ಲೋಕಸಭಾ ಚುನಾವಣೆ | ಕನಿಷ್ಠ ದರ: ಛಾಯಾಗ್ರಾಹಕರ ನಿರಾಸಕ್ತಿ

ಮಂಗಳೂರು: ನಿರ್ದಿಷ್ಟ ಪ್ರದೇಶಗಳಲ್ಲಿ ಕಳೆದ‌‌ ಚುನಾವಣೆಯ ವೇಳೆ ನಡೆದ ಘಟನೆಗಳು, ಸ್ಥಳೀಯ ವಿದ್ಯಮಾನಗಳನ್ನು ಆಧರಿಸಿ ಜಿಲ್ಲಾಡಳಿ ತವು ಜಿಲ್ಲೆಯಲ್ಲಿ ಸೂಕ್ಷ್ಮ ಮತ್ತು ಅತಿ ಸೂಕ್ಷ್ಮ ಮತಗಟ್ಟೆಗಳನ್ನು ಗುರುತಿಸಿದೆ.

ಈ ಹಿಂದೆ ಪ್ರತಿ ವಿಧಾನಸಭಾ ಕ್ಷೇತ್ರ ವ್ಯಾಪ್ತಿಯಲ್ಲಿ ಸೂಕ್ಷ್ಮ ಮತ್ತು ಅತಿ ಸೂಕ್ಷ್ಮ ಮತಗಟ್ಟೆಗಳು ಎಂದು ಕೆಲವು ಮತಗಟ್ಟೆಗಳನ್ನು ಗುರುತಿಸಲಾಗುತ್ತಿತ್ತು. ಈಗ ಅದರ ಮಾನದಂಡಗಳಲ್ಲಿ ಕೆಲವು ಬದಲಾವಣೆ ಮಾಡಲಾಗಿದೆ. ಇಂತಹ ಮತಗಟ್ಟೆಗಳಲ್ಲಿ ಚುನಾವಣೆಯ ದಿನ ನಡೆಯುವ ಮತದಾನ ಪ್ರಕ್ರಿಯೆಯ ಸಂಪೂರ್ಣ ವಿಡಿಯೊ ಚಿತ್ರೀಕರಣ ಮಾಡಲಾಗುತ್ತದೆ. ಜೊತೆಗೆ, ಮನೆಯಿಂದ ಮತದಾನ ಮಾಡಲು ನೋಂದಾಯಿಸಿಕೊಂಡಿರುವ 80 ವರ್ಷ ಮೇಲ್ಪಟ್ಟ (ಪ್ರಸ್ತುತ ಚುನಾವಣೆಯಲ್ಲಿ 85 ವರ್ಷ ಮೇಲ್ಪಟ್ಟ) ಮತದಾರರ ಮತದಾನದ ಪ್ರಕ್ರಿಯೆಯನ್ನು ದಾಖಲೆಗಾಗಿ ವಿಡಿಯೊ ಚಿತ್ರೀಕರಣ ಮಾಡಲಾಗುತ್ತದೆ.

ಈ ವಿಡಿಯೊ ಚಿತ್ರೀಕರಣದ ಹೊಣೆಯನ್ನು ಸಾಮಾನ್ಯವಾಗಿ ಸ್ಥಳೀಯ ಫೋಟೊಗ್ರಾಫರ್‌ಗಳು ಮತ್ತು ವಿಡಿಯೊಗ್ರಾಫರ್‌ಗಳಿಗೆ ಗುತ್ತಿಗೆ‌ ಆಧಾರದಲ್ಲಿ ನೀಡಲಾಗುತ್ತದೆ. ಇಡೀ ದಿನದ ಕೆಲಸಕ್ಕೆ ಕನಿಷ್ಠ ಮೊತ್ತ ದೊರೆಯುವ ಕಾರಣಕ್ಕೆ ಈ ಕಾರ್ಯಕ್ಕೆ ಬರಲು ವಿಡಿಯೊಗ್ರಾಫರ್‌ಗಳು ಅಷ್ಟಾಗಿ ಆಸಕ್ತಿ ತೋರುತ್ತಿಲ್ಲ.

‘ಚುನಾವಣೆಯ ದಿನ ಮತದಾನ ಆರಂಭವಾದಾಗಿನಿಂದ ಎಲ್ಲ ಪ್ರಕ್ರಿಯೆಗಳು ಪೂರ್ಣಗೊಳ್ಳುವ ತನಕ ಮತಗಟ್ಟೆಯಲ್ಲೇ ಇರಬೇಕಾಗುತ್ತದೆ. ಇಡೀ ದಿನದ ಕೆಲಸಕ್ಕೆ ₹2,000 ಗೌರವಧನ ಸಿಗುತ್ತದೆ. ಕಾಲಕ್ಕೆ ತಕ್ಕಂತೆ ಎಲ್ಲ ಸಾಮಗ್ರಿ, ಕೂಲಿ ದರ ಹೆಚ್ಚಳವಾಗುತ್ತದೆ. ಅಭ್ಯರ್ಥಿಗಳ ಚುನಾವಣಾ ವೆಚ್ಚ, ಒಟ್ಟಾರೆ ಚುನಾವಣೆ ವೆಚ್ಚ ಎಲ್ಲವೂ ಹೆಚ್ಚಾಗಿವೆ. ಆದರೆ, ಚುನಾವಣೆಯ ವಿಡಿಯೊಗ್ರಫಿ ಪ್ರಕ್ರಿಯೆಯ ಬಾಡಿಗೆ ಮೊತ್ತ ಮಾತ್ರ ಯಾಕೆ ಹೆಚ್ಚಳ ಆಗುತ್ತಿಲ್ಲ’ ಎಂದು ಛಾಯಾಗ್ರಾಹಕರೊಬ್ಬರು ಪ್ರಶ್ನಿಸುತ್ತಾರೆ.

‘ಬಹಳ ವರ್ಷಗಳ ಹಿಂದೆ ಒಂದು ಮತಗಟ್ಟೆಯಲ್ಲಿ ವಿಡಿಯೊ ಚಿತ್ರೀಕರಣ ಮಾಡಿದರೆ ಇಡೀ ದಿನಕ್ಕೆ ₹1,500 ಬಾಡಿಗೆ ಮೊತ್ತ ನಿಗದಿಯಾಗಿತ್ತು. ತೀವ್ರ ಒತ್ತಡ ತಂದ ನಂತರ ಇದನ್ನು ₹2,000ಕ್ಕೆ ಹೆಚ್ಚಳ ಮಾಡಲಾಗಿದೆ. ಆದರೆ, ದರ ಪರಿಷ್ಕರಣೆಗೊಂಡು ದಶಕ ಕಳೆದಿದ್ದು, ಮತ್ತೊಮ್ಮೆ ಪರಿಷ್ಕರಣೆ ಮಾಡಿ ಕನಿಷ್ಠ ದರವನ್ನು ₹4,000ಕ್ಕೆ ನಿಗದಿಪಡಿಸಬೇಕು’ ಎಂದು ಪುತ್ತೂರಿನ ಛಾಯಾಗ್ರಾಹಕರೊಬ್ಬರು ಒತ್ತಾಯಿಸಿದರು.

‘ಛಾಯಾಗ್ರಾಹಕ ವೃತ್ತಿಯು ಸೀಸನ್ ಅವಲಂಬಿತವಾಗಿದೆ. ಈಗ ಧಾರ್ಮಿಕ, ಕೌಟುಂಬಿಕ ಶುಭ ಸಮಾರಂಭಗಳು ಹೆಚ್ಚು ನಡೆಯುವ ಸಮಯ. ಈ ವೇಳೆ ಸಿಗುವ ಮುಂಗಡ ಬುಕ್ಕಿಂಗ್‌ಗಳನ್ನು ಬಿಟ್ಟು ಚುನಾವಣೆಯ ಕಾರ್ಯದಲ್ಲಿ ಭಾಗವಹಿಸುತ್ತೇವೆ. ಮನೆಯಲ್ಲಿ ಮತದಾನ ಪ್ರಕ್ರಿಯೆಯ ಚಿತ್ರೀಕರಣಕ್ಕೆ ಕೆಲವೊಮ್ಮೆ ದುರ್ಗಮ ಮಾರ್ಗಗಳಲ್ಲಿ ಹೋಗಬೇಕಾಗುತ್ತದೆ. ಇಡೀ ದಿನವನ್ನು ಅಲ್ಲಿಯೇ ವ್ಯಯಿಸಬೇಕಾಗುತ್ತದೆ. ಸಹಾಯಕರನ್ನು ನೇಮಿಸಿಕೊಂಡು ಈ ಕೆಲಸ ಮಾಡಬೇಕಾಗುತ್ತದೆ. ಅವರಿಗೆ ನಾವು ಅದೇ ದಿನ ಕಿಸೆಯಿಂದ ಸಂಬಳ ಕೊಟ್ಟು ಕಳುಹಿಸುತ್ತೇವೆ. ಆದರೆ, ನಮ್ಮ ಬಿಲ್ ಪಾಸಾಗಲು ಒಂದು ತಿಂಗಳಾದರೂ ಆಗಬಹುದು, ನಾಲ್ಕು ತಿಂಗಳಾದರೂ ಆಗಬಹುದು’ ಎಂದು ಅವರು ಬೇಸರಿಸಿದರು. ‘ಜಿಲ್ಲಾಡಳಿತವು ಸ್ಥಳೀಯ ಪರಿಸ್ಥಿತಿ ಗಮನಿಸಿ ಕ್ರಿಟಿಕಲ್ ಮತ್ತು ವಲ್‌ನರೇಬಲ್ ಮತಗಟ್ಟೆಗಳನ್ನು ಗುರುತಿಸುತ್ತದೆ. ಈ ಬಾರಿ ಈವರೆಗೆ ಒಟ್ಟು 171 ಮತಗಟ್ಟೆಗಳನ್ನು ಗುರುತಿಸಲಾಗಿದೆ. ಕೆಲವು ಕಡೆಗಳಲ್ಲಿ ವೆಬ್ ಕಾಸ್ಟಿಂಗ್‌ ಮಾಡಲಾಗುತ್ತದೆ. ವೆಬ್ ಕಾಸ್ಟಿಂಗ್‌ ಮಾಡಲು ಕೇಂದ್ರೀಕೃತ ವ್ಯವಸ್ಥೆಯಲ್ಲಿ ಕ್ಯಾಮೆರಾ ಅಳವಡಿಸಲಾಗುತ್ತದೆ. ವೆಬ್‌ ಕ್ಯಾಮೆರಾ ಹೆಚ್ಚು ಸುರಕ್ಷಿತ ಯಾಕೆಂದರೆ ಇದನ್ನು ಮುಂಚಿತವಾಗಿ ಅಳವಡಿಸಿರುವುದರಿಂದ ಮಾನವ ಹಸ್ತಕ್ಷೇಪ ಇರುವುದಿಲ್ಲ, ಜೊತೆಗೆ ಪ್ರತಿ ಕ್ಷಣದ‌ ಆಗುಹೋಗುಗಳು ಲೈವ್ ಇರುತ್ತವೆ’ ಎಂದು ಅಧಿಕಾರಿಯೊಬ್ಬರು ತಿಳಿಸಿದರು.

‘ಕನಿಷ್ಠ ಮೊತ್ತ ₹5,000 ನಿಗದಿಪಡಿಸಲಿ’

‘ಫೋಟೊಗ್ರಾಫರ್ಸ್ ಮತ್ತು ವಿಡಿಯೊಗ್ರಾಫರ್ಸ್ ಅಸೋಸಿಯೇಷನ್ ಮೂಲಕವೇ ಗುತ್ತಿಗೆ ನೀಡುವಂತೆ ಈ ಹಿಂದೊಮ್ಮೆ ಜಿಲ್ಲಾಡಳಿತಕ್ಕೆ ಮನವಿ ಸಲ್ಲಿಸಲಾಗಿತ್ತು. ಸಂಘಟನೆ ಮೂಲಕ‌ ಹೊಣೆಗಾರಿಕೆ ನೀಡಿದಾಗ ಅದು ಹೆಚ್ಚು ಸುರಕ್ಷಿತವೂ ಆಗಿರುತ್ತದೆ. ಆದರೆ, ಈಗಿನ ದರಕ್ಕೆ ಹೆಚ್ಚಿನ ಛಾಯಾಗ್ರಾಹಕರು ಟೆಂಡರ್ ಪಡೆಯಲು ಮುಂದೆ ಬರುವುದಿಲ್ಲ. ದಿನದ ಬಾಡಿಗೆ ಪರಿಷ್ಕರಿಸಿ ಕನಿಷ್ಠ ₹5,000 ಮೊತ್ತ ನಿಗದಿ ಮಾಡಬೇಕು’ ಎಂದು ದಕ್ಷಿಣ ಕನ್ನಡ ಮತ್ತು ಉಡುಪಿ ಛಾಯಾಗ್ರಾಹಕರ ಸಂಘದ ಉಳ್ಳಾಲ ವಲಯದ ಸ್ಥಾಪಕಾಧ್ಯಕ್ಷ ಅರುಣ್ ಕುಮಾರ್ ಒತ್ತಾಯಿಸಿದರು.