ಗುವಾಹಟಿ: ಅಸ್ಸಾಂನ ಐದು ಲೋಕಸಭೆ ಕ್ಷೇತ್ರಗಳಿಗೆ ಎರಡನೇ ಹಂತದಲ್ಲಿ ಏಪ್ರಿಲ್ 26ರಂದು ಮತದಾನ ನಡೆಯಲಿದ್ದು, ಚುನಾವಣಾ ಆಯೋಗ ಇಂದು (ಗುರುವಾರ) ಮಾರ್ಗಸೂಚಿ ಬಿಡುಗಡೆ ಮಾಡಿದೆ.
ನಾಗಾಂವ್, ದರ್ರಾಂಗ್–ಉದಲ್ಗುರಿ, ಕರೀಮ್ಗಂಜ್ ಹಾಗೂ ಮೀಸಲು ಕ್ಷೇತ್ರಗಳಾದ ದಿಫು (ಎಸ್ಟಿ), ಸಿಲ್ಚಾರ್ನಲ್ಲಿ (ಎಸ್ಸಿ) ಎರಡನೇ ಹಂತದಲ್ಲಿ ಮತದಾನ ನಡೆಯಲಿದೆ.
ಇಂದಿನಿಂದ ನಾಮಪತ್ರ ಸಲ್ಲಿಕೆ ಆರಂಭವಾಗಿದ್ದು, ಏಪ್ರಿಲ್ 4 ಕೊನೇ ದಿನವಾಗಿದೆ. 5ರಂದು ಪರಿಶೀಲನೆ ನಡೆಯಲಿದೆ. ಅಭ್ಯರ್ಥಿಗಳು ನಾಮಪತ್ರ ಹಿಂಪಡೆಯಲು ಏಪ್ರಿಲ್ 8 ಕೊನೆಯ ದಿನವಾಗಿದೆ.
ಲೋಕಸಭೆಯ 14 ಸ್ಥಾನಗಳನ್ನು ಹೊಂದಿರುವ ಅಸ್ಸಾಂನಲ್ಲಿ ಏಪ್ರಿಲ್ 19, 26 ಹಾಗೂ ಮೇ 7ರಂದು ಮೂರು ಹಂತಗಳಲ್ಲಿ ಮತದಾನ ನಡೆಯಲಿದೆ.
ಕಾಜಿರಂಗ, ಜೊರ್ಹತ್, ದಿಬ್ರುಗಢ, ಸೋನಿತ್ಪುರ, ಲಖೀಂಪುರ್ ಕ್ಷೇತ್ರಗಳಿಗೆ ಮೊದಲ ಹಂತದಲ್ಲಿ ಹಾಗೂ ಗುವಾಹಟಿ, ಬರ್ಪೆಟ, ಕೊಕ್ರಾಝರ್, ಧುಬ್ರಿಯಲ್ಲಿ ಮೂರನೇ ಹಂತದಲ್ಲಿ ಮತದಾನ ನಡೆಯಲಿದೆ.