ಪ್ರಬಲ ಪ್ರಧಾನಿ ಸಾಲ ಮನ್ನಾ ಮಾಡಲಿಲ್ಲವೇಕೆ?: ಮೋದಿ ಭಾಷಣಕ್ಕೆ ಸಚಿವ ಶಿವಾನಂದ ಕಿಡಿ

ನಗರದಲ್ಲಿ ಗುರುವಾರ ನಡೆದ ಬಿಜೆಪಿ ವಿಜಯ ಸಂಕಲ್ಪ ಯಾತ್ರೆಯಲ್ಲಿ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಮಾಡಿದ ದುರ್ಬಲ ಸರ್ಕಾರ (ರಾಜ್ಯ) ಹಾಗೂ ಪ್ರಬಲ ಸರ್ಕಾರ (ಕೇಂದ್ರ) ಹೋಲಿಕೆಯ ಭಾಷಣಕ್ಕೆ ಶುಕ್ರವಾರ ಇಲ್ಲಿ ತಿರುಗೇಟು ನೀಡಿದ ಅವರು, ‘ತಮ್ಮದು ಮಜಬೂತ್ ಸರ್ಕಾರ ಎನ್ನುವ ಪ್ರಧಾನಿ ನರೇಂದ್ರ ಮೋದಿ, ಐದು ವರ್ಷಗಳ ಆಡಳಿತದ ಅವಧಿಯಲ್ಲಿ ರೈತರ ಸಾಲ ಮನ್ನಾ ಮಾಡಿ ಅವರ ಸಂಕಷ್ಟಕ್ಕೆ ಮಿಡಿಯಲಿಲ್ಲವೇಕೆ’ ಎಂದು ಕೇಳಿದರು.

ಇದನ್ನೂ ಓದಿ...ದೇವೇಗೌಡರ ಪರಿವಾರವನ್ನು ಸಾರ್ವಜನಿಕ ಜೀವನದಿಂದ ಶಾಶ್ವತವಾಗಿ ಕಿತ್ತೊಗೆಯಿರಿ: ಮೋದಿ

‘ಪ್ರಧಾನಿ ಭಾಷಣ ಬಾಗಲಕೋಟೆ ಜನರ ಹಾಗೂ ಮುಳುಗಡೆ ಸಂತ್ರಸ್ತರ ನಿರೀಕ್ಷೆ ಹುಸಿಗೊಳಿಸಿದೆ. ಆಲಮಟ್ಟಿ ಜಲಾಶಯ ರಾಷ್ಟ್ರೀಯ ಯೋಜನೆ ವ್ಯಾಪ್ತಿಗೆ ಬರಬೇಕು ಎಂಬುದು ರಾಜ್ಯ ಸರ್ಕಾರದ ಒತ್ತಾಯವಾಗಿದೆ. ಆ ಬಗ್ಗೆಯೂ ಮೋದಿ ಸ್ಪಷ್ಟವಾಗಿ ಏನೂ ಹೇಳಲಿಲ್ಲ. ಎಚ್.ಡಿ.ದೇವೇಗೌಡರು ಪ್ರಧಾನಿಯಾಗಿದ್ದಾಗ ಕೃಷ್ಣಾ ಮೇಲ್ದಂಡೆ ಯೋಜನೆಗೆ ಹೆಚ್ಚಿನ ಅನುದಾನ ನೀಡಿ ಅದಕ್ಕೆ ವೇಗ ನೀಡಿದ್ದರು. ಆದರೆ ಮೋದಿ ಬರೀ ಮಾತಾಡಿ ಹೋದರು’ ಎಂದು ಟೀಕೆ ಮಾಡಿದರು.

ಲಿಂಗಾಯತ ಪ್ರತ್ಯೇಕ ಧರ್ಮದಂತಹ ವಿಚಾರ ಪ್ರಧಾನಿ ಪ್ರಸ್ತಾಪಿಸಿದ್ದು ಸರಿಯಲ್ಲ. ಇಬ್ಬರು ಸಚಿವರ ನಡುವಿನ ಮಾತುಗಳನ್ನು ಪ್ರಸ್ತಾಪಿಸುವ ಬದಲು ಪ್ರಧಾನಿ ಜನರ ಸಮಸ್ಯೆಗಳ ಬಗ್ಗೆ ಮಾತಾಡಬೇಕಿತ್ತು ಎಂದು ಟಾಂಗ್ ನೀಡಿದ ಶಿವಾನಂದ ಪಾಟೀಲ, ಸಣ್ಣ ಸರ್ಜಿಕಲ್ ಸ್ಟ್ರೈಕ್ ಬಗ್ಗೆ ನಮಗೂ ಸಂತೋಷವಿದೆ. ಮುಂದೆ ಬರುವ ಪ್ರಧಾನಿಯೂ ಅದನ್ನು ಮಾಡಬಹುದು ಎಂದರು.

ಮಾತಿನಲ್ಲಿಯೇ ಮನೆಕಟ್ಟುವ ಮೋದಿ, ತಮ್ಮ ಮುಖ ನೋಡಿಕೊಂಡು ಬಿಜೆಪಿ ಅಭ್ಯರ್ಥಿಗಳಿಗೆ ಮತ ಕೊಡಿ ಎನ್ನುತ್ತಿದ್ದಾರೆ. ಓಟು ಕೊಟ್ಟ ಮತದಾರರು ಮೋದಿ ಮುಖ ನೋಡಲು ಮತ್ತೊಂದು ಚುನಾವಣೆವರೆಗೆ ಕಾಯಬೇಕೇ ಎಂದು ಛೇಡಿಸಿದರು.

ಇವನ್ನೂ ಓದಿ...

*ಕಾಂಗ್ರೆಸ್‌ ವಿರುದ್ಧ ಮೋದಿ ಲಿಂಗಾಯತ ಅಸ್ತ್ರ

*ಕಣ್ಣೀರು ಹಾಕುವ ಮುಖ್ಯಮಂತ್ರಿ, ಭಾವನಾತ್ಮಕ ನಾಟಕೀಯ ಸರ್ಕಾರ– ಮೋದಿ ಟೀಕೆ