡನೆ ಕಲ್ಯಾಣಿಗಳ ಜೀರ್ಣೋದ್ಧಾರ, ಕೆರೆಗಳ ಹೂಳೆತ್ತುವುದು, ಬೆಟ್ಟಗಳ ಫೆನ್ಸಿಂಗ್, ಇಂಗು ಗುಂಡಿಗಳ ನಿರ್ಮಾಣದಂತಹ ಅಂತರ್ಜಲವನ್ನು ಹೆಚ್ಚಿಸುವುದು ಹಾಗೂ ಹೆಚ್ಚಿನ ಸಂಖ್ಯೆಯಲ್ಲಿ ಮಾನವ ದಿನಗಳನ್ನು ಸೃಷ್ಟಿಸುವಂತಹ ಕಾಮಗಾರಿಗಳನ್ನು ಮಾಡಲಾಗುತ್ತಿದೆ.

ನರೇಗಾದಲ್ಲಿ ಬದುಗಳ ನಿರ್ಮಾಣ, ಬದು ಕೃಷಿ, ಕೃಷಿ ಹೊಂಡದಂತಹ ವೈಯಕ್ತಿಕ ಲಾಭದಾಯಕ ಕಾಮಗಾರಿಗಳ ಮೂಲಕ ರೈತರು ಕೃಷಿಯೇತರ ಸಮಯದಲ್ಲಿ ತಮ್ಮ ಜಮೀನಿನಲ್ಲಿಯೇ ಕೆಲಸ ಮಾಡಿ ಕೂಲಿ ಪಡೆಯುವುದರ ಜೊತೆಗೆ ಅಂತರ್ಜಲ ಮಟ್ಟವನ್ನು ಹೆಚ್ಚಿಸುವ ಜೊತೆಗೆ ಫಲವತ್ತತೆಯನ್ನೂ ಉಳಿಸುತ್ತದೆ. ಇದರಿಂದ ಕೃಷಿಯಿಂದ ಬಿಡುವಾದ ಸಮಯದಲ್ಲಿ ಉದ್ಯೋಗಕ್ಕಾಗಿ ವಲಸೆ ಹೋಗುವವರು ಈಗ ಇಲ್ಲಿಯೆ ಉದ್ಯೋಗ ಪಡೆಯುವಂತಾಗುತ್ತದೆ ಎನ್ನುವುದು ತಾಲ್ಲೂಕು ಪಂಚಾಯಿತಿ ಕಾರ್ಯನಿರ್ವಾಹಕ ಅಧಿಕಾರಿ ಬಸವರಾಜ ಶರಭೈ ಅವರ ವಿವರಣೆ.

ತಾಲ್ಲೂಕಿನ ಅಜಲಾಪೂರ ಕೆರೆ ಕಾಮಗಾರಿಯಲ್ಲಿ ಅತಿ ಹೆಚ್ಚು 15,775 ಮಾನವ ದಿನಗಳ ಕೆಲಸವಾಗಿದೆ.

ಹೊಸದಾಗಿ ಒಟ್ಟು 6,481 ಜಾಬ್ ಕಾರ್ಡ್‌ಗಳನ್ನು ನೀಡುವ ಮೂಲಕ 11,815 ಜನ ತಾಲ್ಲೂಕಿಗೆ ಹಿಂದಿರುಗಿದ ವಲಸೆ ಕಾರ್ಮಿಕರಿಗೆ ಉದ್ಯೋಗಗಳನ್ನು ಸೃಷ್ಟಿಸಲಾಗಿದೆ. 6214 ಜನ ಪರಿಶಿಷ್ಟ ಜಾತಿ, 2182 ಪರಿಶಿಷ್ಟ ಪಂಗಡದ ಕಾರ್ಮಿಕರಿಗೆ ಉದ್ಯೋಗ ಕಲ್ಪಿಸಲಾಗಿದೆ.

ತಾಲ್ಲೂಕಿಗೆ ಹಿಂದಿರುಗುತ್ತಿರುವವರ ಮಾಹಿತಿಯನ್ನು ಪಡೆಯುವಾಗಲೇ ಪಂಚಾಯಿತಿಗಳಲ್ಲಿ ಅವರ ಜಾಬ್ ಕಾರ್ಡ್ ಇದೆಯೇ ಎನ್ನುವುದು ಪರಿಶೀಲಿಸಿ ಇಲ್ಲದವರಿಗೆ ಹೊಸ ಜಾಬ್ ಕಾರ್ಡ್ ವಿತರಿಸುವ ಅಭಿಯಾನ ಮಾಡಿದ ಫಲವಾಗಿ ಇಷ್ಟೊಂದು ಜನರಿಗೆ ಸ್ಥಳೀಯವಾಗಿ ಉದ್ಯೋಗ ಸಿಕ್ಕಿದೆ.

ಇದರ ಜೊತೆಗೆ ಈ ಮೊದಲಿನಂತಲ್ಲದೆ, ಕಾಮಗಾರಿಗಳಲ್ಲಿ ಸೃಷ್ಟಿಯಾದ ಮಾನವ ದಿನಗಳ ವೇತನವನ್ನು 8 ದಿನಗಳ ಅವಧಿಯೊಳಗೆ ಕಾರ್ಮಿಕರ ಖಾತೆಗಳಿಗೆ ಜಮಾವಣೆ ಮಾಡುತ್ತಿರುವುದರಿಂದ ಇಲ್ಲೆ ಕೆಲಸ ಮಾಡಿಕೊಂಡು ಬದುಕು ಕಟ್ಟಿಕೊಳ್ಳುವ ಆಸೆ ಚಿಗುರುತ್ತಿದೆ ಎನ್ನುತ್ತಾರೆ ಕಾರ್ಮಿಕಾರಾದ ಮಲ್ಲಪ್ಪ, ಪೋಷಪ್ಪ, ವೆಂಕಟೇಶ ಹಾಗೂ ಮಾಣಿಕಮ್ಮನವರು.